Kesiluhn en Pohl seiloak en misineri imwisekla nan Serusalem. E selidi wasao oh lekdekiong nan imweteng. Nan kasansal ehu nipwongo, Sises mahsanihong Pohl: ‘Ke pahn kohla Rom oh kalohk wasao.’ Pohl eri wisiksang Serusalem kolahng Sesaria, wasa me e mihmihki nan imweteng erein sounpar riau. Ni ahnsou me e ale kopwung rehn Kepina Pestus, Pohl ndaiong: ‘Mweidohng ie en ale kopwung rehn Sihsar, nan Rom.’ Pestus eri nda: “Ke peki kopwung sapahl rehn Sihsar; eri, ke pahn kohla reh.” Irail eri kihong Pohl nan sohp ehu me pahn kolahng Rom, oh Kristian ohl riemen me iangih, Luk oh Aristarkus.

Lapalahn melimel ehu pa koanoairaildi nansedo, oh met wiewiawihki rahn kei. Koaros me iang sohpo medewe me irail pahn mehla. Ahpw Pohl nda: ‘Ohl oko, tohnleng men mahsanihong ie nan ouraman ehu: “Pohl, ke dehr masepwehk. Ke pahn kohla Rom, oh koaros me iang uhk mi nan sohpen pahn mourla.” Kumwail koapworopwor! Kitail sohte pahn mehla.’

Melimelo wiewiawihki rahn 14 oh e uhdahn kehlail. Kedekedeo, irail kilangada sahpw ehu. Iei dekehn Malda. Sohpo eri serada oh pwalpeseng, ahpw aramas 276 ko koaros nan sohpo pitila oh lella pohn sahpwo. Ekei irail papolong oh ekei dakehda dinapw akan de kisehn sohpo oh peipei kohlongala ni oaroahro. Aramas akan nan Malda apwalih irail oh wiahda kisiniei ehu pwehn kakarakare irail.

Mwurin sounpwong siluh, sounpei ko wahla Pohl nan Rom nan ehu sohp tohrohr. Ni ahnsou me e lella mwo, Kristian en wasao ahpw kohdo tuhwong ih. Ni Pohl eh kilangirailda, e kapingkalahngankihong Siohwa oh kehlailda. Mendahki Pohl selidi, e pil mweimwei en mihmi nan ihmw ehu me e kin pwapwain, ahpw mie sounpei me kin sinsile ih. E mihmihki mwo erein sounpar riau. Aramas akan kin kohdo tuhwong ih, oh e kin kalohkihong irail duwen Wehin Koht oh padahkihong irail duwen Sises. Pohl pil ntingihada kisinlikou ong mwomwohdiso kan nan Asia Minor oh Sudia. Siohwa uhdahn ketin doadoahngki Pohl pwehn lohkihpeseng rongamwahwo nan sahpw akan.