POUSEHLAHTE MWASAMWASAHN!
Kaun Lapalap en Palien Roson Mwahu Kaparki Kasuwedpen Social Media ong me Pwulopwul kan—Dahme Paipel Mahsanih?
Nan May 23, 2023, kaun lapalap en palien roson mwahu en United States kaparki wehipokon kasuwedpen social media ong me pwulopwul tohto.
“Mie kamwahupen social media ong ekei seri kan oh me pwulopwul kan, ahpw mie mehn kadehde tohto me social media pil kak suwed ong en seri kan oh me pwulopwul kan roson en madamadau oh paliwararail kan.”—Social Media and Youth Mental Health: The U.S. Surgeon General’s Advisory, 2023.
Roporop kan me kileldi pah kasalehda kahrepen atail kin pwunodki met.
Me pwulopwul kan sang sounpar 12 lel 15 “me kin doadoahngki social media reireisang awa 3 nan ehuehu rahn ele pahn pak riapak ahneki kahpwal en roson en madamadau me duwehte nsensuwed laud oh pwunod.”
Me sounpar 14 kan “me kin kalapw doadoahngki social media, sohte kin meir mwahu, meteikan kin lidere irail nan online, re kin mworuskihla mwomwarail, pehm sohte kateparail oh kin nsensuwed laud. Met kin kalapw wiawihong serepein kan laudsang pwutak kan.”
Ia duwen pahpa oh nohno kan ar kak pere neirail seri kan sang soahng keper pwukat? Paipel kin kasalehda kaweid mwahu kan.
Dahme pahpa oh nohno kan kak wia
Tehk mwahu. Medewehla soahng keper kan oh koasoanehdi ma noumw serio pahn doadoahngki social media de soh.
Kaweid en Paipel: “Padahkihong kisin seri men duwen eh pahn momour.”—Lepin Padahk 22:6.
Ma ke men kalaudehla omw ese duwen met, wadek oaralap “Should My Child Use Social Media?”
Ma ke mweidohng noumw serio en doadoahngki social media, tetehk soahng keper kan me kakete pwarada oh tehk mwahu dahme e kin wia nan online. Ia duwen?
Perehsang noumw serio soahng keper kan. Kaiahne noumw serio en ese kasawihada oh soikala soahng keper kan.
Kaweid en Paipel: “Kumwail dehr kin koasoia duwen tiahk samin me pid wia nsenen pwopwoud oh soangen samin koaros de noahrok koaros, . . . kumwail dehr pil kin wia tiahk kanamenek kan, de lokaia pweipwei de kamwan suwed.”—Episos 5:3, 4.
Mie ekei sawas mwahu kan nan oaralap “Teaching Your Teenager Social Media Safety.”
Koasoanehdi ahnsou. Karasepe, koasoanehdi iahd oh ia uwen werei me noumw seri kan kak doadoahngki social media.
Kaweid en Paipel: “Kumwail pousehlahte tetehk kanahieng duwen amwail kin weweid pwe . . . en duwehte aramas loalokong kan, oh kumwail doadoahngki mwahu amwail ahnsou.”—Episos 5:15, 16.
Doadoahngki kisin kasdo Be Social-Network Smart pwehn sewese noumw serio en wehwehki dahme kahrehda e mwahu en koasoanehdi ahnsoun doadoahngki social media.
