1, 2. Dahme Siohwa kupwurki ong peneinei kan?

SIOHWA KOHT me ketin wiahda keieun kapwopwoud. Paipel padahkihong kitail me e ketin wiahda tepin lih oh “kahredohng aramaso [“ohlo,” NW].” Adam uhdahn perenkihda me kahrehiong ih en nda: “Iei met emen me rasehng iehte​—tih me sang tih kat, oh uduk sang ni udukei.” (Senesis 2:22, 23) Met padahkihong kitail me Siohwa kupwurki pwopwoud kan en kin nsenamwahu.

² Kansensuwed pwe aramas tohto saikinte ahneki peneinei nsenamwahu. Ahpw, Paipel kin audaudki kaweid oh ire mehlel tohto me pahn sewese tohnpeneinei koaros en wiahiong arail mouren peneinei en pweida oh perenki miniminpene.​—Luk 11:28.

3, 4. (a) Ia pahn mwomwen en ohl pwopwoud men eh wiewia ong eh pwoud? (b) Dahme kahrehda e kesempwal ohl pwopwoud oh lih pwopwoud en kin mahkpene?

³ Paipel mahsanih me ohl pwopwoud mwahu men anahne kasalehiong eh pwoud limpoak oh wahu. Menlau wadek Episos 5:25-29. Ohl pwopwoud men pahn ahnsou koaros kasalehda eh wiewia kan ong eh pwoud ni limpoak. E pahn pil pere ih, apwalih, oh sohte wia mehkot me pahn kamedekihala.

⁴ Ahpw dahme ohl pwopwoud men anahne wia ni eh pwoud wiahda sapwung kan? Kaweid ong  ohl pwopwoud kan: “Kumwail en poakohng amwail pwoud kan, oh dehr lemeiong irail.” (Kolose 3:19) Ohl pwopwoud kan, tamataman me ke pil kin wiahda sapwung kan. Oh ma ke men Koht en ketin mahkohng uhk, ke pahn anahne mahkohng omw pwoud. (Madiu 6:12, 14, 15) Ni ahnsou me ohl pwopwoud oh lih pwopwoud kin men kasalehda mahk, e pahn sewese ira en ahneki nsenamwahu nan ara pwopwoud.

5. Dahme kahrehda ohl pwopwoud men anahne wauneki eh pwoud?

⁵ Siohwa ketin kasik ohl pwopwoud men en wauneki eh pwoud. Ohl pwopwoud men anahne medemedewe mwahu duwen anahn akan en eh pwoud. Met wia ire kesempwal ehu. Ma ohl pwopwoud men sohte kin apwalih mwahu eh pwoud, ele Siohwa sohte pahn ketin karonge eh kapakap kan. (1 Piter 3:7) Aramas kin kenikenla rehn Siohwa pwehki ar poakohng ih. E sohte kin ketin kesempwalki ohl laudsang lih.

6. Ia wehwehn ohl pwopwoud men oh lih pwopwoud men en wiahla “warteieu”?

⁶ Sises ketin kawehwehda me ohl pwopwoud men oh lih pwopwoud men “solahr wia riemen, pwe warteieu.” (Madiu 19:6) Ira kin loalopwoatohng emenemen oh sohte pahn salelepek ong emenemen. (Lepin Padahk 5:15-21; Ipru 13:4) Ohl pwopwoud kan oh lih pwopwoud kan en kin ni soh roporop kaitarala ara anahn en wia nsenen pwopwoud. (1 Korint 7:3-5) Ohl pwopwoud men anahne tamataman me “sohte me kin kailongki pein paliwere. Pwe e kin kamwenge oh kanai.” Eri e anahne poakohng oh kanai eh pwoud. Me keieu kesempwal rehn lih pwopwoud men iei eh pwoud en kadek oh poakohng ih.​—Episos 5:29.

7. Dahme kahrehda peneinei ehu kin anahne emen tapwi?

⁷ Peneinei koaros anahne emen tapwi, emen me pahn kin kaweid peneineio pwe koaros en kak doadoahkpene ni minimin. Paipel mahsanih nan 1 Korint 11:3: “Duwen Krais eh tapwin aramas koaros, duwen ohl pwopwoud eh moangen eh pwoud, oh duwen Koht eh tapwin Krais.”

