E kin wie malmalaulaula me kin tiahk mwahu. Aramas soumwahu kan kin lemei oh wering toahkte kan; aramas me kin mwenge nan wasahn mwenge kan sohte kin wauneki irail me sahpis ong irail; me kin iang sompihr kan kin lemeiong oh peiong tohndoadoahk en sompihr kan; seri sapeik kan nan sukuhl kin kapailoke, kamasak, oh peiong sounpadahk kan; oh ekei soun politik kan kin wia tiahk kanamenek kan ahpw ekei kin song en kapinga pein arail tiahk mwahu kan.

 Paipel kin kihda kaweid likilik ong tiahk mwahu kan. E pil kin kawehwehda dahme kahrehda aramas tohto sohte kin kasalehda tiahk mwahu rahnwet.

 Malaulaulahn tiahk mwahu uhdahn sansal nan sampah pwon.

•   Nin duwen me ehu roporop kasalehda, mehn wai kan kamehlele me tiahk mwahu en aramas akan nan Wehin Amerika ahnsou wet uhdahn suwedsang sounpar 22 samwalahro.

•   Pil ehu roporop me wiawihong aramas daulih 32,000 nan sahpw 28, persent 65 koasoia me tiahk en aramas uhdahn suwedsang dahme re kin kilang.

 Paipel kohpadahr duwen tiahk kan me kitail kilangehr.

•   “Uhdahn pahn mie ahnsou apwal ekei ni imwin rahn akan. Aramas pahn roporop ong pein irail, mehwo, aksuwei oh pohnmwahso; re pahn kamwakara, re sohte pahn peikiong ar pahpa oh nohno kan, oh re sohte pahn kin kasapahlkalahnganki mehkot, . . . irail pahn sempoak, [oh] lemei.”—2 Timoty 3:1-3.

 Pwehn kalaudehla omw wehwehki ia duwen kokohp wet eh pweida, menlau wadek artikelo “Did the Bible Predict the Way People Think and Act Today?”

 Nan sampah ehu me malaulau tiahk mwahu, aramas rar rar kei diarada me Paipel kin kihda kaweid mwahu ong tiahk mwahu. Eh kaweid kan kin “mehlel oh pwung” kohkohlahte. (Melkahka 111:8) Medewehla ekei karasepe:

•   Dahme Paipel mahsanih: “Soahng koaros me kumwail men aramas en wiahiong kumwail, kumwail pil anahne wiahiong irail.”—Madiu 7:12.

   Wehwehn met: Kitail anahne kadekohng oh wauneki meteikan, duwehte atail men irail en wiahiong kitail.

•   Dahme Paipel mahsanih: “Pwehki amwail keselahr likamw, emenemen kumwail en kin lokaia mehlel ong mehn mpamwail.”—Episos 4:25.

   Wehwehn met: Kitail anahne mehlel ni soahng koaros me kitail nda oh wia.

 Pwehn kalaudehla omw wehwehki oaralap wet, menlau wadek:

•   Kahn Iroir me oaralape “Dahme Pwung oh Sapwung—Kaweid me Ke Kak Likih.”

•   Artikelo “Tolerance—How the Bible Can Help.”