1-4. Irair apwal dah me Piter lelohng, oh ia pahn omw pepehm ma ke mi nan eh irairo?

 NGILEN ewen kehlo uhdahn laud ni ahnsou me e ritpene mwurin Piter eh pedolong. E sensel nanpwungen sounsilasil en Rom riemen oh ira kahrehla ih nan imwetengo. E anahne mihmihki mwo awa tohto, ele pil lella rahn kei mwohn e kak ese dahme pahn wiawihong ih. Sohte mehkot e kin kak kilang, ihte diden imwetengo, tuhkehn kateng ko, eh selmete ko oh sounsilasil ko.

² Piter eri alehdi rohng kamasepwehk ehu. Nanmwarki Erod Akripa I koasoanedier teng en kemehla Piter. a Ni mehlel, Erod men wahieila Piter mwohn mesen aramas akan mwurin Pahsohpa, oh kemehla ih pwehn kaperenda pokono. Met sohte wiahte mehn kamasak ehu pwehki Erod uhdahn ahneki manaman en wia met. Pwe e pil ahpwtehn kemehla iengen Piter wahnpoarono, Seims.

³ Song medewehla ia mwomwen ni soutiko mwohnte rahn me Piter pahn kamakamalao. Erein eh kelekelehpw nan imwetengo, dahme e medemedewe nan eh pere rotoroto? Ia duwe, e tamanda dahme Sises mahsanihong sounpar kei mwoweo, me ehu rahn e pahn selidi oh wisiklahng kamakamala? (Sohn 21:18, 19) Ele Piter medemedewe ma ahnsowo leledohr.

⁴ Ma kowe me mi nan en Piter eh irairo, ia pahn omw pepehm? Aramas tohto pahn mworusala oh medewe me solahr arail koapworopwor. Ahpw ong sapwellimen Sises Krais tohnpadahk mehlel kan, ahnsou koaros re kin ahneki koapworopwor. Dahme kitail sukuhlkihsang mwomwen en Piter oh ienge Kristian kan ar kin mwekidki kalokolok me lelohng irail? Kitail pahn kilang.

5, 6. (a) Dahme kahrehda Nanmwarki Erod Akripa I wiakauwe mwomwohdisohn Kristian oh ia duwen eh wia met? (b) Dahme kahrehda kamakamalahn Seims eh wia kahpwal laud ehu ong mwomwohdiso?

⁵ Kitail sukuhlki nan irelaud me ahpwtehn neko me ni ahnsou me mehn likio Kornilius oh eh peneinei wiahla Kristian kei, met uhdahn wia ahnsou kaperen ehu ong mwomwohdisohn Kristian. Ahpw mehn Suhs kan me kaidehn Kristian kei mwein pwuriamweikihla ar esehda me mehn Suhs tohto me wia Kristian kan kin iang irail me kaidehn mehn Suhs kaudok ni saledek met.

⁶ Erod wia kaunen koperment loalokong men. E medewe me irair wet pahn kihong ih ahnsou mwahu en kenikenla rehn mehn Suhs kan, ihme kahrehda e tepida wiakauwe Kristian akan. Mwein e rongada me wahnpoaron Seims wia emen me Sises uhdahn kin ketin karanih. Ihme kahrehda Erod “kemehkihla kedlahs Seims, rien Sohn.” (Wiewia 12:2) Eri met wia kahpwal laud ehu ong mwomwohdisou! Seims iei emen nanpwungen meh silimeno me pein kilang ni Sises eh ketin wekila oh lingalingla. Oh irailte me pil kilang ekei manaman me wahnpoaron teikan sohte iang kilang. (Mad. 17:1, 2; Mark 5:37-42) Sises kin ketin ekerki Seims oh rie pwutako, Sohn, “Nein Nansapwe Pwutak” pwehki ara kin kasalehda ngoang laud. (Mark 3:17) Kahrehda ni ahnsou me Seims kamakamala, mwomwohdiso uhdahn nsensuwedla pwehki wahnpoaron menet me re poakohng me kin wia sounkalohk eimah oh lelepek men solahr mie.

