Paipel audaudki “lingan en rongamwahu en Koht en peren.” (1 Timoty 1:11, NW) Koht peren menet kin ketin kupwurki peneinei kan en nsenamwahu. E ketin wiahda koasoandi en pwopwoud. Wiahda kisinlikou en kapwopwoud kesempwal pwehki met kak kahrehiong pahpa oh nohno oh pil seri kan en ahneki nsenamwahu oh re kak pehm me irail kin limpoakpene. Kristian akan anahne wauneki kosonned en sapwarail kan me pid wiahda kisinlikou en kapwopwoud.​—Wadek Luk 2:1, 4, 5.

Ia sapwellimen Koht madamadau duwen pwopwoud? E kin ketin kupwurki met en wia koasoandi poatopoat ehu nanpwungen ohl emen oh lih emen. Siohwa kin ketin kupwurki ohl pwopwoud kan oh lih pwopwoud kan en loalopwoatpene. (Ipru 13:4) E kin ketin kalahdeki mweipeseng. (Malakai 2:16) Ahpw e kin ketin mweidohng Kristian akan en mweisang arail pwoud oh pwurehng pwoudikihda emen tohrohr ma arail pwoud kamwahl.​—Wadek Madiu 19:3-6, 9.

Siohwa ketin kapikada ohl oh lih pwe ren sawaspene nan arail mouren pwopwoud. (Senesis 2:18) Nin duwen tapwin peneinei, ohl pwopwoud me keieu pwukoahki apwalih anahn akan en eh peneinei oh padahkihong irail duwen Koht. Ni eh kin kasalehda eh poakohng eh pwoud, e anahne wiahda tounmetei kan. Ohl pwopwoud kan oh lih pwopwoud kan anahne limpoakpene oh wahupene. Pwehki ohl pwopwoud oh lih pwopwoud koaros soh unsek, e inenen kesempwal ren sukuhlki mahkpene pwehki met pahn sewese irail en nsenamwahu nan arail mouren pwopwoud.​—Wadek Episos 4:31, 32; 5:22-25, 33; 1 Piter 3:7.

Ma kumwa kin lelohng kahpwal kan nan amwa mouren pwopwoud, kumwa koaros anahne nantihong kasalehda limpoak ong emenemen. (1 Korint 13:4, 5) Mahsen en Koht sohte kin kangoange kitail en tohrohrasang atail pwoud pwehn kapwungala kahpwal kan me kin kalapw pwarada nan atail mouren pwopwoud.​—Wadek 1 Korint 7:10-13.

Siohwa kin ketin kupwurki kumwail en nsenamwahu. E ketikihong kumwail kaweid kan me keieu mwahu duwen amwail en perenki amwail pwulopwul. E kin ketin kupwurki kumwail en paiekihda erpit oh koahiek en amwail pahpa oh nohno. (Kolose 3:20) Siohwa pil kin ketin kupwurki kumwail en perenki wia soahng kan ong Sounkapikpamwail oh sapwellime Ohlo.​—Wadek Eklesiasdes 11:9–12:1; Madiu 19:13-15; 21:15, 16.

Ke anahne doadoahk laud pwehn mie mwenge, ihmw, oh likou ong noumw seri kan. (1 Timoty 5:8) Ahpw pwe noumw seri kan en ahneki mour nsenamwahu, ke pil anahne padahkihong irail ren poakohng Koht oh sukuhl sang ih. (Episos 6:4) Mwomwen omw kin kasalehda limpoak ong Koht kak kamwakid laud arail mohngiong. Ma omw kaweid kan kin poahsoankihda Mahsen en Koht, e kak kamwakid arail madamadau ni ahl me pwung.​—Wadek Deuderonomi 6:4-7; Lepin Padahk 22:6.

Omw kin kangoange oh kapinga noumw seri kan kin wia kamwahuparail. Irail pil anahne ken kapwungala oh kaiahne irail. Met kak pere irail sang wiewia kan me kak kihsang arail nsenamwahu. (Lepin Padahk 19:18) Ahpw kaiahn en dehr wiawi ni uk oh lemei.​—Wadek Kolose 3:21.

Sounkadehdehn Siohwa kan kin wiahda ekei pwuhk kan me kak sewese pahpa oh nohno kan oh pil seri kan. Pwuhk pwukat kin poahsoankihda Paipel.​—Wadek Melkahka 19:7, 11.