OARITIK KAN
Powehdi Tiahk en Mwadongki Dipwisou en Kaparapar
Mwadongki dipwisou en kaparapar iei tiahk ehu me kin kansensuwedih Koht. Tiahk wet kin kahrehiong emen en medemedewehte en kaitarala eh ineng kan oh kin kasaminehla eh madamadau. Emen me kin wia tiahk wet kak tepida wiahki meteikan ihte elen kaitarala eh ineng en wia nsenen pwopwoud. E kin wiahki nsenen pwopwoud kaidehn kasalepen limpoak nanpwungen riemen ahpw ihte tiahk ehu en ahneki nsenamwahu oh en kihsang eh ineng kan ongete ahnsoukis. Ni mehlel, tiahk wet sohte kak kemehla ineng en paliwar me pid “kamwahl, sarsuwed, [oh] ineng suwed,” ahpw e kin kalaudehla ineng pwukat.—Kolose 3:5.
Wahnpoaron Pohl ntingihdi: “Kitail kamwakeleikitailsang mehkoaros me kin kasaminehla paliwar oh [“elen atail madamadau,” NW] oh kitail song en sarawihla unsek, ni atail pahn kin momour nan atail lemmwiki kupwur en Koht.” (2 Korint 7:1) Ma e kin inenen apwal ong uhk en kapwaiada kaweid wet, ke dehr medewe me solahr omw koapworopwor. Siohwa kin ketin “diren mahk” oh kupwurki sewese iuk. (Melkahka 86:5; Luk 11:9-13) Ni mehlel, omw kin suwedki dahme ke kin wia oh omw kin nannanti ken powehdi tiahk wet mendahki ke kin lohdi ekei ahnsou, kin kasalehda me ke kin ahneki madamadau mwahu. Pil tamataman me “Koht lapalapasang kadeikpen loalatail, oh pein ih kin ketin mwahngih mehkoaros.” (1 Sohn 3:20) Koht kin ketin tehk kaidehn dipatail kante, ahpw e kin ketin tehk soahng koaros duwen kitail. Ihme kahrehda e kin ketin karonge atail peki mahk kan oh kin ketin poakeikitailla. Eri, dehr pwangahki kapakap ong Koht ni karakarahk oh ngidingid, duwehte seri men me kin kohla rehn eh pahpa ni ahnsou me e kin lelohng kahpwal kan. Siohwa pahn ketikihong uhk nsenmwakelekel. (Melkahka 51:1-12, 17; Aiseia 1:18) Ahpw omw wiewia kan anahne pahrekiong audepen omw kapakap kan. Karasepe, ke anahne nantihong liksang kilang kilel suwed kan koaros oh pil werek suwed. *
Ma ke sohte kak kelehpw powehdi tiahk wet, menlau koasoiaiong omw pahpa de nohno me wia Kristian de kompoakepahmw men me kin koahiek oh nsenohkin uhk. *—Lepin Padahk 1:8, 9; 1 Deselonika 5:14; Taitus 2:3-5.
^ par. 2 Pwehn dehr doadoahngki computer ni ahl me sapwung, peneinei tohto kin kihdi computer nan wasa ehu me koaros kak kilang. Ekei peneinei pil kin pwainda soahng kan (software) me kak irehdi soahng suwed kan en dehr pwarada nan computer. Ahpw kitail sohte kak koapworopworki me met kak irehdi soahng suwed koaros.
^ par. 1 Kaweid pwukat kohda me pid ia duwen emen eh kak powehdi tiahk wet: Idingohng pein kowe en medemedewe mehkot tohrohr. (Pilipai 4:8) Dehr kilang soahng kan me kak kamwakid ineng suwed kan. (Melkahka 119:37) Kapakapki “manaman lapalap.” (2 Korint 4:7) Soupisengki doadoahk en Kristian akan.—1 Korint 15:58.
