1. Ia sapwellimen Koht koasoandi ong sampah?

SAPWELLIMEN Koht koasoandi ong sampah wia mehkot kaselel. Siohwa kupwurki sampah en direkihla aramas akan me peren oh ahneki roson mwahu. Paipel mahsanih me “KAUN-O Koht eri ketin wiahda mwetuwel ehu . . . me adaneki Ihden” oh e ketin “kakairada soangen tuhke kaselel koaros oh soangen tuhke me wah kan kin mwahu ong tungoal.” Mwurin Koht eh ketin kapikada tepin ohl oh lih, Adam oh Ihp, E ketikihdiong ira nan wasa kaselel wet oh mahsanihong ira: “Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros.” (Senesis 1:28; 2:8, 9, 15) Kahrehda iei koasoandi en Koht me tohnsampah en naineki seri kan, kalaudehla irepen mwetuwelo ong wasa koaros nan sampah oh apwahpwalih mahn akan.

2. (a) Ia duwen atail ese me sapwellimen Koht koasoandi ong sampah pahn pweida? (b) Nin duwen me Paipel mahsanih, soangen aramas dah kan pahn momour kohkohlahte?

² Ke leme me sapwellimen Siohwa Koht koasoandi ong aramas akan en kousoanla nan paradais sampah pahn kak pweida? Koht mahsanih: “Ngehi me mahmahsen; eri, e pahn pweida.” (Aiseia 46:9-11; 55:11) Ei, dahme Koht ketin  koasoanehdi, e uhdahn pahn ketin kapwaiada! E mahsanih me e “sohte ketin wiahda [sampah] ni mwomwen sapwtehn ehu, ahpw ni mwomwen wasa mwahu ong aramas en kousoan ie.” (Aiseia 45:18) Soangen aramas dah me Koht kupwurki en kousoanla nan sampah? Ia uwen werei me e kupwurki irail en koukousoan wasa kiset? Paipel sapengki: “Me pwung kan pahn koukousoan nan sahpwo oh re pahn sapwenikihla kohkohlahte.”​—Melkahka 37:29; Kaudiahl 21:3, 4.

3. Irair kapahtou dah kei me mie pohn sampah ahnsou wet? Peidek dah kan me met kapwarehda?

³ E dehde mwahu me koasoandi wet saikinte wiawi. Ahnsou wet aramas kin soumwahu oh mehla; irail pil kin pei oh kemehla emenemen. Mehkot sapwung. Koht sohte ketin koasoanehdi me sampah en mi ni mwohmw me kitail kin kilang rahnwet! Dahme wiawi? Dahme kahrehda sapwellimen Koht koasoandi saikinte wiawi? Sohte pwuhken poadopoad ehu me aramas ntingihada pahn kak padahkihong kitail kahrepe, pwehki sapwungala wet tepisang nanleng.

4, 5. (a) Ihs me uhdahn koasoiong Ihp ni eh doadoahngki sineik emen? (b) Ia duwen aramas mwahu oh mehlel men eh kak wiahla sounpirap men?

⁴ Tepin pwuhk en Paipel kasalehda duwen sounpelian Koht emen me pwarada nan mwetuwel en Ihden. E kin adaneki “sineik,” ahpw ih kaidehn mahn emen. Kaimwiseklahn pwuhken Paipel kawehwehda ih nin duwen “me adaneki Tepil de Sehdan, me kin pitipitih sampah pwon.” E pil kin adaneki “serpent en mahso.” (Senesis 3:1; Kaudiahl 12:9) Tohnleng roson menet de ngehn soh sansal menet doadoahngki sineik emen pwehn koasoiong Ihp. E wia met pwe en mwomwen me ngihlo kohsang rehn sineiko. E dehde me tohnleng menet iang mihmi ahnsou me  Koht ketin kaunopada sampah en wia wasakis ong dewen aramas akan.—Sohp 38:4, 7.