7, 8. Dahme mwomwohdiso wia ni ahnsou me Piter selidi?

 ⁷ Kamakamalahn Seims uhdahn kaperenda mehn Suhs ako, oh ih met me Akripa kin kasikasik. Met kahrehiong en pil kaloke Piter. Duwehte dahme tepin parakrap kan en irelaud wet kawehwehda, e salihedi Piter. Ahpw mwein Akripa tamataman me mwowe ekis, wahnpoaron ko saledeksang nan imwetengo sang ni manaman, duwehte me Irelaud 5 en pwuhk wet kasalehda. Erod eri wiahda pwe Piter en selidi nanpwungen sounsilasil 2, oh sounsilasil 16 en kin doadoahk weliweliali ni rahn oh nipwong pwehn tetehk Piter de pitla. Pwe ma e pitla, sounsilasil pwukat pahn uhd kamakamala. Nan soangen irair apwal wet, dahme Kristian teikan kak wia pwe ren sewese Piter?

⁸ Tohnmwomwohdiso uhdahn ese dahme re pahn wia. Wiewia 12:5 mahsanih: “Piter eri mihmihte nan imweteng, ahpw mwomwohdiso kin poaden kapakapki ih ong Koht.” Ei, irail kin uhdahn kapakapki riarail Kristian me re poakepoakeo sang nan arail mohngiong. Kamakamalahn Seims sohte kahrehiong irail en sohla pwoson pwe re kamehlelehte me Siohwa kin ketin karonge arail kapakap kan. Eri kapakap uhdahn kin kesempwal ong Siohwa. Ma kapakap kan kin pahrekiong kupwure, e pahn uhdahn ketin sapengala. (Ipru 13:18, 19; Seims 5:16) Met wia ire kesempwal ehu ong Kristian akan rahnpwukat en wehwehki.

 9. Ia duwen atail kak alasang tepin Kristian ko me kapakapki Piter?

⁹ Ke kin ese ekei Kristian kan me kin lokolongki kahpwal tohto? Ele re kin dadaur pahn kalokolok, koperment kin keinapwihdi arail doadoahk, de kahpwal kan en melimel, rerrer en sahpw de  ilok laud ape (natural disasters). Ke sou kapakapkin irail? Ele ke ese Kristian teikan me dadaur pahn kahpwal kan me duwehte uhwong sang peneinei, irair en mworusala, de soahng teikan me kin kasonge arail pwoson. Ma ke kin doudouloale mwohn omw kapakap, ele ke kak medewehda eden ekei me ke kak kapakapkihong Siohwa, me kin “ketin sapeng pekipek kan.” (Mel. 65:2) Ni mehlel, ke sou pahn men riomw Kristian kan ren wiahiong uhk soahngohte ni omw lelohng kahpwal kan?

10, 11. Kawehwehda ia duwen sapwellimen Siohwa tohnlengo kasaledekihala Piter sang nan imwetengo.

¹⁰ Ia duwe, Piter masak dahme Erod pahn wiahiong ih? Kitail sohte kak uhdahn ese duwen met, ahpw erein kaimwiseklahn pwohng me e mihmi nan imwetengo, e wie memeir nanpwungen sounsilasil riemeno me pepehd. Piter uhdahn kin pwoson Siohwa, kahrehda e uhdahn ese me sohte lipilipil dahme pahn wiawihong ih, Siohwa pahn ketin tamatamante ih. (Rom 14:7, 8) Ahpw Piter sohte kasik soahng kapwuriamwei kan me pahn kereniong wiawi. Marain lingaling pa dakerada nan eh pereo ni imwetengo. Tohnleng men kesikesihnen wasao, oh sounsilasil ko sohte kak kilang ih. E ahpw mwadangete pangenda Piter. Oh selmete ko me salihpene pehn Piter ko—me mwomwen sohte kak ohla—ahpw pwupwusang ni peh ko!

