1, 2. Ihs ekei irail me wia kompoakepahn Siohwa?

IHS me ke men en wia kompoakepahmw? Emen me ke kin pwungki. Emen me ke kin ehuiong oh e kin miniminiong uhk. E wia aramas kadek men oh ahneki irair kan me ke kin pwungki.

² Siohwa Koht ketin pilada aramas ekei en wia kompoakepah. Karasepe, Eipraam iei emen kompoakepahn Siohwa. (Aiseia 41:8; Seims 2:23) Siohwa pil ketin kupwurperenki Depit. E mahsanih me Depit iei ‘soangen ohl me e kupwurki.’ (Wiewia 13:22) Oh soukohp Daniel pil wia emen me Siohwa kin ketin ‘loalloale.’​—Daniel 9:23.

3. Dahme kahrehda Eipraam, Depit, oh Daniel wia kompoakepahn Siohwa?

³ Ia duwen Eipraam, Depit, oh Daniel ar wiahla kompoakepahn Siohwa? Siohwa mahsanihong Eipraam: “Pwehki omw kapwaiadahr ei mahseno.” (Senesis 22:18) Siohwa kin ketin wiahla kompoakepahn irail kan me kin ni karakarahk peikihong ih. Pil wehi ehu pwon kak wiahla kompoakepah. Siohwa ketin kawehwehiong wehin Israel: ‘Peikiong ie, pwe I en wiahla amwail Koht oh kumwail en wiahla nei aramas.’ (Seremaia 7:23) Eri ke pil anahne peikihong Siohwa ma ke uhdahn men wiahla kompoakepah.

4, 5. Ia duwen Siohwa eh kin ketin pere kompoakepah kan?

⁴ Paipel mahsanih me Siohwa kin ketin raparapahki ahl akan “pwehn ketin kakehlahda irail kan me arail mohngiong kin loalopwoatohng ih.” (2 Kronikel 16:9) Siohwa ketin inoukihong kompoakepah kan nan Melkahka 32:8: “I pahn padahkihong uhk ahl me ke pahn weid ie; I pahn kaweid uhk oh panawihiuk.”

⁵ Imwintihti kehlail men kin men kauhkitaildihsang en wiahla kompoakepahn Koht. Ahpw Siohwa kupwurki pere kitail. (Wadek Melkahka 55:22.) Nin duwen kompoakepahn Siohwa kei, kitail kin papah ih sang atail mohngiong unsek. Kitail kin loalopwoatohng ih pil ni ahnsou apwal akan. Oh kitail pil kin ahneki likilikohte me sounmelkahkao ahneki. E ntingihedi duwen Siohwa: “E kin ketiket limwahi, oh sohte mehkot kak kauweiehla.” (Melkahka 16:8; 63:8) Ia duwen Sehdan eh kin song en kauhkitaildihsang en wiahla kompoakepahn Koht?

6. Dahme Sehdan akupwungki duwen aramas akan?

⁶ Nan Irelaud 11 kitail sukuhlkier me Sehdan uhwongada Siohwa oh karaunehki me e likamw oh sohte kin pahrek ni eh sohte ketin mweidohng Adam oh Ihp en pein pilada ong ira dahme pwung oh dahme sapwung. Pwuhken Sohp nan Paipel padahkihong kitail me Sehdan pil kin karaune aramas  akan me kin men wiahla kompoakepahn Koht. Sehdan akupwungki me aramas akan kin papah Koht pwehki dahme re kak alehsang reh, kaidehn pwehki ar poakohng Ih. Sehdan pil kose me e kak kahrehiong aramas sohte lipilipil en uhwong Koht. Kitail tehk dahme kitail kak sukuhlkihsang Sohp oh ia duwen Siohwa eh ketin pere ih.

7, 8. (a) Ia sapwellimen Siohwa pepehm duwen Sohp? (b) Dahme Sehdan ndahki duwen Sohp?

