Siohwa iei Koht emen me ketin kupwurki soandi mwahu. (1 Korint 14:33) Eri kitail pahn kasik me sapwellime aramas akan pahn soandi mwahu. Ia duwen mwomwohdisohn Kristian eh kin koasoansoandi? Ia duwen atail kak utung met?

1. Ihs me tapwin mwomwohdiso?

‘Krais me tapwin mwomwohdiso.’ (Episos 5:23) Sang nanleng e kin ketin kaweid doadoahk me sapwellimen Siohwa aramas akan kin wiewia nan sampah pwon. Sises ketin idihada “ladu lelepek oh loalokong”​—pwihn tikitik ehu me wia elder koahiek kei me pil kin adaneki Pwihn me Kin Apwalih Mwomwohdiso nan Sampah Pwon. (Wadek Madiu 24:45-47.) Pwihn wet kin kihda kaweid ong mwomwohdiso kan nan sampah pwon, duwehte wahnpoaron ko oh elder ko nan Serusalem ni mwehin tepin Kristian kan. (Wiewia 15:2) Ahpw kaidehn ohl pwukat me kin kaun at pwihn. Re kin kilengwohng Siohwa oh sapwellime Mahsen pwe ren ale kaweid oh re kin perenki peikiong Sises.

2. Ia en elder kan pwukoa?

Elder kan iei ohl Kristian koahiek kan me kin padahk sang nan Paipel oh apwalih sapwellimen Siohwa aramas akan sang ni ar kin sewese oh kangoange irail. Re sohte kin ale pweinen ar doadoahk. Ahpw re kin papah sang ni ‘pein nsenarail mwohn Koht; kaidehn pwehki arail mwahuki rapahki pein kamwahuparail, ahpw pwehki ar ngoangki.’ (1 Piter 5:1, 2) Sounsawas kan iei irail kan me kin sewese elder kan. Mwurin ahnsou kei, sounsawas kan ele pahn kak koahiekla oh wiahla elder kei.

Pwihn me Kin Apwalih Mwomwohdiso nan Sampah Pwon kin idihada ekei elder kan ren wia sounapwalih me kin seiloak. Irail kin mwamwaitih soangsoangen mwomwohdiso kan pwe ren kihda kaweid oh kangoang. Re kin doadoahngki kaweid kan sang nan Paipel pwehn idihada irail kan me konehng wiahla elder oh sounsawas.​—1 Timoty 3:1-10, 12; Taitus 1:5-9.

3. Dahme emenemen Sounkadehde anahne wia?

Koaros nan mwomwohdiso kin kapinga mwaren Siohwa. Met kin duwehte iang pasapeng, wia padahk oh kamwomwada kan oh koul nan mihting en mwomwohdiso kan oh iang kalohk ni uwen me re kak.​—Wadek Melkahka 148:12, 13.

 KALAUDEHLA OMW ESE MET

4. Sises wia kaun kadek men

Sises ketikihong kitail luhk kansenamwahu ehu. Wadek Madiu 11:28-30, oh mwuri koasoiapene peidek wet:

• Dahme Sises kupwurki kitail en medewehki duwen sapwellime kaunda?

5. Elder kan kin padahk sang ni mehn kahlemeng

1. Elder kan kin kolokolete ar nanpwungmwahu rehn Siohwa en kehlail oh re kin sewesehki ar peneinei soahngohte

2. Elder kan kin nsenohki koaros nan mwomwohdiso

3.   Elder kan kin ngoangki kalohk

4. Elder kan kin padahk. Re pil kin kamwakel oh wia pwukoa teikan

6. Kitail kak utung elder kan

Paipel kasalehiong kitail kahrepe kesempwal en utung elder kan. Wadek Ipru 13:17, oh mwuri koasoiapene peidek pwukat:

• Dahme kahrehda Paipel mahsanih me kitail anahne perenki peikiong elder kan? Ia omw pepehm ong met?

Wadek Luk 16:10, oh mwuri koasoiapene peidek wet:

• Dahme kahrehda e kesempwal kitail en utung elder kan mehnda ma ni mehkot tikitik?

 DAHME KE SUKUHLKIER

Sises me tapwin mwomwohdiso. Kitail kin perenki utung elder kan me kin papah pahn sapwellime kaunda pwehki re kin kansenamwahwih oh padahkih kitail sang ni ar mehn kahlemeng.

Kousapahl

• Ihs me tapwin mwomwohdiso?

• Ia duwen elder kan ar kin sewese mwomwohdiso?

• Dahme emenemen sapwellimen Siohwa tohnkaudok kan anahne wia?