⁵ Pwehki sapwellimen Siohwa kepikipik kan koaros arail unsek, eri ihs me wiahda “Tepil” de “Sehdan” menet? Ni kawehwe mengei, emen sapwellimen Koht tohnleng roson me pein wiahiong ih en wiahla Tepil. Ia duwen met eh kak wiawi? Rahn wet, aramas emen me mahso wia aramas tiahk mwahu oh mehlel men kakete uhd wiahla sounpirap men. Ia duwen met eh kak wiawi? Aramaso ele mweidohng ineng sapwung en kekeirda nan kapehde. Ma e pahn wie medemedewe inengo, ineng sapwungo kakete uhdahn kehlailla. Mwurin met ma mie ahnsou mwahu dierek, e pahn uhd wia dahme ineng suwed en nan kapehde kin kainangiheki en wia.​—Wadek Seims 1:13-15.

6. Ia duwen sapwellimen Koht tohnleng emen eh wiahla Sehdan me Tepil?

⁶ Met iei me wiawihongehr Sehdan me Tepil. E iang rong ni ahnsou me Koht mahsanihong Adam oh Ihp ira en naineki seri kan oh kadirehkihla sampah neira kan. (Senesis 1:27, 28) E sansal me Sehdan kin medemedewe: ‘Tohnsampah pwukat koaros kak uhd kaudokiong ie, a ieremenehr Koht!’ Kahrehda, ineng sapwung kekeirda nan eh mohngiong. E mwekidki met oh pitih Ihp ni eh wie likamw ong ih me pid duwen Koht. (Wadek Senesis 3:1-5.) Ih eri wiahla “Tepil,” me wehwehki “Sounkaraun likamw.” Ni ahnsowohte, e wiahla “Sehdan,” me wehwehki “Sounpelian.”

7. (a) Dahme kahrehda Adam oh Ihp mehla? (b) Dahme kahrehda kadaudok en Adam koaros kin mahla oh mehla?

⁷ Sang ni eh doadoahngki likamw oh widing, Sehdan me Tepil kahrehiong Adam oh Ihp en sapeikiong Koht. (Senesis 2:17; 3:6) Imwilahn met, ira mehla, nin duwen dahme Koht mahsanih me ira pahn wia ma ira pahn sapeikiong ih. (Senesis 3:17-19) Pwehki Adam eh solahr  unsek ni ahnsou me e dipadahro, kadaudoke koaros sohsohkiher dihp sang reh. (Wadek Rom 5:12.) Irair wet kak rasehng dahlen umwun pilawa ehu. Ma dahlo pahn padala, dahme pahn wiawihong ehuehu lopwon en pilawa me wiawihda nan dahlo? Ehuehu pilawa ko pahn mie lipwen pahdo. Ni ahlohte, emenemen tohnsampah sohsohki “pahd” ehu en soh unsek sang rehn Adam. Iei me kahrehda tohnsampah koaros kin mahkihla oh mehkihla.​—Rom 3:23.

8, 9. (a) Wiewiahn uhwong dahieu me Sehdan wia? (b) Dahme kahrehda Koht sohte ketin kemehla irail akan me uhwongada ih ni ahnsowohte?

⁸ Ni ahnsou me Sehdan kahrehiong Adam oh Ihp en wiahda dihp ong Koht, e kahrehiong ira en iang ih uhwongada Koht. E pelianda sapwellimen Siohwa elen kaunda. Mwekid wet wehwehki me Sehdan nda: ‘Koht kaun sakanakan emen. E kin mahsen likamw oh kin ketin ekihsang sapwellime kan mehkan me mwahu. Tohnsampah sohte anahne sapwellimen Koht kaunda. Irail kak pein pilada dahme mwahu oh dahme suwed ong pein irail. Oh irail pahn nsenamwahu pahn ei kaunda laudsang pahn sapwellime kaunda.’ Eri dahme Koht pahn ketin wia ong soangen lokaiahn kamwamwahl duwehte met? Ekei aramas lemeleme me e mwahu Koht en ketin uhdahte kemehla soangen sounpelian pwukat. Ahpw ia duwe, met pahn kak sapengala dahme Sehdan nda? Met pahn kadehdehda me sapwellimen Koht elen kaunda me pwung?

