Medewehla me met wiawi: Brian pehm nan kapehde soansuwedda ni ahnsou me ienge tohnsukuhl riemen alialu kohdo reh. Pak riau nan wihko, re kin song kihong sika pwehn simoak. Met kesiluhn arail pahn song wia met.

Tepin pwutako nda:

E mwomwen nda lepin lokaiao “kompoakepahi” ni eh manih Brian oh kihsang mehkot nan eh pwekid oh kapahla peho rehn Brian.

Brian kilang sika pwoat nanpwungen sendin pehn pwutako. Kapehden Briano ahpwte soansuwedda.

Ma kowe Brian, ia duwen ahmw pahn sapeng?

Ia duwe, iengen Brian ko uhdahn medewe dahme ira wiewiao? Ira pein wiahda ara pilipil? Mwein soh. Pali laud kin dukula pahn kasongosong en meteikan. Re kin men meteikan en pwungkin irail, eri re kin mweidohng meteikan en kin kamwakid dahme re kin wia.

Ma ke lelohng soangen irairohte, ia duwen ahmw kak pilada ehu ahl tohrohr oh soikala kasongosong en iengomw kan?

1. KAUNOPADA

   Paipel mahsanih: “Aramas me eh lamalam mie kak kilangada kahpwal me kohkohdo oh wetsang; ahpw aramas tohto kin inenwohngete, ahpw nsensuwedkihla mwuhr.”—Lepin Padahk 22:3.

   Pak tohto ke kin kak kilangada kahpwal kan me kohkohdo. Karasepe, medewehla me ke kilangla oh kilangada iengomw tohnsukuhl kei wie simwsimwok. Sang ni ahmw pahn kaunopada ong kahpwal ehu, ke pahn onopadahng powehdi kahpwalo.

2. MEDEWE

   Paipel mahsanih: “Nan kapehdomwail kan en kin mwakelekel.”—1 Piter 3:16.

   Pein idek rehmw, ‘Ia pahn ei pepehm mwuhr ma I pahn iang irail?’ Mehlel, ke pahn kak soikala ahn iengomw kan ar pahn sapwungkin uhk ahnsou wet. Ahpw ia pahn ahmw pepehm mwurin mwo? Ke men kesehla dahme ke kin kesempwalki oh kamehlele pwehn ihte kaperenda iengomw tohnsukuhl kan?—Eksodus 23:2.

3. PILADA

   Paipel mahsanih: “Aramas me mie eh lamalam kin tehk ni keneinei.”—Lepin Padahk 14:16.

   Ehu rahn, kitail pahn anahne wiahda pilipil ehu oh lelohng imwilahn atail pilipil kan. Paipel kin koasoia duwen ohl kan me duwehte Sosep, Sohp, oh Sises, irail koaros wiahda pilipil mwahu kan. E pil koasoia duwen Kain, Esau, oh Sudas, me wiahda pilipil sapwung kan. Dahme ke pahn wia?

Paipel mahsanih: “Me kin loalopwoat ni mehkot tikitik, e pahn pil loalopwoat ni mehkot laud.” (Luk 16:10) Ma ke medewehier duwen imwilahn ahmw pilipil kan oh wiahdahr ahmw pilipil, ahmw pahn ndahla soahng kan me ke pilada kakete mengei oh wia kapai laud.

Dehr pwunod pwe ke sohte anahne wiahda ehu kapahrek ong iengomw kan. Ahmw pahn kehlail ndahte SOH pahn itar. De en sansal me ke sohte pahn wekidala ahmw madamadau, ke kak nda:

• “I sohte pahn iang wia men!”

• “I sohte kin wia soangen!”

• “Ke esehier duwen ngehi!”

Me keieu mwahu iei ahmw pahn mwadang sapeng oh kasalehda me ke kehlail ong dahme ke kamehlele. Ma ke wia met, ele ke pahn pwuriamweikihla ni iengomw kan ar pahn mwadangete sohla iding uhk!

Ia duwen ma iengomw kan kapailoke iuk? Ia duwen ma irail nda, “Dah rong, ke masepwehk?” Ken pohnese me met iei ehu ahl me re kin iding uhk en dukula pahrail. Ia duwen ahmw kak sapeng? Mie pilipil riau me ke kak wia.

• Ke kak pwungki dahme re ndao. (“Ke pwung, I masepwehk!” Mwuri ni mwotomwot kasalehda kahrepeo.)

• Ke kak ndaiong ih mehkot me pahn kamwakid ih. Kasalehda kahrepen ahmw soikala, oh song en kamwakid eh madamadau. (“I medewe me ke uhdahn loalokong oh ke sohte pahn simwok!”)

Ma irail pousehlahte kapailoke iuk, aluhlahsang irail! Tamataman me uwen werei en ahmw pahn mihmi, ih uwen kasongosongo eh pahn lalaudla. Ahmw kohkohsang mwo pahn kasalehda me ke sohte men mweidohng meteikan en wekiduhkala.

Ni mehlel, ke sohte pahn kak rukusang kasongosong sang iengomw kan. Ahpw ke kak pilada dahme ke men wia, kasalehda dahme ke pahn wia, oh mwekid. Ni mehlel kowe me pahn pein wiahda ahmw pilipil!—Sosua 24:15.