Ora ki un familia tokadu o un amigu intimu dizasosiadu di kongregason pabia di falta di ripindimentu di si pekadu, kila ta fasinu fika ku dur garandi. No manera di nkara orientason di Biblia aserka di es asuntu pudi revela amor garandi ku no tene pa Deus, tambi i pudi revela si kontra no sedu fiel pa si aranẑus. * Jubi alguns purguntas ku pudi surẑi aserka di es asuntu.

Kuma ku no dibi di trata un algin dizasosiadu? Biblia fala: “Ka bo junta ku kilis ku ta fala kuma e sedu ermons, ma e ta yanda na mau vida, o ku ta fasi risu mon, o ku ta adora idulus, o ku ta papia mal di utrus, o camiduris, o furtaduris; ki koldadi, nin ka bo kume ku elis.” (1 Koríntius 5:11) Aserka di kualker algin ku “ka fika dentru” di “nsinamentu di Kristu”, Biblia fala: “Ka bo falal manteña di ermondadi, pabia kil ku falal manteña i ta toma parti na kusas mau ki na fasi.” (2 Jon 9-11) No ka ta asosia o papia di kusas spiritual ku un algin ku dizasosiadu. A Sentinela di 15 di dizembru di 1981 paẑina 21 fala asin: “Un simplis ‘manteña’ pudi sedu purmeru pasu ku na leba na kombersa i talves na un amizadi. Sera ki no misti da es pasu ku un algin dizasosiadu?”

Sera ki i pirsis ivita tudu kontaktu ku un algin dizasosiadu? Sin i pirsis, pabia di manga di razons. Purmeru, i un asuntu di lealdadi pa Deus i pa si Palabra. No ka ta obdisi Jeova so ora ki sedu fasil, ma tambi ora ki sedu difisil. Amor pa Deus ta motivanu obdisi tudu si mandamentus, pabia no sibi kuma el i justu i amanu, tudu si leis i pa no benefisiu. (Isaias 48:17; 1 Jon 5:3) Sugundu, korta tudu relasionamentu ku algin ku dizasosiadu ta proteẑinu, tambi i ta proteẑi utrus membrus di kongregason kontra kontaminason spiritual ku  moral i manti bon nomi di kongregason. (1 Koríntius 5:6, 7) Terseru, no firmeza na sigi prinsipius di Biblia pudi te mesmu juda ki algin dizasosiadu. Si no apoia disison di kumison judikativu, no pudi toka korson di ki algin dizasosiadu ku ka seta ajuda di ansions. Si i pirdi si bon relasionamentu ku si familiaris, kila pudi fasi pa si “sintidu rabida” i pa i oja seredadi di si pekadu, i asin da pasus pa riba pa Jeova. — Lukas 15:17.

Ke gora si un membru di no familia dizasosiadu? Nes situason, relasionamentu ku ta ten entri familiaris pudi testa no lealdadi pa leis di Jeova. Kuma ku no dibi di trata un membru di no familia ku dizasosiadu? No ka pudi fala di tudu situasons ku pudi surẑi, ma no na konsentra gosi na dus situasons prinsipal.

Na sertus kasu, membru di familia ku dizasosiadu pudi mora inda na mesmu kasa ku si familia. Suma dizasosiason ka ta kaba ku lasus familiar, atividadis normal di kada dia ku relasionamentu pudi kontinua. Ma, atraves di si konduta, algin ku dizasosiadu kuji korta relasionamentu spiritual ku temba entri el ku si familia. Pabia di kila, membrus fiel di familia ka pudi tene mas un relasionamentu spiritual ku el. Pur izemplu, ora ke na fasi studu di familia, si ki algin dizasosiadu sta la, i ka dibi di partisipa na studu. Ma, si algin dizasosiadu i menor di idadi, si papes tene inda responsabilidadi di dal instruson ku disiplina. Asin, papes na fasi aranẑu pa studa Biblia ku el. * — Ditus 6:20-22; 29:17.

Utru ora, algin dizasosiadu pudi ka mora juntu ku si familia. Mesmu ki na pirsis un kontaktu limitadu na alguns mumentu pa trata di asuntus ki pirsis trata, kil kontaktu dibi di limitadu. Membrus fiel di familia ka dibi di buska manera di tira diskulpa pa pudi tene kontaktu ku se familia ku dizasosiadu ma ku ka mora juntu ku elis. En ves di  kila, lealdadi pa Jeova i pa si organizason na leba elis apoia aranẑu di dizasosiason. Sedu firmi na sigi normas di Jeova ta benefisia ki algin ku dizasosiadu, kila pudi judal benefisia di disiplina ki risibi. * — Ebreus 12:11.