⁹ Sapwellimen Siohwa wiewia kan kin ahnsou koaros pwung oh pahrek. Ihme kahrehda e sohte ketin kemehla irail akan me uhwong ih ni ahnsowohte. E ketin mwahngih me ahnsou laud anahn pwehn sapengala uhwong me Sehdan wia oh kadehdehda me Tepil wia sounlikamw emen. Kahrehda Koht ketin koasoanehdi en mweidohng tohnsampah kan en pein kaunda irail erein ahnsou ehu  pahn kaweid en Sehdan. Dahme kahrehda Siohwa ketin mweidohngki met? Dahme kahrehda e ketin mweidohngki ahnsou reirei ehu mwohn e ketin kapwungala irair pwukat? Irelaud 11 en pwuhk wet pahn sapengala peidek pwukat. Ahnsouwet e mwahu kitail en medewe ire pwukat: Ia duwe, e pwung Adam oh Ihp ira en kamehlele Sehdan nan eh saikinte pak ehu wia mehkot mwahu ong  ira? E pwung ira en kamehlele me Siohwa, me ketikihong ira mehkoaros, kin ketin wia sounlikamw lemei men? Ma kowe mwo, dahme ke pahn wia?

10. Ia duwen omw kak uhki sapwellimen Siohwa pali oh sapengala dahme Sehdan uhkihong Siohwa?

¹⁰ E mwahu kitail en medemedewe duwen peidek pwukat pwehki emenemen kitail pil kin anahne sapengala soangen peidek pwukat rahn wet. Ke kak iang utungada sapwellimen Siohwa pali oh kihda pasapeng ong dahme Sehdan uhkihong Siohwa. Ke kak uhki me Siohwa iei omw Kaun oh sewese kasalehda me Sehdan sounlikamw men. (Melkahka 73:28; wadek Lepin Padahk 27:11.) Aramas malaulau keite nanpwungen tohnsampah lik (billion) kei me wiahdahr soangen pilipil wet. Met kihda peidek kesempwal ehu, Uhdahn mehlel me Paipel kin padahngki me Sehdan kin kakaun sampah wet?

11, 12. (a) Ia duwen kasongosong me kohwong Sises eh kasalehda me Sehdan me kaunen sampah wet? (b) Pil dahme kadehdehda me Sehdan iei me kaunen sampah wet?

¹¹ Sises sohte ketin kelikemwe me Sehdan me uhdahn kaunen sampah wet. Sehdan doadoahngki eh manaman oh kasalehiong Sises “wehi koaros en sampah oh duwen ar lingan.” Sehdan eri inoukihong Sises: “Mepwukat koaros I pahn kihong komwi, ma komw pahn poaridi oh pwongih ie.” (Madiu 4:8, 9; Luk 4:5, 6) Nna medewe duwen ire wet. Inou wet kak wia mehn kasongosong ehu ong Sises ma kaidehn Sehdan me wia kaunen wehi pwukat? Sises sohte ketin kelikemwe me koperment en sampah pwukat koaros ahn Sehdan. Ma Sehdan sohte eh manaman pohn wehi pwukat, ah Sises pahn ketin kasansalehda met.

¹² Siohwa iei ih me Koht wasa lapalahpie, Sounkapikpen lahng oh sampah. (Kaudiahl 4:11) Ahpw, Sises  mahsanih me Sehdan iei “kaunen sampah wet.” (Sohn 12:31; 14:30; 16:11) Paipel pil mahsanih me Sehdan me Tepil wia “koht suwed en sampah wet.” (2 Korint 4:3, 4) Me pid sounpelian menet de Sehdan, wahnpoaron Sohn ntingihdi: “Sampah unsek mi pahn manaman en Me Suwedo.”​—1 Sohn 5:19.

