IREN MEHN KASUKUHL 8
Dahme Koht Ketin Mweidohng Suwed oh Lokolok en Mihmihkihte?
1. Ia duwen suwed eh tepida?
Koht ketin mweidohng aramas en kakaun ahnsou werei pwe en kasalehda me re sohte kak kamwahwihala kahpwal kan
Suwed tepida miehla nin sampah ahnsou me Sehdan wiahda tepin likamw. Sehdan tohnleng unsek men nin tapio, ahpw “e sohte kin miniminiong me mehlelo.” (Sohn 8:44) E kakairada ineng en ale kaudok me Koht kelehpw warohng sapwellimaniki. Sehdan likamw ong tepin liho, Ihp, oh kahrehiong Ihp en peikiong ih a kaidehn Koht. Adam iangala Ihp oh sapeikiong Koht. Pilipil me Adam wiahda kahrehda lokolok oh mehla.—Wadek Senesis 3:1-6, 19.
Ni Sehdan eh kangoange Ihp en sapeikiong Koht, e tepida uhwong sapwellimen Koht pwuhng en kaunda. Pali laud en aramas iangala Sehdan oh soikala Koht nin duwen arail Kaun. Eri, Sehdan wiahla “kaunen sampah wet.”—Wadek Sohn 14:30; 1 Sohn 5:19.
2. Mie sapwung nan sapwellimen Koht kapikipik kan?
Sapwellimen Koht doadoahk koaros unsek. Aramas oh tohnleng kan me Koht ketin kapikada kak peikiong ih ni unsek. (Deuderonomi 32:4, 5) Koht ketin kapikada kitail en ahneki saledek en pilada wia me mwahu de me suwed. Saledek wet kihong kitail ahnsou mwahu en kasalehda atail limpoak ong Koht.—Wadek Seims 1:13-15; 1 Sohn 5:3.
3. Dahme kahrehda Koht ketin mweidohng lokolok en mihmi leledo ahnsou wet?
Sang ni ahnsou me uhwong pwarada nan Ihden leledo ahnsou wet, Siohwa ketin mweidohng uhwong en wiawihong sapwellime pwuhng en kaunda. Dahme kahrehda? Pwehn kasalehda me sohte kaunda ehu pahn mwahu ong aramas ma sohte sawas sang rehn Siohwa. (Eklesiasdes 7:29; 8:9) Mwurin sounpar 6,000 en poadopoad en aramas, mehn kadehde sansalda. Kaun akan sohte kak kihsang mahwen, kauwehla kosonned, kopwung sapahrek, oh soumwahu.—Wadek Seremaia 10:23; Eksodus 9:16.
Weksang kaundahn aramas, irail kan me kin pwungki sapwellimen Koht kaunda kin paiekihda. (Aiseia 48:17, 18) Kereniongehr Siohwa pahn ketin kaimwisekala koperment koaros en aramas. Ihte aramas me pilada en mi pahn sapwellimen Koht kaunda me pahn kousoan nin sampah.—Aiseia 11:9. Wadek Daniel 2:44.
Kilang kisin kasdo Dahme Koht Ketin Mweidohng Lokolok en Mihmihkihte?
4. Dahme sapwellimen Koht kanengamah kin mweidohng kitail en wia?
Sehdan dene aramas kin papah Siohwa pwehki arail madamadau en roporop. Ke men kasalehda me met likamw? Ke kak! Sapwellimen Koht kanengamah kin mweidohng kitail koaros en kasalehda ma kitail pwungki sapwellime kaunda de ahn aramas kaunda. Mwomwen atail mour kin kasalehda atail pilipil.—Wadek Sohp 1:8-12; Lepin Padahk 27:11.
5. Ia duwen atail kak pilada Koht en ketin kaunkitailda?
Atail pilipil kan kin kasalehda ma kitail men Koht en ketin kaunkitailda
Kitail kak pilada Koht en ketin kaunkitailda sang ni atail sukuhlki oh iang kaudok mehlel me poahsoankihda Mahsen en Koht, Paipel. (Sohn 4:23) Kitail kak soikala Sehdan nin duwen atail kaun sang ni atail sohte kin iang palien politik oh mahwen, duwehte me Sises ketin wia.—Wadek Sohn 17:14.
Sehdan kin doadoahngki eh manaman pwehn kangoange tiahk samin oh wiewia kan me pahn suwed ong kitail. Ni atail kin soikala wiewia pwukat, ekei kompoakepatail oh kisehtail kan kakete kapailoke de uhwong kitail. (1 Piter 4:3, 4) Eri kitail anahne pilada. Kitail pahn werekiong aramas akan me kin poakohng Koht? Kitail pahn peikiong sapwellime kosonned kan me poahsoankihda erpit oh limpoak? Ma kitail wia met, kitail kadehdehda me Sehdan likamw ni eh nda me sohte aramas pahn peikiong Koht ma e apwal en wia.—Wadek 1 Korint 6:9, 10; 15:33.
Sapwellimen Koht limpoak ong aramas kin kamehlelehiong kitail me suwed oh lokolok pahn imwisekla. Irail kan me kin kasalehda me re kamehlele met pahn ahneki mour soutuk nin sampah.—Wadek Sohn 3:16.