⁷ Ihs Sohp? Ih ohl mwahu men me momour mpen sounpar 3,600 samwalahro. Siohwa mahsanih me ni ahnsowo sohte aramas emen nin sampah me duwehte ih. Sohp uhdahn kin wauneki mehlel Koht, oh e kin kailongki dahme suwed. (Sohp 1:8) Ei, Sohp wia kompoakepahn Siohwa mehlel men.

⁸ Sehdan akupwungki me Sohp kin papah Koht pwehki e kin raparapahkihte kamwahupe. Sehdan patohwanohng Siohwa: “Komw ketin silehdier ih oh eh peneinei oh pil mehkoaros me e ahneki. Komw pil kin ketin kupwuramwahwih mehkoaros me e kin wia, oh sapweo direkilahr kou me komw ketikihong. Ahpw ma komw pahn ketikihsang mehkoaros me e ahneki-e pahn lahlahwei komwi mwohn silangomwi.”​—Sohp 1:10, 11.

9. Dahme Siohwa ketin mweidohng Sehdan en wia?

⁹ Sehdan karaunehki Sohp me e kin papah Siohwa ihte pwehn ale dahme e kak alehsang reh. Sehdan pil akupwungki me e kak kauhdihsang Sohp en papah Siohwa. Siohwa sohte ketin pwungki dahme Sehdan kose, ahpw E ketin mweidohng Sehdan  en kasonge ma mehlel Sohp wia kompoakepahn Siohwa pwehki e poakohng Ih.

10. Ia duwen Sehdan eh kaloke Sohp? Ia duwen Sohp eh mwekidki met?

¹⁰ Keieu, Sehdan pirapahla de kemehla nein Sohp mahn akan koaros. Mwuri Sehdan kemehla pali laud en nein Sohp ladu kan. Soahng koaros me Sohp ahneki sohrala. Ni kaimwiseklahn kalokolok ko, Sehdan kemehkihla melimel ieu nein Sohp seri ehk ko. Ahpw Sohp loalopwoatohngete Siohwa. “Ni mehkoaros me wiawiher, Sohp sohte dipikihda eh lahlahwehki Koht.”​—Sohp 1:12-19, 22.

11. (a) Dahme Sehdan pil wiahiong Sohp? (b) Ia duwen Sohp eh mwekidki met?

¹¹ Sehdan sohte uhdi. E uhwongada Koht ni eh nda: “Kauwehla paliwere​—eri e pahn lahlahwei komwi mwohn silangomwi!” Eri Sehdan kalokehki Sohp soumwahu laud ehu me inenen kamedek. (Sohp 2:5, 7) Pwurehng, Sohp loalopwoatohngete Siohwa, “nan apwal pwukat koaros Sohp sohte mwahn lahlahwekihla Koht.”​—Sohp 2:10.

12. Ia duwen Sohp eh kadehdehda me Sehdan wia sounlikamw men?

¹² Sohp sehse douluhl duwen akupwung me Sehdan wiahda de ia kahrepen eh lelohng lokolok laud. E medewe me Siohwa me kin ketin kahrehda eh kahpwal kan. (Sohp 6:4; 16:11-14) Ahpw mendahki met, Sohp loalopwoatohngete Siohwa. Eri sohte me kak peikasalki met. Sohp sohte kin roporop ong pein ih.  E wia kompoakepahn Koht pwehki e poakohng Ih. Ahn Sehdan karaun koaros likamw!

13. Ia imwilahn ahn Sohp loalopwoat?

¹³ Mendahki Sohp sohte wehwehki dahme wiewiawi nanleng, e loalopwoatohngete Koht oh kadehdehda me Sehdan mwersuwed. Siohwa ketin katingih Sohp pwehki eh wia kompoakepah me loalopwoat.​—Sohp 42:12-17.

14, 15. Dahme Sehdan kin karaunehki ohl oh lih koaros?