13. Dahme kahrehda mie anahnepen koasoandi en sampah kapw ehu?

¹³ Ehuehu pahr, sampah kin wie kepekeperla. Sampah wet kin inenen dirkihla sounpei kan me kin mamahwenpene, kaunen politik mwersuwed akan, kaunen pelien lamalam mwalaun akan, oh loallap suwed akan. Sampah pwon solahr kak pwurehng mwahula. Paipel kasalehdahr me ahnsowo kerendohr me Koht pahn ketin kauwehla koasoandi en sampah suwed wet nan sapwellime mahwen en Armakedon. Met pahn kahrehiong koasoandi en sampah kapw oh pwung ehu en pweida.​—Kaudiahl 16:14-16.

14. Ihs me Koht ketin piladahr en wia kaunen sapwellime wehio? Ia mwomwen Paipel eh kohpadahr met?

¹⁴ Siohwa Koht ketin piladahr Sises Krais en wia Kaunen Sapwellime Wehi de koperment en nanleng. Mahso, Paipel kohpadahr: “Kisin seri kis ipwidiongkitailehr! Neitail pwutak emen kohiengkitailehr! Oh e pahn ketin wiahla atail kaun. E pahn mwarenki . . . ‘Nanmwarkien Popohl.’ Sapwellime manaman pahn wie lapalapala, oh popohl pahn poatopoat nan sapwellime wehi.” (Aiseia 9:6, 7) Me pid duwen koperment wet, Sises ketin padahkihong sapwellime tohnpadahk kan en kapakapki: “Mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.” (Madiu 6:10) Kitail pahn tehkpene mwuhr nan pwuhk wet me ni ahnsou keren,  Wehin Koht pahn ketikihsang koperment koaros en sampah wet, oh wehio kelehpw me pahn kakaun. (Wadek Daniel 2:44.) Mwurin met, Wehin Koht pahn uhd ketikihdo paradais ehu nin sampah.

15. Dahkot “sampah kapw”?

¹⁵ Paipel kamehlelehiong kitail oh mahsanih: “Eri kitail koapworopwor oh awiawih lahng kapw oh sampah kapw, wasa me pwungen kalahngan en Koht pahn poadada ie poatopoat, duwen eh ketin inoukidahr.” (2 Piter 3:13; Aiseia 65:17) Ekei pak, ni ahnsou me Paipel kin mahsanih “sampah,” e kin wehwehki aramas akan me kin kousoan pohn sampah. Kahrehda “sampah kapw” pwung ehu iei pwihn en aramas ehu me Koht kin ketin kupwurki.

16. Ia sapwellimen Koht kisakis kesempwal ong irail akan me e ketin kupwurki? Dahme kitail anahne wia pwe kitail en kak iang alehdi?

¹⁶ Sises ketin inoukihda me nan koasoandi kapw me pahn kohdo, irail oko me Koht kupwurki pahn ale kisakis en “mour soutuk.” (Mark 10:30) Menlau pahkala noumw Paipel ong Sohn 3:16 oh 17:3 oh wadek dahme Sises mahsanih duwen dahme kitail pahn wia pwe kitail en kak ale mour soutuk. Tehk mahs nan Paipel duwen kapai kan me irail akan me warohng ale mour soutuk pahn pereperenki nan paradais sampah ni ahnsou kohkohdo.

17, 18. Ia duwen atail kak ese me e pahn mie meleilei oh popohl wasa koaros nan sampah?

¹⁷ Wiewia suwed akan, mahwen, kauwehla kosonned, oh mwekid lemei kan pahn sohrala. “Aramas suwed kan pahn sohrala; . . . a me aktikitik kan pahn sapwenikihla sahpwo.” (Melkahka 37:10, 11) Meleilei pahn miehla pwe ‘Koht pahn ketin katokehdi mahwen wasa koaros nin sampah.’ (Melkahka 46:9; Aiseia 2:4) Mwuri, ong me pwung kan, “paiamwahu oh popohl en kin poatopoat  erein maram eh kin kamakamarainih wasa,” met wehwehki ahnsou kohkohlahte!​—Melkahka 72:7.

