IREN MEHN KASUKUHL 2
Ihs Koht?
1. Dahme kahrehda kitail anahne kaudokiong Koht?
Koht mehlelo me ketin kapikada mehkoaros. Sohte tapi oh sohte imwi. (Melkahka 90:2) Ih me utupen rohng mwahu me dierek nan Paipel. (1 Timoty 1:11) Pwehki Koht me ketikihong kitail mour, kitail anahne kaudokiong ih kelehpw.—Wadek Kaudiahl 4:11.
2. Ia mwomwen Koht oh soangen Koht dah men ih?
Saikinte aramas emen me kilangehr Koht pwehki ih Ngehn emen. Met wehwehki me e sapwellimanki soangen mour ehu me pohnangin soangen mour koaros nin sampah. (Sohn 1:18; 4:24) Ahpw kitail kak esehla soangen Koht dah men ih sang ni mehkan me e ketin kapikada. Karasepe, soangsoangen wahntuhke kan oh wahn rohs kan kin padahkihong kitail sapwellime limpoak oh erpit. Uwen laud en pahnlahng oh sampah kin padahkihong kitail sapwellime manaman.—Wadek Rom 1:20.
Kitail pil kak esehla laud soangen Koht dah men ih sang atail wadek Paipel. Karasepe, e padahkihong kitail dahme Koht ketin kupwurki oh dahme e sohte ketin kupwurki, duwen sapwellime wiewia ong aramas akan, oh ia duwen eh kin ketin mwekid nan soangsoangen irair kan.—Wadek Melkahka 103:7-10.
3. Mie mwaren Koht?
Sises mahsanih: “Samat me ketiket nanleng: Mwaromwi en sarawihla.” (Madiu 6:9) Mwaren Koht mehte ehu mendahki e sapwellimanki lengileng tohto. Ehuehu lokaiahn sahpw de wasa kin wekpeseng arail kin nda mwar wet. Ni mahsen en Pohnpei, kitail kin nda “Siohwa.” Ahpw ekei aramas kin nda “Iahweh.”—Wadek Eksodus 6:3. *
Nan kawehwehn Paipel tohto, irail kin kihsang mwaren Koht oh wiliankihdi Kauno de Koht. Ahpw ni ahnsou me Paipel ntingdi, mwaren Koht kin pwarada mpen pak 7,000. Sises ketin padahkihong aramas akan dahme mehlel duwen Koht iangahki mware.—Wadek Sohn 17:26.
Kilang kisin kado Mie Mwaren Koht?
4. Siohwa kin ketin nsenohkin kitail?
Duwehte pahpa limpoak menet, Koht kin ketin wia soahng kan pwehn wia kamwahupatail kohkohlahte
Ia duwe, ire mehlel me aramas tohto mi nan lokolok kin wehwehki me Siohwa iei Koht emen me sohte kin ketin nsenohkin kitail? Ekei aramas nda me e kin ketin kahrehiong kitail en lokolok pwehn kasonge kitail, ahpw met sohte mehlel.—Wadek Seims 1:13.
Koht ketin mweidohng emenemen kitail en wiahda atail pilipil. Ni eh ketin wia met, e ketin kasalehda me e kin ketin kesempwalki emenemen kitail. Kitail sou kin kalahnganki atail saledek en pilada en papah Koht? (Sosua 24:15) Ahpw aramas tohto kin pilada ren wiahiong meteikan me suwed, kahrehda me tohto kin lokolok. Siohwa kin kupwurtoutoula ni eh mahsanih soangen kopwung sapahrek pwukat.—Wadek Senesis 6:5, 6.
Siohwa iei Koht emen me kin ketin nsenohkin kitail. E kin ketin kupwurki kitail en perenki mour. Kereniong e pahn ketikihsang lokolok oh irail kan me kin kahrehda lokolok. Ahpw ahnsou wet, e sapwellimaniki kahrepe mwahu en ketin mweidohng lokolok en wiawi erein ahnsou ehu. Nan Iren Mehn Kasukuhl 8, kitail pahn sukuhlki ia kahrepe.—Wadek 2 Piter 2:9; 3:7, 13.
5. Ia duwen atail kak karanihala Koht?
Siohwa kin ketin luke kitail en karanihala ih sang ni atail kin kapakapohng. E kin ketin nsenohki emenemen kitail. (Melkahka 65:2; 145:18) E kin ketin kupwurki kasalehda mahk. E ketin mwahngih atail kin nantihong kaperenda ih mehnda ma ekei pak kitail kin sapwungala. Eri mendahki atail soh unsek, kitail kak uhdahn ahneki nanpwungmwahu rehn Koht.—Wadek Melkahka 103:12-14; Seims 4:8.
Pwehki Siohwa me ketikihong kitail mour, kitail anahne poakohng ih laudsang atail poakohng meteikan. (Mark 12:30) Ni omw kin kasalehda omw limpoak ong Koht sang ni omw kalaudehla omw sukuhlki duwen ih oh wia dahme e kin ketin kupwurki, ke pahn uhdahn karanihala ih.—Wadek 1 Timoty 2:4; 1 Sohn 5:3.
^ par. 4 Nan kawehwehpen lepin mahsen kan nan Paipel en Pohnpei e kawehwehda: “KAUN-O: Nan kawehwe wet lepin mahsen lepet wiliandi Iahweh, mwaren [Koht] ni mahsen en Ipru.”