¹¹ Tohnlengo ahpw ndaiong Piter: “Mwadang uhda! . . . Likouda oh kihong omw suht kan. . . . Likawihada omw likou puhp.” Piter mwadangete peikiong. Tohnlengo ahpw ndaiong: “Idawehn ie,” oh Piter idawehnla. Ira kohkohsang perehn nan imwetengo, songosong en dehr katairong ni ara alu daulih sounpei ko me mi likio sinsile pereo, oh ira alulahng ewen kehl mete laudo. Piter ele medemedewe ia duwen ara kak pedoisang nan kehlo. Ma Piter medewe duwen met, e sohte anahne medewehki ahnsou reirei. Ni ara alulahng ewen kehlo, “e pein ritidahng ira.” Ira eri pedoisang nan kehlo oh aluhla nanialo, tohnlengo ahpw sohrala. Piter eri kelehpwla nanialo oh e wehwehkihda me soahng koaros uhdahn wiawi. Met kaidehn kaudiahl ehu. E solahr sensel!—Wiewia 12:7-11.

12. Dahme kahrehda e kansenamwahu en medemedewe ia duwen Siohwa eh ketin doarehla Piter?

¹² E sou kansenamwahu en medewehla me sohte mehkot kak irehdi sapwellimen Siohwa kehl en doarehla sapwellime ladu kan? Ni ahnsowo koperment me keieu kehlail nan sampah kin utung nanmwarki men me salihedi Piter. Ahpw Piter pedoisang nan imwetengo! Mehlel, Siohwa sohte kin ketin wia soangen manaman pwukat pwehn doarehla sapwellime ladu kan koaros. Pwe e sohte ketin kapitala Seims en dehr kamakamala; mwuhr E pil sohte ketin kapitala Piter ni ahnsou  me sapwellimen Sises mahsen duwen wahnpoaron menet pweida. Kristian akan rahnpwukat sohte kin kasik me re pahn poadoandoarla sang ni manaman. Ahpw kitail kin tamataman me Siohwa sohte ketin wekila. (Mal. 3:6) Mehla rasehng imweteng ehu me mwomwen apwal en pitsang, ahpw kereniong Siohwa pahn ketin doadoahngki sapwellime Ohlo en ketin kaiasada aramas rar kei me melahr. (Sohn 5:28, 29) Inou pwukat kak sewese kitail en ahneki eimah laud ni atail kin lelohng kahpwal akan rahnpwukat.

13-15. (a) Dahme tohnmwomwohdiso ko me tuhpene ni imwen Meryo wia ni Piter eh lella mwo? (b) Dahme pwuhken Wiewia uhd koasoia, oh dahme Piter pousehlahte wia ong rie Kristian kan?

¹³ Piter wie kesikesihnen nanial rotoroto, medemedewe ia wasa e pahn kohla ie. Ih eri koasoanehdi wasa me e pahn kohla ie. Lih Kristian men me adaneki Mery kin kousoan karanih wasao. E sansal me Mery wia liohdi kepwehpwe men, oh e imwaneki ihmw laud ehu me mwomwohdiso kak tuhpene loale. Liho iei inen Sohn Mark. Ih wasaht me pwuhken Wiewia tepin koasoia duwen Sohn Mark, me mwuhr wiahla emen me Piter wiahki duwehte nah pwutak. (1 Pit. 5:13) Nipwong me Piter saledeklao, mendahki e uhdahn pwand, tohto nan mwomwohdiso mi ni imwen Meryo, oh re kin wie kapakap ni ngidingid. Ele re kapakapki pwe Piter en saledekla. Oh mwuhr re uhdahn pwuriamweikihla mwomwen Siohwa eh ketin sapengala arail kapakapo!

