IREN MEHN KASUKUHL 34

Ia Duwen Atail Kak Kasalehda me Kitail Poakohng Siohwa?

PLAY

Ke kin poakohng Koht laudsang ni ahnsou me ke tepida onopki Paipel? Ia duwe, ke men pousehlahte kakehlaka omw nanpwungmwahu reh? Ma iei, tamataman me ni Siohwa eh ketin mahsanih me omw poakohng ih wie lalaudla, eh poakohng uhk oh apwalihiuk pahn pil laudla. Ia duwen omw kak kasalehiong ih me ke poakohng ih?

1. Ia duwen atail kin kasalehiong Siohwa me kitail poakohng ih?

Kitail kin kasalehda atail limpoak ong Siohwa sang ni atail peikiong ih. (Wadek 1 Sohn 5:3.) E sohte kin ketin idingkihong emen en peikiong ih. Ahpw e kin ketin mweidohng emenemen kitail en pilada ma kitail pahn peikiong ih de soh. Dahme kahrehda? Siohwa kin ketin kupwurki kitail en peikiong ih “sang ni mohngiong.” (Rom 6:17) Met wehwehki me e kin ketin kupwurki ken peikiong ih, kaidehn pwehki ke anahne wia met, ahpw pwehki ke poakohng ih. Pali 3 oh 4 en pwuhk wet wiawihda pwehn seweseiuk ken kasalehiong Siohwa me ke poakohng ih sang ni omw kin wia dahme e kin ketin kupwurperenki oh liksang dahme e kin ketin kalahdeki.

2. Dahme kahrehda e apwal en kasalehiong Siohwa me kitail poakohng ih?

“Apwal tohto kin lelohng aramas mwahu men.” (Melkahka 34:19) Kitail koaros kin pepeiong atail soh unsek kan. Oh ele kitail pil kin lelohng kahpwal en mwohni, kopwung sapahrek oh kahpwal teikan. Ni atail kin lelohng kahpwal kan, ele kitail kin apwalki wia dahme Siohwa ketin kupwurki kitail en wia. Pwehki e kin mengei en sapeikiong Siohwa. Ahpw ni omw kin lelepek ong Siohwa oh wia dahme e ketin padahkihong uhk, ke kin kasalehda me ke poakohng ih laudsang soahng teikan koaros. Oh ke kin kadehdehda me ke kin loalopwoatohng ih. Ma iei, e pahn uhd ketin loalopwoatohng uhk. E sohte pahn ketin likidmelieiukala.—Wadek Melkahka 18:25.

KALAUDEHLA OMW ESE MET

Sukuhlki dahme kahrehda omw peik kin kaperenda Siohwa oh dahme kak seweseiuk en kin lelepekohngete ih.

3. Ire ieu me pil pidada kowe

Nin duwen me pwuhken Sohp kasalehda, Sehdan karaune Sohp oh pil aramas koaros me men papah Siohwa. Wadek Sohp 1:1, 6–2:10, oh mwuri koasoiapene peidek pwukat:

Dahme Sehdan koasoiahki kahrepen Sohp eh kin peikiong Siohwa?—Kilang Sohp 1:9-11.
Dahme Sehdan ndahki aramas koaros, iangahki kowe?—Kilang Sohp 2:4.

Wadek Sohp 27:5b, oh mwuri koasoiapene peidek wet:

Ia duwen Sohp eh kadehdehda me e uhdahn poakohng Siohwa?

Sohp kadehdehda eh limpoak ong Siohwa sang ni eh loalopwoatohngete ih

Kitail kin kadehdehda atail limpoak ong Siohwa sang ni atail kin loalopwoatohngete ih

4. Kaperenda kupwuren Siohwa

Wadek Lepin Padahk 27:11, oh mwuri koasoiapene peidek pwukat:

Ia sapwellimen Siohwa pepehm ni omw kin loalokong oh peikiong ih? Dahme kahrehda?

5. Ke kak loalopwoatohng Siohwa

Atail limpoak ong Siohwa kin kamwakid kitail en padahkihong meteikan duwen ih. Atail loalopwoatohng ih kin kamwakid kitail en wia met pil ni ahnsou me sohte mengei. Kilang KISIN KASDO, oh mwuri koasoiapene peidek pwukat.

KISIN KASDO: Defend Your Faith Despite Opposition (5:09)

Mie pak me ke kin apwalki padahkihong meteikan duwen Siohwa?
Dahme sewese Grayson en powehdi eh masak?

E mengei kitail en loalopwoatohng Siohwa ni atail poakohng dahme e ketin poakohng oh tatki dahme e ketin kalahdeki. Wadek Melkahka 97:10, oh mwuri koasoiapene peidek pwukat:

Sang ni dahme ke sukuhlkier, soahng dah kan me Siohwa kin ketin poakohng? Oh soahng dah kan me e kin ketin kalahdeki?
Dahme ke kak wia pwe ken poakohng dahme mwahu oh tatki dahme suwed?

6. Atail peikiong Siohwa wia kamwahupatail

Dahme keieu mwahu ahnsou koaros iei en peikiong Siohwa. Wadek Aiseia 48:17, 18, oh mwuri koasoiapene peidek pwukat:

Ia duwe, kitail kak likih me Siohwa kin ketin mwahngih dahme keieu mwahu ong kitail ahnsou koaros? Dahme kahrehda?
Soangen kamwahu dah kan me ke diarada ni omw onopki Paipel oh Koht mehlelo Siohwa?

EKEI ARAMAS KIN NDA: “Koht sohte ketin katapanki ei wiewia kan.”