Sises sapwellimaniki kompoakepah keren silimen me kin mihmi Pedani. Irail iei Lasarus oh rie lih riemen, Mery oh Marda. Ehu rahno, ni Sises eh ketiket palio Sordan, Mery oh Marda kadaralahng ih rohng karuwaru ehu: ‘Lasarus uhdahn soumwahu. Komw kalahngan oh ketido ni karuwaru!’ Ahpw Sises sohte ketila ni ahnsowohte. E ketin awiheki mahs rahn riau oh mwuri ih eri mahsanihong sapwellime tohnpadahk ko: ‘Kitail kohla Pedani. Lasarus wie memeir, oh I pahn kohla pangenda.’ Wahnpoaron ko eri nda: ‘Ma Lasarus wie memeir, met pahn sewese ih en mwahula.’ Eri Sises mahsanihong irail ni sansal: ‘Lasarus melahr.’

Ni ahnsou me Sises lella Pedani, Lasarus seridier erein rahn pahieu. Pokon en aramas ekei kin kohdo oh kansenamwahwih Marda oh Mery. Ni ahnsou me Marda rongada me Sises ketidohr, e tangala pwehn tuhwong ih. E nda: “Maing ei Kaun, ma komw ketikette met, riei ohlo sohte pahn mehla.” Sises eri mahsanihong ih: ‘Riomw ohlo pahn pwurehng mourda. Marda, ke kamehlele met?’ Marda eri nda: ‘I kamehlele me e pahn pwurehng mourda ni rahnen kaiasadao.’ Sises eri mahsanihong ih: “Ngehi me mour sapahl oh Sounkomour.”

Marda eri kohla rehn Mery oh ndaiong ih: ‘Sises leledohr.’ Mery eri tangeieila rehn Sises, oh pokono pil pwakihala. E poaridiong ni aluweluwe kan, oh wie sengiseng. Ih eri nda: ‘Maing, ma komw ketikette met, riei ohlo pahn momourte!’ Sises eri mahsanihada uwen Mery eh wie lokolok, oh met kahrehiong ih en pil tepida tentenihr. Ni pokono ar kilangada eh wie tentenihr, irail nda: ‘Ia uwen Sises eh poakohng Lasarus.’ Ahpw ekei medewe: ‘Dahme kahrehda e sohte doarehla kompoakepaho?’ Dahme Sises pahn ketin wia mwurin met?

Sises eri ketila ni sousowo, wasa me lapalahn takai ehu perehla ewen pwoaro. Ih eri ketin ruwese irail, mahsanih: ‘Katapwurehsang takaien.’ Marda eri nda: ‘E rahnehr pahieu! Paliwereo pahn pwohsuwedlahr.’ Ahpw, irail katapwurehsang takaio, oh Sises kapakap, mahsanih: ‘Semei, kalahngan en komwi pwehki omwi ketin karongeiehier. I ese me komw kin ketin ahnsou koaros karonge ie, ahpw  I pato ni ngihl laud pwe aramas pwukat en ese me komwi me ketin kadariehdo.’ Ih eri ketin ngihl laudida, mahsanih: “Lasarus, pedoido!” Mehkot kapwuriamwei ehu ahpw wiawi: Lasarus pedoidohsang nan sousowo, kidikidkipene likoun nan sousou. Sises eri mahsanih: “Kumwail sapwadada ohlen oh kasaladakala.”

Me tohto me iang kilang met pwosonla Sises. Ahpw ekei kohla oh ndaiong Parisi ko. Sangete ahnsowo kohla, Parisi ko kin men kemehla Lasarus oh pil Sises. Emen rehn wahnpoaron 12 ko, Sudas Iskariot, kohla rehn Parisi ko ni rir oh idek rehrail: ‘Ia uwen pweinen amwail pahn pwain ie ma I pahn sewese kumwail rapahkihda Sises?’ Irail eri pwungkihda me re pahn pwainki mwohni silper 30, Sudas eri tepida rapahki ahnsou mwahu en pangala Sises rehn Parisi ko.