¹⁴ Piter wie letelet ni ewen kehlo, maslikin wasa me kelpeneo mwohn ihmwo. Lidu serepein men me ede Rohda ahpw kohdo ni ewen kehlo. Mehn Krihs tohto kin adaneki Rohda, me wehwehki “Rohs.” E sohte kak kamehlele me e rongorong ngilen Piter! Uwen eh perenda, e sohte ritingadahng Piter wenihmwo, ahpw e tangala nan ihmwo pwehn kamehlelehiong mwomwohdiso me Piter mi mwo. Re nda me e sahliel ahpw e sohte uhdihsang en ndaiong irail dahme e rong. Ekei nan mwomwohdisou eri tepida kamehlele me mwein e uhdahn rong mehkot, oh mwein tohnleng men me wiliandi Piter kohdo. (Wiewia 12:12-15) Erein ahnsowo, Piter wie letelet lao re kohdo ni ewen kehlo oh ritingada.

¹⁵ Eri ni ewen kehlo, “irail kilangada ih oh pwuriamweikihla”! (Wiewia 12:16) Uwen arail perenda, Piter anahne peki ren meleileidi pwe en kak kawehwehda dahme wiawi. E pil peki irail en ndaiong tohnpadahko Seims oh ohl Kristian teikan dahme wiawi, ih eri mweselda mwohn nein Erod sounpei ko kak diarada ih. Piter eri kohkohla wasa ehu me sohte pahn keper pwe en kak pousehlahte papah Siohwa ni lelepek. Mwurin ire pwukat, ihte wasa me pwuhken Wiewia pwurehng koasoia duwen ih iei nan irelaud 15, wasa me kawehwehda duwen eh sewese  kapwungala ire me pid sirkumsais. Pwuhken Wiewia eri uhd koasoia duwen en wahnpoaron Pohl eh doadoahk oh seiloak. Ahpw kitail kak kamehlele me Piter kin kakehlaka en rie Kristian kan arail pwoson sohte lipilipil wasa me e kin kohla ie. Ni ahnsou me e mweselsang pwihn me mi ni imwen Meryo, irail wie pereperen.

16. Dahme kahrehda kitail kak kamehlele me ni ahnsou kohkohdo kitail pahn ahneki ahnsou kaperen tohto?

¹⁶ Ekei pak Siohwa kin ketikihong sapwellime ladu kan laudsang dahme re kin kasik oh met kin kahrehiong irail en direkihla peren. Ih soangen pepehm wet me rien Piter Kristian kan ahneki pwohngo. Ele kitail pil kin ahneki soangen pepehmohte ni Siohwa eh kin ketin kapaia kitail rahnpwukat. (Lep. Pad. 10:22) Ni ahnsou keren, kitail pahn kilang sapwellimen Siohwa inou kan koaros eh pahn pweida nin sampah pwon. Kapai kaselel kan me kitail pahn ale uhdahn pahn mwahusang dahme kitail kak medewehda rahnpwukat. Eri ma kitail kolokolete atail lelepek ong Siohwa, kitail kak kamehlele me ni ahnsou kohkohdo kitail pahn pil ahneki ahnsou kaperen tohto.

17, 18. Dahme kahrehiong pokono ren kapohlih Erod?

¹⁷ Erod pil pwuriamweikihla en Piter eh saledeksang nan imwetengo, oh e uhdahn lingeringerkihda met. Erod mwadangete ruwese ren rapahki Piter, ih eri pil kapeidakih sounsilasil ko me sinsile Piter. Irail eri “wisiklahng kalokolok,” mweinte re kamakamala. (Wiewia 12:19) Erod Akripa iei ohl emen me sempoak oh lemei. Ia duwe, ohl lemei menet pahn alehdi kalokepe?

¹⁸ Mwein Akripa namenekda pwehki e sohte kak kemehla Piter. Ahpw e mwadangete alehdi ahnsou mwahu en wia mehkot pwehn pwurehng pohlda. Ekei eh imwintihti kan kodohng tuhwong ih pwehn wiahda popohl reh, oh met kihong ih ahnsou mwahu en wia kapahrek mwohn pokon laud ehu. Luk ntingihedi me ni arail kaukaunop, “Erod ahpw likoukihda likoun nanmwarki.” Soupoad en mehn Suhs, Josephus, ntingihedi me en Erod eh likowo wiawihkihda silper, eri ni ahnsou me marain kin daker nanmwarkio, e kin wie lingaling. Met kahrehiong aramas ko ren medewe me ih koht emen. Sounpolitik aklapalap menet eri wia eh kapahreko. Pokono me men kapohlih Erod weriwer ndinda: “Kapitien koht emen, kaidehn ngilen aramas emen!”—Wiewia 12:20-22.

