Ong me Kin Poakohng Siohwa:

Sises mahsanih: “Kumwail pahn dehdehki dahme mehlel, oh me mehlelo pahn kasaledengkumwailla.” (Sohn 8:32) Ia uwen mahsen pwukat ar kangoange kitail! Ei, kitail kak esehla padahk mehlel mendahki padahk likamw kin rekla nan “imwin rahn akan.” (2 Timoty 3:1) Ke tamataman ahnsou me ke tepin esehla padahk mehlel sang nan Mahsen en Koht? Ia uwen omw perenki met!

E kesempwal kitail en esehla padahk mehlel oh kaukaule ehukihong meteikan. Ahpw atail wiewia kan pil anahne pahrekiong padahk mehlel. Pwehn wia met, kitail anahne dadaurete ni limpoak en Koht. Dahme met kin pidada? Sapwellimen Sises mahsen kan nipwong mwohn eh pwoula sapengala peidek wet. E mahsanihong sapwellime wahnpoaron lelepek kan: “Ma kumwail pahn kapwaiada ei kosonned akan, kumwail pahn poadidiong ei limpoak, duwehte ei kin kapwaiada mahsen en Semei, oh kin poadidiong sapwellime limpoak.”​—Sohn 15:10.

Tehk me Sises kin ketin poadidiong sapwellimen Koht limpoak sang ni eh kin ketin kapwaiada mahsen en Semeo. Kitail pil anahne wia met. Pwehn dadaurete ni limpoak en Koht, kitail anahne kapwaiada padahk mehlel nan atail mour ehuehu rahn. Sises mahsanih ni pwongohte: “Met kumwail eseier padahk mehlel wet; eri, ia uwen amwail peren ma kumwail pahn kapwaiada!”​—Sohn 13:17.

Se koapworopworki me pwuhk wet pahn sewese iuk en usehlahte kapwaiada padahk mehlel nan omw mour oh dadaurete “ni limpoak en Koht, ni amwail kasikasik . . . mour soutuk.”​—Sud 21.