“Kumwail koaros me weuwa dipwisoun Tehnpas Sarawio kan. . . . Kumwail pein kamwakeleikumwailda.”​—Aiseia 52:11

Ia duwen atail pahn kolokolete atail kaudok en min?

• 1 Korint 10:21; Seims 1:27

  Kitail kin soikala tiahk en sahpw kan oh padahk kan me pidada kaudok likamw.

• Lipai 11:44; Malakai 3:6

  Ahnsou koaros Siohwa kin ketin pere sapwellime aramas akan sang ni eh kin ketikihong irail kosonned kan oh ketin padahkihong irail ire mehlel kan.

“Kitail kamwakeleikitailsang mehkoaros me kin kasaminehla paliwar oh elen madamadau.”​—2 Korint 7:1

Soangen tiahk dahkei me Siohwa ketin kupwurki kitail en dehr wia?

• Madiu 22:39; Wiewia 17:25; Taitus 3:1

  Kitail dehr wia soahng kan me pahn kauwehla paliwaratail de kamwotehla atail mour, me duwehte simoak de kang sakau daulihala de ale wini en kasahliel kan. Kitail sohte kin wia soangen tiahk pwukat pwehki kitail kin wauneki atail mour, mouren meteikan, oh kosonned en sahpw me kitail kin mi ie.

• Rom 7:21-25

  Mehnda ma kitail kin songosong en sohla wia tiahk suwed ehu, kitail en dehr pwangada. Sang ni sapwellimen Siohwa sawas, kitail kak powehdi met.

“I kin kaloke paliwereiet oh kaunda duwehte lidu men.”—​1 Korint 9:27

Dahme kak sewese kitail en uhdihsang tiahk suwed ehu?

• Madiu 6:13

  Kapakapki sapwellimen Koht manaman pwehn seweseiuk ken pelianda ineng suwed ehu.

• 1 Piter 4:3, 4

  Dehr patehng aramas akan de kilang kasdo kan de rong koul kan me kin kalaudehla omw apwalki peiong tiahk suwed kan.

• Rom 12:1, 2

  Kaunopada pwe ken kawehwehiong meteikan kahrepen omw pilada en dehr wia mehkot, karasepe, kahrepen omw sohte kin simoak.