19, 20. (a) Dahme kahrehda Siohwa ketin kaloke Erod? (b) Dahme kahrehda e kansenamwahu atail ese duwen koasoipen en Erod Akripa kamakamalao?

¹⁹ Koht kelehpw me warohng sapwellimanki soangen kaping wet, oh  Koht ketin mwahngih dahme kin wiawi! Erod ahneki ahnsou mwahu en soikala kalokolok pwe e kak lipwoare pokono de sapwungki dahme re nda. Ahpw e wiahla mehn karasaras kehlail en lepin padahko me mahsanih: “Aklapalap kin kahrehiong aramas en pwupwudi.” (Lep. Pad. 16:18) “Ni ahnsowohte sapwellimen Siohwa tohnleng men ahpw kihong ih soumwahu ehu,” oh kahrehiong ohl roporop oh aklapalap menet en mehla ni ahl me uhdahn suwed oh kasaut. “Mwahs eri kangala ih oh e ahpw mehla.” (Wiewia 12:23) Josephus pil tehkada me soumwahwo mwadangete lel Akripa, oh e pil nda me pein nanmwarkio medewe me e pahn mehla pwehki e pwungki kaping me pokono kihong. Josephus pil ntingihedi me Akripa soumwahuki rahn limau mwohn e mehla. b

²⁰ Ekei pak e mwomwen me aramas suwed kan kin wia me suwed ahpw re sohte alehdi kalokepe. Kitail sohte kin pwuriamweiki met pwehki “sampah pwon mi pahn manaman en me suwedo.” (1 Sohn 5:19) Ahpw sapwellimen Koht ladu lelepek kan kin ekei pak pwunodki ni ahnsou me aramas suwed kan kin mwomwen pitsang kalokolok. Ihme kahrehda iren Paipel me duwehte koasoipen Erod kin kansenamwahu. Iren Paipel pwukat kin kasalehda me Siohwa kin ketin kadeik aramas suwed kan, oh met kin katamankihong sapwellime ladu lelepek koaros me e kin ketin poakohng pwung pahrek. (Mel. 33:5) E pahn ketin kapwungala wiewia suwed kan.

21. Iren mehn kasukuhl kesempwal dah me kitail sukuhlki sang Wiewia irelaud 12, oh dahme kahrehda met kin kansenamwahwih kitail rahnpwukat?

²¹ Koasoipen Paipel wet kaimwisengkihla iren mehn kasukuhl kangoang wet: “Mahsen en Siohwa kin lolohkseli oh aramas tohto kamehlele.” (Wiewia 12:24) Koasoipen pweidahn kalohk wet ele kin katamankihong kitail me Siohwa kin ketin kapaia doadoahk en kalohk nan atail ahnsou. Pwuhken Wiewia irelaud 12 sohte koasoiahte duwen mehlahn wahnpoaron men oh pil emen wahnpoaron me pitsang nan imweteng. Ahpw met padahkihong kitail duwen Siohwa oh dahme e ketin wia pwehn irehdi Sehdan sang eh pahn kasohrehla mwomwohdisohn Kristian oh kauhdi ar doadoahk en kalohk. Sehdan sohte pweida, oh mehmen me songosong en kauhdi doadoahk en kalohk pil sohte pahn pweida. (Ais. 54:17) Ahpw irail akan me pilada en kaudokiong Siohwa oh idawehn Sises Krais kin wiewia doadoahk ehu me sohte pahn uhdi. Met sou kin kangoangeiuk? Ia uwen eh wia pwais kaselel ehu en sewese lohki “mahsen en Siohwa” rahnpwukat!