¹⁴ Ke kak sukuhlki ire kesempwal kan sang dahme wiawihong Sohp. Rahnwet, Sehdan kin karaunehki kitail me kitail kin papah Siohwa ihte pwehn ale dahme kitail kak alehsang reh. Nan Sohp 2:4 Sehdan akupwungki: “Aramas kin mweidala mehkoaros me e ahneki pwe en doarehla pein eh mour.” Eri Sehdan akupwungki me ohl oh lih koaros kin roporop ong pein irail, kaidehn Sohp kelehpw me e ndinda. Sounpar epwiki kei mwurin Sohp eh mehla, Sehdan kin wiewiahte eh kin lahlahwe Siohwa oh akpwungiong sapwellime ladu kan. Karasepe, kitail wadek nan Lepin Padahk 27:11: “Samwa, ke en loalokongla, I ahpw pahn kin pereperen; e pahn mie ei pasapeng ong mehmen me pahn kauwei ie.”

¹⁵ Ke kak pilada en peikihong Siohwa oh wia kompoakepah me loalopwoat, kasansalehda me Sehdan iei sounlikamw men. Mehnda ma ke anahne wiahda wekidekla laud kan nan omw mour  pwehn wiahla kompoakepahn Koht, omw wiahda met iei pilipil me keieu mwahu! Pilipil wet inenen kesempwal. Sehdan kose me ke sohte pahn loalopwoatohng Koht ni ahnsou me mie omw kahpwal akan. E kin song en pitih kitail en dehr loalopwoatohng Koht. Ia duwen?

16. (a) Wiepe dah kan me Sehdan kin doadoahngki pwehn song en kauhdi aramas akan sang papah Siohwa? (b) Ia duwen Tepilo eh kakete song en kauhiukedihsang papah Siohwa?

¹⁶ Sehdan kin doadoahngki wiepe tohto pwehn song kauhkitaildihsang en wiahla kompoakepahn Koht. E kin pei duwehte “laion emen me kin weriwer, raparapahki ihs me e pahn kadallehla.” (1 Piter 5:8) Dehr pwuriamweiki ni ahnsou me kompoakepahmw kan, tohn omw peneinei, de meteikan song en kauhiukedihsang onop Paipel oh wia dahme pwung. Ele ke pahn pehm me mie me mahmahweniong uhk. * (Sohn 15:19, 20) Sehdan pil kin kawekala pein ih ni mwomwen “tohnleng en marain.” Eri e pahn kakete song en pitih kitail pwehn sapeikiong Siohwa. (2 Korint 11:14) Pil ehu wiepe me Sehdan kin doadoahngki pwehn song kauhkitaildihsang papah Siohwa iei en kahrehiong kitail en medewe me kitail sohte pahn warohng papah Koht.​—Lepin Padahk 24:10.

17. Dahme kahrehda kitail kin peikiong Siohwa?

¹⁷ Ni ahnsou me kitail kin peikiong Siohwa, kitail kin kadehdehda me Sehdan iei sounlikamw men. Dahme pahn sewese kitail en kin peik? Paipel mahsanih: “Ke en poakohng KAUN-O omw Koht sang nan mohngiongomw unsek, [“ni omw mour unsek,” NW] oh ni omw kehl koaros.” (Deuderonomi 6:5) Kitail kin peikiong Siohwa pwehki kitail poakohng ih. Ni atail poakohng Siohwa eh kin kekeirda, kitail pahn men wia soahng koaros me e mahsanihong kitail en wia. Wahnpoaron Sohn ntingihedi: “Iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.”​—1 Sohn 5:3.

18, 19. (a) Ia ekei soahng kan me Siohwa mahsanihong kitail me soahng pwukat sapwung? (b) Ia duwen atail ese me Siohwa sohte kin mahsanihong kitail en wia mehkot me kitail sohte kak wia?