8. Ia duwen lih pwopwoud men eh kak kasalehda eh wauneki mehlel eh pwoud?

⁸ Ohl pwopwoud koaros kin wiahda sapwung kan. Ahpw ni ahnsou me lih pwopwoud men kin utung ahn eh pwoudo eh pilipil kan oh perenki sewese, peneineio pwon pahn paiekihda. (1 Piter 3:1-6) Paipel mahsanih: “Lih pwopwoud en wauneki eh pwoud.” (Episos 5:33) Ia duwen ma ohl pwopwoud men sohte kin iang en liho eh pwoson? Liho pil anahnehte kin wauneki mehlel eh pwoudo. Paipel mahsanih: “Kumwail lih pwopwoud  kan, kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail, pwe re pahn pein kilang amwail mour mwakelekel oh duwen amwail wauneki Koht.” (1 Piter 3:1, 2) En lih pwopwoud men eh kahlemeng mwahu kak sewese eh pwoudo en wehwehki oh wauneki dahme liho pwoson.

9. (a) Dahme lih pwopwoud men anahne wia ni ahnsou me e sapwungki pilipil en eh pwoud? (b) Ia kaweid me kohwong lih pwopwoud kan nan Taitus 2:4, 5?

⁹ Dahme lih pwopwoud men kak wia ni ahnsou me e sapwungki pilipil en eh pwoud? E pahn kin kasalehda eh madamadau ni wahu. Karasepe, Sara koasoiahda mehkot me Eipraam sohte mwahuki, ahpw Siohwa mahsaniong Eipraam: “Kapwaiada mehkoaros me Sara pahn ndawei.” (Senesis 21:9-12) Pali laud en ahnsou ahn ohl pwopwoud Kristian men eh pilipil sohte kin kalapw uhwong dahme Paipel mahsanih, kahrehda lih pwopwoud men kin anahne utung eh pwoud. (Wiewia 5:29; Episos 5:24) Lih pwopwoud mwahu men pahn kin apwalih mwahu eh peneinei. (Wadek Taitus 2:4, 5.) Ahnsou me eh pwoudo oh nah seri kan kin kilang uwen eh doadoahk laud ong irail, arail poakohng oh wauneki ih pahn laudla.​—Lepin Padahk 31:10, 28.

10. Dahme Paipel mahsanih duwen tohrohrpeseng oh mweipeseng?

¹⁰ Ekei pak pwopwoud kan kin mwadangete pilada en tohrohrpeseng de mweipeseng. Ahpw, Paipel mahsanih me “lih pwopwoud men sohte pahn mweisang eh pwoud,” oh pil “ohl pwopwoud sohte pahn mweisang eh pwoud.” (1 Korint 7:10, 11) Mie ekei irair kan  me uhdahn apwal me kahrehda pwopwoud kan ele pahn tohrohrpeseng, ahpw pilipil toutou ehu met. A ia duwen mweipeseng? Paipel kasalehda me ihte kahrepe pwung pwehn mweipeseng iei ma ohl pwopwoud men de lih pwopwoud men wiahda nsenen pwopwoud rehn emen me kaidehn eh pwoud.​—Madiu 19:9.

11. Dahme seri kan keieu anahne?

¹¹ Pahpa oh nohno kan, kumwail kihong uwen ahnsou me kumwail kak rehn noumwail seri kan. Noumwail seri kan anahne kumwail, oh me keieu kesempwal  iei re anahne kumwail en padahkihong irail duwen Siohwa.​—Deuderonomi 6:4-9.

12. Dahme pahpa nohno kan anahne wia pwehn pere neirail seri kan?

¹² Ahn Sehdan sampah kin wie susuwedla oh mie aramas akan me kin men mwersuwedih neitail seri kan, pil angkehlailih irail. Ekei pahpa oh nohno kan kin apwalki en koasoia ire wet. Ahpw pahpa nohno kan anahne kaweid neirail seri kan duwen soangen aramas pwukat oh padahkihong neirail seri kan ia duwen ar pahn pereirailsang soangen aramas pwukat. Pahpa nohno kan, kumwail anahne pere noumwail seri kan. *​—1 Piter 5:8.

