Sauda bandera. Tustumuñas di Jeova fia kuma, mpina dianti di bandera i saudal ora ku inu na kantadu, i un atu di adorason ku ta ngaba un tera o un lider suma salbadur en ves di ngaba Deus suma salbadur. (Isaias 43:11; 1 Koríntius 10:14; 1 Jon 5:21) Un di es lideris i Rei di antigu Babilonia comadu Nabukodonosor. Pa leba jintis fika adimiradu ku si gloria i ku si zelu pa riliẑion, es rei puderosu lantanda un statua i manda pa tudu jintis ku sta bas di si renu mpina dianti di ki statua ora ke obi musika na kantadu suma inu. Ma, tris ebreus — Sadraki, Mesaki, ku Abednegu — nega mpina dianti di statua mesmu ku pena di morti. — Daniel, kapitulu 3.

Un storiadur comadu Carlton Hayes fala kuma na no tempu, “bandera i simbulu prinsipal di fe na nasionalismu tambi i objetu di adorason”, i fala inda kuma “omis ta tira ŝapeu ora ku bandera na pasa, puetas ta skirbi puemas pa ngaba bandera i mininus ta kanta inu nasional.” I fala mas kuma nasionalismu tene si “dias santu”, suma pur izemplu, dia di indipendensia di un tera. Tambi es storiadur fala ki, nasionalismu tene si “dia di erois” ku si “santuarius” o munumentus. Na un sirmonia publiku na Brazil prisidenti di Supremu Tribunal Militar fala sin: “Bandera ta dadu rispitu garandi i ta adoradu. . . suma ku patria ta adoradu.” Un insiklopedia ciga di fala: “Bandera i sagradu suma ku krus i sagradu,” The Encyclopedia Americana.

 I ka tarda, es insiklopedia fala inda kuma inus nasional “i spresons di sintimentus di patriotismu ku ta nklui un pididu pa Deus orienta i proteẑi povu ku si guvernantis.” Tustumuñas di Jeova ka ta mostra falta di razuabilidadi ora ke na nkara iventus patriotiku ku ta nvolvi saudason di bandera ku kanta inu nasional suma un atu di adorason. Oca ki na fala di manera ku fijus di Tustumuñas di Jeova ta nega sauda bandera o jura fidelidadi na skolas di Stadus Unidus, un livru fala sin: “Na manga di kasus ku pasa ja na Supremu Tribunal i cigadu konkluson di kuma es pratikas i sta ligadu ku adorason.” — The American Character.

Tustumuñas di Jeova ka ta partisipa na iventus ke oja kuma i ka sta di akordu ku ke ki Biblia fala, ma e ta rispita diritu ku utrus tene di partisipa. E tene tambi rispitu pa banderas ku simbulus nasional i e ta rikuñisi guvernantis ofisial suma “otridadi ku sta riba” di nos i ku sta na “sirvis di Deus”. (Romanus 13:1-4) Tustumuñas di Jeova ta obdisi konsiju ku fala pa ora “pa reis, ku tudu otridadi”. Motivu di no fasi kila i pa “no pudi tene un vida ketu, susegadu, ku tudu rispitu pa Deus, ku bon komportamentu.” — 1 Timótiu 2:2.

Vota na eleisons pulitiku. Kristons di bardadi ta rispita diritu ku utrus tene di vota. E ka ta fasi manifestasons kontra eleisons, e ta obdisi otridadis ku kujidu na eleisons. Ma e disidi manti neutru na asuntus pulitiku di nasons. (Mateus 22:21; 1 Pedru 3:16) Ke ku un kriston dibi di fasi si i sta na un tera nunde ki votu i obrigatoriu, o nunde ku jintis ta revolta kontra kilis ku ka bai vota? Un kriston ku sta nes situason talves pudi lembra di kuma Sadraki, Mesaki, ku Abednegu baiba te na planisi di Dura, asin i pudi tambi disidi bai si si konsiensia pirmitil fasi kila. Ma, i na toma kuidadu pa ka viola si neutralidadi. I dibi di lembra di es seis prinsipius:

1. Sigiduris di Jesus “i ka di mundu”. — Jon 15:19.

2. Kristons ta representa Kristu ku si Renu. — Jon 18:36; 2 Koríntius 5:20.

3.   Kongregason kriston sta unidu na se krensas, i si membrus sta unidu pa amor kriston. — 1 Koríntius 1:10; Kolosensis 3:14.

4. Kilis ku ta kuji algin pa un kargu, tene parti di responsabilidadi pa ke ku si dunu fasi. Jubi prinsipiu ku sta na palabras di 1 Samuel 8:5, 10-18; ku 1 Timótiu 5:22.

5. Oca israelitas misti un rei umanu Jeova nkara kila suma si kontra e negal. — 1 Samuel 8:7.

6. Kristons dibi di tene un konsiensia limpu ora ke na papia ku jintis di tudu partidus pulitiku aserka di Renu di Deus. — Mateus 24:14; 28:19, 20; Ebreus 13:18.

Sirvisu sivil alternativu. Na sertus teras, guvernu ta spera pa kilis ku nega fasi sirvisu militar fasi un sirvisu sivil alternativu pa un tempu. Ora ku no sta nes situason i no sta pa toma un disison, no dibi di ora aserka di asuntu, papia ku un kriston maduru, i dipus toma no disison basiadu na ke ku no aprindi aserka di asuntu. — Ditus 2:1-5.

Palabra di Deus fala pa no ‘baŝa pa gubernu ku otridadis, pa no obdisi elis, pa no sta pruntu pa fasi tudu bon tarbaju, . . . no sedu mansu pa tudu jinti.’ (Titu 3:1, 2) Ku es na menti, no pudi fasi no kabesa es purguntas: ‘Sera ki seta es sirvisu sivil alternativu na leban viola ña neutralidadi o i na nvolvin ku riliẑion falsu?’ (Mikeias 4:3, 5; 2 Koríntius 6:16, 17) ‘Sera ki fasi es tarbaju na kansan na kumpri ña responsabilidadis kriston o te mesmu i ka na pirmitin kumpri es responsabilidadis?’ (Mateus 28:19, 20; Efésius 6:4; Ebreus 10:24, 25) ‘Sera ki programa di ki tarbaju na pirmitin omenta ña partisipason na atividadis spiritual, talves entra na sirvisu di tempu kompletu?’ — Ebreus 6:11, 12.

Si konsiensia di un kriston pirmitil fasi un sirvisu sivil alternativu en ves di bai pa prison, si kumpañeris kriston dibi di rispita si disison. (Romanus 14:10) Ma si i oja kuma i ka pudi fasi ki sirvisu, utrus dibi di rispita tambi si disison. — 1 Koríntius 10:29; 2 Koríntius 1:24.