 ¹⁸ Ahpw ia ekei soahng kan me Siohwa mahsanihong kitail me soahng pwukat sapwung? Mie ekei karasepe kan nan koakon me oaralape “ Kailongki Dahme Siohwa Kalahdeki.” Nin tapio, ele ke leme me ekei soahng pwukat sohte nohn suwed. Ahpw ni omw kin wadek iren Paipel kan oh doudouloale ni keneinei, ke pahn wehwehkihda kamwahupen en kin peikiong sapwellimen Siohwa kosonned kan. Ele ke pahn pil pehm me ke anahne wiahda wekidekla kei nan omw mour. Mendahki ma ele ekei pak e pahn apwal, ma ke wiahda wekidekla pwukat, ke pahn alehdi popohl oh nsenamwahu me kin kohsang omw wia kompoakepahn  Koht me loalopwoat. (Aiseia 48:17, 18) Ia duwen atail ese me kitail kak wiahda wekidekla pwukat?

¹⁹ Siohwa sohte kin mahsanihong kitail en wia soahng sohte lipilipil me kitail sohte kak wia. (Deuderonomi 30:11-14) Nin duwen Kompoakepatail mehlel men, e ketin mwahngih kitail mwahusang atail ese pein kitail. E mwahngih atail koahiek kan oh atail luwet akan. (Melkahka 103:14) Wahnpoaron Pohl kangoangehkin kitail: “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” (1 Korint 10:13) Kitail kak likih me Siohwa pahn ahnsou koaros ketikihdohng kitail kehl en wia dahme pwung. E pahn ketikihong uhk “manaman lapalap” pwehn seweseiuk en dadaurete irair apwal akan.​—2 Korint 4:7.

20. Irair dah kan me ke anahne kahlemengih, oh dahme kahrehda?

²⁰ Ma kitail men wia kompoakepahn Siohwa, kitail anahne uhdihsang wia soahng kan me Siohwa mahsanihong kitail me sapwung, ahpw kitail anahne wia laudsang. (Rom 12:9) Kompoakepahn Koht kan kin poakohng dahme e kin ketin poakohng. Soangen aramas pwukat sansalda nan Melkahka 15:1-5. (Wadek.) Kompoakepahn Siohwa kan kin  kahlemengih sapwellime irair kan oh kasalehda “limpoak, peren, popohl, kanengamah, kadek, loalopwoat, opampap, oh liksang me suwed.”​—Kalesia 5:22, 23.

21. Ia duwen omw kak sukuhlki en kasalehda irair kan me Koht kin ketin poakohng?

²¹ Ia duwen omw kak sukuhlki kasalehda irair kaselel pwuko? Ke anahne sukuhlki dahme Siohwa ketin poakohng sang ni omw pahn kaukaule wadek oh onopki Paipel. (Aiseia 30:20, 21) Ni omw pahn wia met, omw limpoakohng Siohwa pahn kekeirda, oh ni omw limpoakohng ih eh pahn kekeirda, ke pahn men peikiong ih.

22. Ma ke peikiong Siohwa, ia pahn imwilahn met?

²² Wekidekla kan me ke ele pahn anahne wia nan omw mour kak duwehte omw kin kihsang likou mering oh pwuhriong nan likou me kapw. Paipel mahsanih me ke anahne ‘pwilikihdi mour mering en mahso’ oh pwuhriong nan “likoun mour kapw.” (Kolose 3:9, 10) Ni ahnsou me kitail wiahda wekidekla kan oh peikiong Siohwa, mendahki met ele sohte mengei en wia, e ketin inoukihda me e pahn ketikihong kitail ketingpe me laud. (Melkahka 19:11) Eri pilada en peikiong Siohwa oh kadehdehda me Sehdan iei sounlikamw men. Papah Siohwa, kaidehn pwehki ken ale ketingpomw ni ahnsou kohkohdo, ahpw pwehki sang limpoak ehu me sohte kin raparapahkihte kamwahupe. Eri ke ahpw pahn wiahla kompoakepah mehlel en Koht!