Jeova misti pa kilis ku kasa pa e manti fiel pa se votu di kasamenti. Oca ku Jeova fasi pa purmeru omi ku purmeru minjer kasa, i fala: “Omi ten ku . . . junta ku si minjer; elis dus e ta sedu un kurpu son.” Mas tardi, Jesus Kristu ripiti es mesmu diklarason, dipus i fala: “E ku manda, kil ku Deus junta, omi ka dibi di rapatil.” (Kumsada 2:24; Mateus 19:3-6) Asin, Jeova ku Jesus ta nkara kasamenti suma un kusa pa tudu vida ku pudi kaba so ora ku un di parseru muri. (1 Koríntius 7:39) Suma kasamenti i un kusa sagradu, i pirsis pensa dus bias antis di kaba kel. Na bardadi  Jeova odia pa kaba kasamenti sin basi bibliku. — Malakias 2:15, 16.

Di akordu ku Biblia, ke ku pudi pui pa un kasamenti kaba? Jeova odia adulteriu ku pekadu seksual. (Kumsada 39:9; 2 Samuel 11:26, 27; Salmu 51:4) Na bardadi, Jeova odia pekadu seksual te na puntu ki pirmiti pa i sedu motivu di kaba kasamenti. (Pa sibi ke ku nvolvi pekadu seksual, jubi Kapitulu 9, paragrafu 7, nunde ki dadu splikason aserka di pekadu seksual.) Si i ten adulteriu na un kasamenti, Jeova da parseru inosenti liberdadi di disidi si na kontinua na kasamenti o kaba kel. (Mateus 19:9) Asin, si i disidi kaba kasamenti, Jeova sta di akordu ku kila. Ma ermons na kongregason ka dibi di nsentiva ningin pa kaba kasamenti. Pabia i ten situasons ku talves pudi pui pa ki algin inosenti fika ku si parseru, spesialmenti si si parseru ripindi di si pekadu. Ma kilis ku tene basi bibliku pa kaba kasamenti ku dibi di toma se propi disison i seta rusultadu ku se disison pudi tisi. — Gálatas 6:5.

Na sertus situasons muitu difisil, alguns kristons disidi sipara ku se parseru o kaba kasamenti ku elis apesar di kuma se parseru ka fasi pekadu seksual. * Nes situason, Biblia fala kuma, kil ku abandona si parseru dibi di “fika sin kasa, o nta pa i torna ku si” parseru. (1 Koríntius 7:11) Es kriston ka sta livri pa kasa ku utru algin. (Mateus 5:32) Jubi alguns situasons nunde ku utrus oja kuma i ten basi pa siparason.

Nega da sustentu ku diskarna. Un familia pudi sta na vivi mal, ku falta di kusas basiku pa vivi kel, pabia di kuma, omi, apesar di kuma i pudi ranja kusas pa relis, i nega fasil. Biblia fala: “Si algin ka ta trata di si parenti, purmeru kilis ku mas pertu el, i nega si fe; i pior di ki algin ku ka sedu krenti.” (1 Timótiu 5:8) Si es koldadi omi nega muda si manera, minjer pudi disidi sipara kel na tribunal, pa proteẑi si kabesa  ku si fijus. Ora ku ansions risibi akusason di kuma un omi nega sustenta si familia, e dibi di jubi diritu es akusason. Pabia si algin nega sustenta si familia kila pudi pui pa i dizasosiadu.

Abusu fisiku di mampasada. Un omi o un minjer pudi aẑi ku violensia kontra si kumpañer tok si saudi o te mesmu si vida ta sta na pirigu. Si omi o minjer ku ta abusa na si kumpañer i kriston, ansions dibi di nvestiga es situason. Paña raiba sempri o tene un komportamentu violentu pudi sedu motivu di dizasosiason. — Gálatas 5:19-21.

Tuji si parseru tene un bon relason ku Jeova. Un omi o minjer pudi tenta sempri fasi pa ka si parseru pratika adorason di bardadi o te mesmu tenta forsal pa viola mandamentus di Deus di algun manera. Nes situason, parseru ku sta na sufri dibi di disidi si kontra buska tene siparason na tribunal i uniku manera ku na judal “obdisi Deus di ki obdisi omis.” — Atus 5:29.

Na tudu es situasons ku faladu del riba, ningin ka dibi di presiona parseru inosenti pa i sipara o pa ka i sipara. I bardadi kuma amigus maduru na sintidu spiritual ku ansions pudi da apoiu ku konsiju basiadu na Biblia, ma e ka pudi sibi tudu ke ku sta na pasa entri un omi ku un minjer. So Jeova ku pudi sibi kila. I klaru di kuma un minjer o un omi kriston ku ta pasanta na konta si purblema di kasamenti so pa pudi sipara ku si parseru, ka sta ja na rispita Jeova o rispita aranẑu di kasamenti. Jeova sibi diritu si kontra algin sta na nventa planus pa pudi sipara, i ka mporta kuma ki tenta sugundil. Na bardadi, “tudu kusa sta nun i klaru na uju di kil ku no ten ku da konta si dianti.” (Ebreus 4:13) Ma si un situason pirigosu dimas kontinua, ningin ka dibi di kritika un kriston ku oja kuma, si ultimu alternativa i siparason. Pabia “anos tudu no ten ku parsi dianti di tribunal di Deus.” — Romanus 14:10-12.