¹⁸ Sapwellimen Siohwa tohnkaudok kan pahn kousoan ni sohte perki mehkot. Erein mehn Israel akan en mahs ar kin peikiong Koht, irail kin ahneki popohl. (Lipai 25:18, 19) Ia uwen eh pahn nohn mwahu kitail en pil iang paiekihda soangen popohl wet nan Paradais!​—Wadek Aiseia 32:18; Maika 4:4.

19. Dahme kahrehda kitail esehki me mwenge pahn rek nan sapwellimen Koht sampah kapwo?

¹⁹ Solahr pahn mie duhpek. Sounmelkahkao koulki: “Reken wahn pilawa en kin wiewiawihte nan wehiet; wahnsahpw en kin kipehdi dohl akan.” (Melkahka 72:16) Siohwa Koht pahn ketin kapaia sapwellime aramas pwung kan oh “wahnsapwatail kan pahn kaparaparala.”​—Melkahka 85:12.

20. Dahme kahrehda kitail kak kamehlele me sampah pwon pahn wiahla paradais ehu?

²⁰ Sampah pwon pahn wiahla paradais ehu. Ihmw oh mwetuwel kaselel kan pahn uhd mihla nan sahpw akan me aramas suwed akan kauwelahr. (Wadek Aiseia 65:21-24; Kaudiahl 11:18) Ekisekis sampah pahn linganla oh wahn sahpw akan pahn pweida duwehte mwetuwel en Ihden. Koht pahn ketikihong me momour kan koaros “uwen me itar oh kin ketin kaitarala ar anahn akan koaros.”​—Melkahka 145:16.

21. Dahme kasalehda me meleilei pahn mie nanpwungen aramas akan oh mahn akan?

²¹ Pahn mie meleilei nanpwungen aramas akan oh mahn akan. Mahn lawalo oh mand akan pahn mwengepene. Pil kisin seri men sohte pahn perki mahn akan me kin keper nan atail ahnsou.​—Wadek Aiseia 11:6-9; 65:25.

22. Dahme pahn wiawihong soumwahu?

²² Solahr soumwahu. Ni ahnsou me Sises ketiket pohn  sampah, e ketin kamwahwihala ekei me soumwahu kan. Nin duwen Kaunen sapwellimen Koht Wehi nanleng, e pahn ketin kamwahwihala soumwahu koaros nin sampah. (Madiu 9:35; Mark 1:40-42; Sohn 5:5-9) Mwurin mwo, “sohte emen me kin kousoan nan sahpwo pahn kaulimkihla eh soumwahu.”​—Aiseia 33:24; 35:5, 6.

23. Dahme kahrehda kaiasada pahn wahdo peren?

²³ Kompoakepatail me melahr pahn pwurehng mourda oh pahn ahneki koapworopwor en solahr pahn pwurehng mehla. Irail koaros me melahr me Koht kin ketin tamataman pahn pwurehng mourda. “Me mwahu oh suwed, pahn iasada sang mehla.”​—Wiewia 24:15; wadek Sohn 5:28, 29.

24. Ia omw pepehm ong kousoan nan Paradais nin sampah?

²⁴ Ia uwen kaselel en koapworopwor wet ong irail akan me pilada ren sukuhlki duwen Sounkapikada Lapalap, Siohwa Koht, oh papah ih! Iei met Paradais me pahn wiawi sampah me Sises kin mahsanih duwe ni ahnsou me e ketin inoukihong loallap men me mi mpe oh iang mehlao: “Ke pahn iang ie mi nan Paradais.” (Luk 23:43) E inenen kesempwal kitail en kalaudehla atail esehla duwen Sises Krais, pwehki ih, kapai pwukat koaros pahn kak pweida.