13. Ia duwen pahpa nohno kan ar pahn kasukuhlih neirail seri kan?

¹³ Pahpa nohno kan me pwukoahki en padahkihong neirail seri kan tiahk mwahu. Ia duwen omw kak kasukuhlih noumw seri kan? Noumw seri kan anahne kaiahn, ahpw en dehr kin kapwungirailla ni ngihl de ahl lemei. (Seremaia 30:11) Dehr panawih noumw seri kan ahnsou me ke lingeringer. Ke sohte men omw koasoi kan en “rasehng kedlahs” oh kamedekeirailla. (Lepin Padahk 12:18) Kasukuhlih noumw seri kan pwe ren wehwehki kahrepen arail en kin peik.​—Episos 6:4; Ipru 12:9-11; menlau kilang Ire kan 30.

14, 15. Dahme kahrehda seri kan anahne peikiong arail pahpa nohno?

¹⁴ Sises kin ketin ahnsou koaros peikiong Semeo, pil ni ahnsou kan me apwal ong ih. (Luk 22:42;  Sohn 8:28, 29) Siohwa pil ketin kasik me seri kan en kin peikiong arail pahpa nohno kan.​—Episos 6:1-3.

¹⁵ Seri kan, mehnda ma kumwail pehm me e apwal en kin peikiong amwail pahpa nohno kan, tamataman me ni ahnsou me kumwail kin peik, Siohwa oh amwail pahpa nohno kin perenki amwail wia met. *​—Lepin Padahk 1:8; 6:20; 23:22-25.

16. (a) Ia duwen Sehdan eh kin song en kasonge me pwulopwul kan en wia dahme suwed? (b) Dahme kahrehda e kesempwal en kin pilada kompoakepah kan me kin poakohng Siohwa?

¹⁶ Tepilo kak doadoahngki kompoakepahmw kan oh me pwulopwul teikan en kin kasongeiuk en wia dahme suwed. E ese me soangen kasongosong wet kin kak uhdahn apwal ong uhk en pelianda. Karasepe, nein Seikop serepein Daina kompoakepahnki irail kan me  sohte poakohng Siohwa. Met kahrehda kahpwal tohto ong ih oh eh peneinei. (Senesis 34:1, 2) Ma kompoakepahmw kan sohte kin poakohng Siohwa, ele irail pahn kasongeiuk en wia mehkot me Siohwa kin ketin kalahdeki, oh met pahn wahdo nsensuwed laud ong uhk, omw peneinei oh ong Koht. (Lepin Padahk 17:21, 25) Ihme kahrehda e inenen kesempwal ken diarada kompoakepahmw kan me kin poakohng Siohwa.​—1 Korint 15:33.

17. Ia pwukoahn emenemen nan peneinei?

¹⁷ Ni ahnsou me tohnpeneinei kan kin idawehn sapwellimen Koht kaweid kan, irail kin soikala kahpwal tohto. Eri ma kowe emen ohl pwopwoud, a ken poakohng omw pwoud oh kasalehda omw limpoak ni omw wiewia kan. Ma kowe lih pwopwoud men, a ken kasalehda wahu oh uhpah omw pwoud oh alasang mehn kahlemeng en lih pwopwoud me kawehwehpe mie nan Lepin Padahk 31:10-31. Ma kowe pahpa men de nohno men, a ken padahkihong noumw seri kan en poakohng Koht. (Lepin Padahk 22:6) Ma kowe pahpa men, a ken kaweid omw peneinei ni omw “apwahpwalih mwahu.” (1 Timoty 3:4, 5; 5:8) Oh seri kan, peikiong amwail pahpa nohno. (Kolose 3:20) Tamataman me emenemen tohnpeneinei kin kak wiahda sapwung kan, ihme kahrehda kumwail en kin aktikitik oh peki mahkpene nanpwungamwail. Ei, Paipel audaudki sapwellimen Siohwa kaweid ong emenemen nan peneinei.