5. Ia Duwen Atail Kak Tohrohr Sang Sampah
1 KRISTIAN AKAN KIN LOALOPWOAT ONG WEHIN KOHT
“Ei wehi kaidehn kisehn sampah wet.”—Sohn 18:36
Ia duwen atail kin kasalehda me kitail kin soupoupali oh me kitail kin utung Wehin Koht?
-
Aiseia 2:2-4; Sohn 6:15; 1 Piter 3:15
Kitail sohte kin pei nan mahwen oh iang pidada palien politik kan.
-
Eksodus 20:4, 5; 1 Sohn 5:21
Kitail sohte kin kaudokiong kilel en wehi kan. Karasepe, kitail sohte kin kawauwih pilaik.
-
Tiahk lemei kin ihte kalaudehla lemei. Kitail awiawihete Siohwa pwehn ketikihsang kahpwal akan en sampah wet kohkohlahte.
-
Sohn 13:34, 35; 1 Sohn 3:10-12
Iengatail tohnkaudok kan koaros, sohte lipilipil mehnia wehi de keinek me re kohsang ie, de mwomwen arail tikida, irail wia riatail. Kitail soh mwahn pahn peipene nanpwungatail.
2 KRISTIAN AKAN “KAIDEHN KISEHN SAMPAH”
“Irail kaidehn kisehn sampah, duwehte ngehi me kaidehn kisehn sampah.”—Sohn 17:16
Dahme kahrehda kitail anahne tohrohr sang en Sehdan sampah?
-
“Sampah” kin dokedoke aramas akan me sehse Koht oh me kin mi pahn manaman en kaunen sampah wet, Sehdan.
-
Kitail men Siohwa en ketin kilangwohng kitail nin duwen kompoakepah kan. Kitail kin kahlemengih Siohwa oh Sises sang ni atail madamadau, lokaia, oh wiewia kan.
3 KRISTIAN AKAN KIN SOIKALA MADAMADAU EN SAMPAH
“Kanahieng omw madamadau.”—Lepin Padahk 4:23
Ia wehwehn pelianda madamadau kan sang en Sehdan sampah?
-
Sehdan kin roporop ong pein ih, aklapalap, oh kin pelian. E kin mwahuki aramas akan ren kamehlele me re sohte anahne peikiong Koht.
-
Sang ni dahme kitail kin nda oh wia, kitail kin kasalehda me kitail kaidehn kisehn sampah. Kitail pil kin kasalehda met ni soahng kan me pid pein atail pilipil kan.
-
Pwehn pelianda madamadau sang en Sehdan sampah, kitail anahne kin karanihte Siohwa oh audehkihda atail madamadau sapwellime madamadau kan.
4 MWOHNI SOHTE KIN KIHONG KITAIL MEHN PEREPE POATOPOAT DE MADAMADAU EN POPOHL
“Mehnda ma emen pil ahneki soahng tohto, eh mour sohte kin kohsang soahng kan me e ahneki.”—Luk 12:15
Dahme pahn sewese kitail en ahneki sapwellimen Siohwa madamadau me pid kepwe kan?
-
Wiewia 20:35; 1 Timoty 6:9, 10
Sehdan men kitail en kamehlele me mehn kamweit kan oh kepwehpwe pahn kahrehiong kitail en peren. Ahpw Sises ketin padahkihong kitail me peren kin kohsang atail ahneki nanpwungmwahu rehn Koht oh pil sang ni atail kin kihong meteikan.
-
Madiu 6:31, 32; Mark 12:30, 31; Luk 21:34-36
Ni atail kin medemedewehte papah Siohwa, atail mour pahn uhdahn mie katepe. Kitail kak nsenamwahuki atail mour oh popohl pahn mi loalatail.
