PEIDEK 9
I Anahne Kamehlele Padahk me Dene Mour Pein Miehla?
DAHME KE PAHN WIA?
Medewehla me met wiawi: Alex pwonopwonkihda mehkot. E kin kamehlele Koht oh kepikipik kan. Ahpw rahnwet eh sounpadahk me kin kasukuhlki duwen soahng momour kan (biology) koasoia me e uhdahn mehlel me mour pein miehla, dene me met poahsoandahsang roporop en palien sains me kitail kak kamehlele. Alex sohte men mwomwen pweipwei. E pein ndaiong ih, ‘Ma pwihn en palien sains kan ahneki mehn kadehde me e mehlel me mour pein miehla, ihs ngehi pwehn kapeidakih irail?’
Ma kowe Alex, ke pahn pwungki me mour pein miehla pwehki pwuhken sukuhlo koasoia me met mehlel?
UHDI OH MEDEWE!
Aramas kan me kin kihda arail madamadau de akamaiki met kin kalapw koasoia dahme re kamehlele ahpw sohte uhdahn ese dahme kahrehda irail kamehlele duwen met.
-
Ekei aramas kin kamehlele duwen kepikipik kan pwehki ih met me re sukuhlkihsang nan arail imwen sarawi kan.
-
Ekei aramas kin kamehlele padahk me dene mour pein miehla pwehki ih met me re sukuhlkihsang nan wasahn sukuhl.
PEIDEK WENEU EN MEDEMEDEWE
Paipel mahsanih: “Aramas akan me kin kauwada ihmw—ahpw Koht, iei ih me ketin wiahda mehkoaros.” (Ipru 3:4) Ia duwe, e pwung en kamehlele met?
En koasoia me dene sohte Sounkapikada me kapikada mour pahn mwomwen pweipwei oh e duwehte ahmw pahn koasoia me sohte emen me kauwada ihmw wet
DENE ME: Soahng koaros me mi sampah oh pahnlahng mie pwehki lapalahn pos ehu me wiawi.
1. Ihs me de dahme kahrehda lapalahn pos wet?
2. Mehnia me keieu wehwe, soahng koaros pein miehla de soahng koaros kohsang rehn emen?
DENE ME: Aramas kohsang mahn akan.
3. Ma aramas kohsang mahn akan, karasepe, sang mwengki, dahme kahrehda ahn aramas koahiek en madamadau uhdahn weksang ahn mwengki kan?
4. Dahme kahrehda “soahng momour kan me keieu mengei” uhdahn apwal en wehwehki?
DENE ME: Padahk me dene mour pein miehla miehier mehn kadehde kan me e mehlel.
5. Ia duwe, aramas me dene met mehlel pein kasawiher mehn kadehde kan?
6. Aramas depe me kin kamehlele me mour pein miehla pwehki mie me padahkihong irail me aramas loalokong koaros pil kin kamehlele met?
“Ma ke alialu nanwel oh diarada ihmw kaselel ehu, ke pahn medewe: ‘Ia uwen kaselel! Mwein tuhke kan pwupwudihte depweila wiahda ihmw wet.’ Uhdahn soh! E sohte wia elen loalokong en medewe met. Eri dahme kahrehda kitail en pil kamehlele me soahng koaros nin sampah oh pahnlahng pein miehla?”
—Julia.
“Medewehla me mie me ndaiong uhk me wasahn print ehu pospeseng oh ingk kan kohpeseng ni dihd kan oh pahn denso kan oh wiahda nting kan nan ehu dikseneri pwon. Ke pahn kamehlele met?”
—Gwen.
DAHME KAHREHDA KE KIN KAMEHLELE KOHT?
Paipel kangoange iuk en “kasawih mehkoaros.” (1 Deselonika 5:21) Met wehwehki me ahmw kamehlele Koht en dehr poahsoandahsangte
-
PEPEHM (I pehm me e uhdahn mie manaman laud ehu)
-
DUWEN METEIKAN AR KAMWAKID UHK (I kousoan nan kousapw ehu me kin poadidiong pelien lamalam)
-
IDIHD (Sang ni ei tikitik ei pahpa nohno kahrehiong ie en kamehlele Koht, sohte ei pilipil)
Ahpw, e anahne mie kahrepen dahme ke kin kamehlele.
“I sohte kak peikasalki me mie Koht ni ahnsou me I kin mi nan perehn sukuhl rongorong sounpadahko eh kin kawehwe mwomwen paliwar eh kin doadoahk. Ehuehu kisehn paliwar kin mie kahrepe, lella me keieu tikitik kan, oh kitail sohte kin tehk ahpw soahng pwukat kin doadoahk. E apwal en wehwehki paliwar en aramas!”
—Teresa.
“Ni ei kin kilang ihmw reirei kan (skyscraper), sohp en mwemweit, de sidohsa, I kin pein idek rehi, ‘Ihs me wiahda met?’ Karasepe, aramas loalokong me kin wiahda sidohsa, dahme kahrehda? Pwehki soahng tikitik tohto anahne doadoahk ni pwung pwe sidohsao en kak tang. Oh ma aramas me kin wiahda sidohsa, eri pil mie emen me wiahda aramas.”
—Richard.
“Anthony koasoia: “Uwen laud en ei sukuhlki duwen sains, ih uwen tikitiklahn ei kamehlele padahk me dene mour pein miehla.” E pil nda me ong ih, e apwal en kamehlele me mour pein miehla sang kamehlele Sounkapikadao.
PWEHN MEDEWE DUWEN
Mendahki roporop kan me wiawi sounpar tohto, saintis kan saikinte diarada kawehwehn padahk me mour pein miehla me irail koaros kak pwungkipene. Ma saintis kan sohte kak pwungkipene me mour pein miehla, oh ni mehlel irail me konehng ese mepwukat, ia duwe, e sapwung ken peidengki padahk wet?
