Wahnpoaron ko kapwaiada sapwellimen Sises kehkehliko en kihpeseng rongamwahwo nan sampah pwon. Nan pahr 47, Kristian kan nan Andiok kadarala Pohl oh Parnapas en wia seiloak en misineri. Sounkalohk ngoang riemen pwukat seiloakseli nan Asia Minor nan wasa kan me duwehte Derpe, Listra, oh Aikoniomw.

Pohl oh Parnapas kin kalohk ong aramas koaros, mehnda ma kepwehpwe de semwehmwe, pwulopwul de mah. Aramas tohto kin pwungki padahk mehlel duwen Krais. Ni ahnsou me Pohl oh Parnapas kalohk ong kepinahn Saiprus Serkius Paulus, sounwia manaman men kin song en kauhdi ira. Pohl ndaiong sounwia manamano: ‘Siohwa sohte kupwurkin uhk.’ Ni ahnsowohte, sounwia manamano pa maskunla. Ni Kepina Paulus eh kilangada met e ahpw pwosonla.

Pohl oh Parnapas kin kalohk wasa koaros, ihmw lel ihmw, nan wasahn netinet kan, nanial akan, oh pil nan sinakoke kan. Ni ahnsou me ira kamwahwihala ohl mwoator men nan Listra, aramas ako me kilang manaman wet medewehiong me ira koht kei oh irail song en kaudokiong ira. Ahpw Pohl oh Parnapas kauhiraildi oh nda: ‘Kumwail kaudokiong Koht kelehpw! Kiht aramas ekei.’ Mehn Suhs kei ahpw kohdo oh kahrehiong pokono ren uhwongada Pohl. Pokono katehki Pohl takai, wurahdekieilahng likin kahnimwo, oh kihdiong wasao pwehn mehla. Ahpw, Pohl momourte! Ni ahnsowo, Kristian kei kohdo sewesehda oh wahlongala nan kahnimwo. Mwuhr, Pohl pwurala Andiok.

Nan pahr 49, Pohl pil pwurehng wia seiloak en misineri. Mwurin eh pwurodohsang eh mwemweit rehn Kristian kan nan Asia Minor, e pil wahla rongamwahwo wasa me doh, nan Iurop. E kohla Adens, Episos,  Pilipai, Deselonika, oh pil wasa teikan. Sailas, Luk oh mwahnakapw Timoty iang Pohl seiloak. Irail doadoahkpene pwehn wiahda mwomwohdiso kan oh sewese ren kehlailla. Pohl pil mihmihki nan Korint sounpar ehu elep oh sewese kakehlailih Kristian ko wasao. E kin kalohk, padahk, oh ntingihada kisinlikou kan ong mwomwohdiso tohto. E kin momourki doadoahk en wiahda ihmw likou. Kedekedeo, Pohl pwuralahng Andiok.

Mwuhr, nan pahr 52, Pohl wia kesiluhn eh seiloak en misineri, tepida sang Asia Minor. Uwen doh en eh seiloakla paliepeng e lella Pilipai oh kohdihla Korint. Pohl mihmihki Episos sounpar kei oh kin wie padapadahk, kamwakamwahwihala me soumwahu kan, oh sewese mwomwohdiso. E pil kin wia padahk ong wehi pokon rahn koaros nan imwen kapahrek ehu. Aramas tohto rong oh wekidala arail wiewia kan. Pohl eri kohla Serusalem, mwurin eh kalokalohki rongamwahwo nan sahpw tohto.