Riat akan:

Atail poakohng Koht oh aramas me kin kamwakid kitail en ‘kohla oh padahkihong aramas en wehi koaros pwe ren wiahla . . . tohnpadahk, [oh] papidaisihirailla.’ (Mad. 28:​19, 20; Mark 12:​28-31) Limpoak soh roporop kin kehlail. E kak sair irail kan me “ahneki mohngiong mwahu en ale mour soutuk.”—Wiewia 13:48.

Mahso kitail kin nantihong wadlikihala dahme kitail pahn koasoia oh kihlahte sawaspen Paipel kan. Ahpw met kitail anahne kamwahwihala atail koahiek en koasoiong aramas akan. Kitail men kasalehda limpoak ong meteikan sang ni atail kin koasoia duwen ire kan me irail pahn perenki koasoiapene. Met wehwehki me kitail en kin onopadahng wekidala mwomwen atail padahk kan oh medemedewe kanahieng dahme emenemen aramas kin pwunodki oh perenki. Ia duwen kisin pwuhk wet eh pahn sewese kitail en wia met?

Mie iren mehn kasukuhl 12 nan kisin pwuhk wet me kasalehda irair kan me kitail anahne kakairada pwehn kasalehda limpoak oh wia doadoahk en katohnpadahk. Ehuehu iren mehn kasukuhl kin poahsoankihda iren Paipel ehu me kasalehda irair ehu me Sises de tepin Kristian akan kin kasalehda nan arail kalohk. Mehn akadeio iei, kitail en rapahki ahl akan en kasalehda atail limpoak ong aramas akan, a kaidehn en wadlikihalahte dahme kitail pahn koasoia. Mendahki ehuehu irair kin anahn ong atail wiepen kalohk koaros, kitail pahn koasoiapene ia duwen ekei irair pwukat ar kin keieu anahn ni atail kin tepida koasoiong aramas akan, pwurala rehrail, de wia onop en Paipel rehrail.

Ni omw pahn tehk ehuehu iren mehn kasukuhl, medewe kanahieng ia duwen omw kak kasalehda irairo ni omw pahn koasoiong aramas akan nan omw wasahn kousoan. Nantihong en kakehlakahda omw limpoak ong Siohwa oh aramas akan. Limpoak wet kesempwal sang wiepen kalohk koaros, oh ih met me pahn seweseiuk en lel omw mehn akadei en sewese aramas en wiahla tohnpadahk en Krais.

Se kin kalahnganki pwais kaselel en iang kumwail doadoahkpene ni minimin. (Sep. 3:9) Siohwa en ketin kapaia kumwail laud ni amwail kin pousehlahte poakohng aramas akan oh wia doadoahk en katohnpadahk!