“I pahn padahkihong uhk ahl me ke pahn weid ie.”​—Melkahka 32:8

Dahme kitail anahne medemedewe ma kitail men pwopwoudida?

• 1 Korint 7:39; 2 Korint 6:14

  E wia elen loalokong en pwoudikihda ihte emen me kin keieu kesempwalki mour en papah Siohwa.

• 1 Korint 7:36

  E pahn keieu mwahu en dehr pwopwoudida lao kitail daulih ahnsowo nan atail mour me ineng en wia nsenen pwopwoud kin keieu kehlail.

• 1 Korint 7:28

  Medemedewe dahme mehlel me pid duwen pwopwoud. Pwopwoud koaros kin ahneki kahpwal kan.

“E sohte konehng aramas menet en kelekelehpw. I pahn wiahiong eh werek en wia sawasepe.”​—Senesis 2:18

Dahme Siohwa kin ketin kasik sang rehn ohl pwopwoud men oh lih pwopwoud men?

• Episos 5:23; 1 Timoty 3:1-7; 5:8

  Ohl pwopwoud men kin tiengla mwowe nan kaudok en peneinei oh e kin apwalih en eh pwoud oh nah seri kan ar anahn ong paliwar oh pepehm. E kin tiengla mwowe pwehn padahki oh kaiahne seri kan.

• Lepin Padahk 31:10-31; Rom 7:2

  Lih pwopwoud men iei kompoakepah mwahu oh iengen eh pwoud. E kin utung en ohlo eh pilipil kan oh kin apwalih soahng kan nan ihmwo. E kin sewese eh pwoud sukuhlih neira seri kan.

• Episos 5:33; Pilipai 2:4

  Ohl oh lih pwopwoud koaros anahne nsenohki laud en emenemen eh nsenamwahu sang pein ah.

“Ira en kin wiahla ehu.”​—Senesis 2:24

Ia duwen atail pwopwoud eh kak kehkehlailte?

• Lepin Padahk 3:5, 6; Madiu 19:6

  Siohwa ketin kupwurki pwopwoud ehu en ahneki koasoandi poatopoat ehu. E ketikihong kitail kaweid keieu mwahu duwen pwopwoud.

• Melkahka 130:3; Kolose 3:13

  Pwopwoud ehu anahne kanengamahiong en emenemen luwet kan. Ira anahne mahkpene nanpwungara oh kilang soahng mwahu kan en emenemen.