Aramas akan eselahr Sounkadehdehn Siohwa kan pwehki arail doadoahk en kawehwe. Leledo ni sounpwong en November 2014, kitail kawehwehdier Paipel ni lokaia 125 oh sawaspen Paipel kan ni lokaia 742. Kitail pil kawehwehda kisin kasdo kan. Nan January 2015, kisin kasdo me oaralap Dahme Kin Wiawi nan Atail Wasahn Kaudok? kawehwehdier ni lokaia 398, oh kisin kasdo Dahme Kahrehda Ken Onopki Paipel? pil mieier ni lokaia 569. Dahme kahrehda oh pil ia duwen met eh kin wiawi?

Nan March 2014, Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan kaweidki ohpis en Sounkadehdehn Siohwa kan nan sampah pwon ren kawehwehda audepen kisin kasdo kan ong soangsoangen lokaia kan me re kak pwehn sewese doadoahk en onop Paipel.

Pwehn kawehwe ehu kisin kasdo, mie kahk kan me re anahne idawehn. Keieu, pwihnen kawehweo pahn kawehwehda audepen kisin kasdou. Mwuhr, irail kan me kin uhdahn lokaiahki lokaiahn sahpwo kin pilipilda pwehn ndahla ehuehu ngilen lepin koasoi kan nan kasdou. Mwurin mwo, pwihnen audio/video kin rekord ngilen lokaia ko me kawehwehdier, kamwahwihala dahme re rekordihdi, oh wiahda nting kan pwehn mi nan screen. Mwurin mwo, ngilen kasdo, nting kan, oh audepen kasdou pwon kin patpene oh wiahla file ehu me kak kohda nan website.

Nan ekei ohpis en Sounkadehdehn Siohwa kan, mie wasahn rekord oh mie irail kan me kaiahnda pwehn wia doadoahk wet. Ahpw ia duwen lokaiahn sahpw kan me kin kawehwehdi nan wasahn kawehwe me dohsang ohpis en Sounkadehdehn Siohwa kan?

Nan sampah pwon, soundoadoahk en audio kan kin wahda neirail dipwisou en rekord kan oh kohla doadoahk. Re kin wiahda wasahn rekord nan ohpis ehu, Wasahn Kaudok, de pil ni imwen emen, pwehn rekord ongete erein ahnsou ehu oh kin doadoahngki microphone oh soangen laptop computer me mie software ong rekord. Irail me kin lokaiahki lokaiahn sahpwo kin pilipilda pwehn wia sounwadawad, sounkaweid mwomwen wadawad en lepin lokaia kan, oh sountetehk wadawado ma e pwungiong dahme ntingdi. Ni ahnsou me doadoahk en rekordo nek oh re pwungki, soundoadoahk en audio pahn kihpene eh dipwisou en doadoahk kan oh pil kohla wasa me koasoandier en doadoahk mwuhr.

Ni arail kin wia met, kisin kasdo kan kin wiawihda ni soangsoangen lokaia kan me pak siluh tohtohsang me wiawihda mwoweo.

Aramas ar mwekidki kisin kasdo pwukat uhdahn kapwuriamwei. Ong me tohto, neitail kisin kasdo kan iei ehdin me re kilang me wiawihda ni pein arail lokaia.

Ehu lokaiahn sahpw me rekordi iei lokaiahn Pitjantjatjara, me aramas tohtohsang 2,500 nan Australia kin lokaiahki. Irail wiahda rekord en lokaia wet nan Alice Springs nan Northern Territory. Emen brother me sewese rekord ngilen kasdou, Callan Thomas, nda: “Tohn wasaht inenen perenki kilang kisin kasdo pwukat oh kin idihdek ia wasa irail kak diar ekei kasdo pwukat. E apwal en diarada pwuhk kan me kawehwehdi ni lokaia wet. Ni arail rong​—ahpw mehlel ni arail kilang​—re kin uhdahn perenkihda.”

Sounkadehde riemen nan Cameroon dake werera wahro seisei kohdahla nan pillap ehu. Ira uhdi ni kousapw en keinek en aramas mwotomwot ehu (Pygmy) oh koasoiong soumas en wasao, me pil wia emen sounpadahk nan arail sukuhlo. Mwurin ara esehda me soumas en wasao kin lokaiahki lokaiahn Bassa, brother riemeno doadoahngki neira tableto oh kasalehiong kisin kasdo Dahme Kahrehda Ken Onopki Paipel? ni pein eh lokaia. Soumaso uhdahn pwuriamweikihla oh peki en ale ekei nah kisin pwuhk kan.

Nan kisin kousapw kis nan Indonesia, kaunen pelien lamalam en wasao kin uhwong Sounkadehdehn Siohwa kan, oh e isikala sawaspen Paipel koaros me Sounkadehde ko kihdi wasao. Ekei tohn wasao pil nda me re pahn isikala Wasahn Kaudoko. Mwuhr, pilismen pahmen kohla ni imwen emen Sounkadehde oh kapeidakih sistero oh eh peneinei. Irail men ese dahme kin wiawi nan Wasahn Kaudoko, ih eri kasalehiong irail kisin kasdou me oaralape Dahme Kin Wiawi nan Atail Wasahn Kaudok? ni lokaiahn Indonesia.

Mwurin arail kilang kasdou, emen pilismen ko nda: “Met I esehda me aramas ako sohte wehwehki duwen kumwail oh re pil sohte uhdahn esei kumwail.” Pil emen pilismen ko idek: “I kak naineki kisin kasdo wet pwehn kasalehiong meteikan? Kisin kasdo wet kasalehda ni pwung duwen kumwail.” Met pilismen ko kin ahneki madamadau pwung duwen Sounkadehde kan oh pil kin sewese pere irail.

Ma ke saikinte kilang kisin kasdo pwukat, ke seu ale oh kilang ehu kasdo pwukat ni pein omw lokaia?