1, 2. (a) Na kal obra di konstruson ku bu sta nvolvidu nel? (b) Pabia ku kualidadi di bu tarbaju i muitu importanti?

IMAẐINA kuma bu sta na tarbaja duru na un obra di kumpu kasa. Obra toma ja algun tempu, ma i ten inda manga di tarbaju di fasi, tambi i na leba tempu. Te na mumentu ku bu sta inda na tarbaja, tarbaju i duru, ma bu sta kontenti kel. I ka mporta ke ku pudi akontisi, bu sta disididu pa ka disisti o larga mon, pabia kualidadi di tarbaju pudi afeta bu vida, te mesmu i pudi afeta bu futuru. Pabia? Pabia kasa ku bu sta na kumpu i abo propi!

² Disipulu Judas fala di un tarbaju ku no sta na fasi na nos propi. Oca i nsentiva kristons pa “fika sempri dentru di amor di Deus,” na mesmu parti di Biblia, i mostra elis un kusa importanti. I fala elis: “Bo fortifika bo vida riba di bo fe ki puru dimas.” (Judas 20, 21) Kal ki alguns maneras di fortifika bu fe pa bu pudi fika sempri na amor di Deus? No konsentra gosi na tris aspetu di obra di konstruson spiritual ku pudi judau fortifika bu fe.

3. Kuma ku Satanas na tenta nganau pa nkara leis di Jeova?

³ Purmeru, no pirsisa di fortalisi no fe na lei di Jeova. Duranti bu studu di es livru, bu oja manga di leis justu di Jeova aserka di konduta. Kuma ku bu ta nkara es leis? Satanas na tenta nganau pa nkara leis di Jeova, si  prinsipius ku si normas suma un kusa ku na tujiu liberdadi o suma un kusa kruel. I tarda ja na usa es tatika, disna ki sail ben na jardin di Eden. (Kumsada 3:1-6) Sera ki si tatika na sail ben na bu kasu? Tudu na dipindi di bu manera di nkara kusas.

4, 5. (a) Kuma ku no dibi di nkara leis di Deus? (b) Kuma ku no manera di nkara leis di Deus dibi afetanu?

⁴ Suma ilustrason, imaẑina kuma bu sta na pasia na un parki bonitu, bu dianti bu nota kuma i sta un arami ku pudu pa taja utru ladu. Ma ki utru ladu bonitu dimas i bu misti bai la. Na kumsada, talves bu pudi nkara arami suma un kusa ku na tujiu liberdadi. Ma nkuantu bu na jubi pa utru ladu, bu oja un lion ku na serka un limaria pa kume. Gosi bu pasa na nkara arami suma proteson. Sera ki i ten un algin pirigosu ku sta na pirsigiu gosi? Palabra di Deus danu es avisu: “Bo disperta, bo sedu jiru, pabia bo inimigu, ku sedu diabu, i na yanda na bo roda, suma lion ku na somna, i na buska kil ki pudi nguli.” — 1 Pedru 5:8.

⁵ Satanas i un algin malvadu. Suma Jeova ka misti pa no pañadu pa Satanas, i danu leis pa proteẑinu di manga di si “astusia”. (Efésius 6:11) Asin, na kualker mumentu ku no sta na medita na leis di Deus, no dibi di oja nes leis amor di no Pape ku sta na seu. Si no nkara leis di Deus asin, es leis na sedu fonti di suguransa i alegria pa nos. Disipulu Tiagu fala: “Kil ku jubi diritu pa lei pirfitu ku ta liberta, i pega nel, . . . si dunu ta sedu sortiadu na kil ki ta fasi.” — Tiagu 1:25.

6. Kal ki minjor manera di fortifika no fe na leis ku prinsipius justu di Deus? Da izemplu.

⁶ Vivi di akordu ku mandamentus di Deus, i minjor manera di fortifika no fe na Deus ku danu leis, i fortifika no fe na jiresa ku pudi ojadu na si leis. Pur izemplu, “lei di Kristu” nklui ordi ku Jesus danu di sina utrus ‘tudu kusas ki manda.’ (Gálatas 6:2; Mateus 28:19, 20) Kristons ta  pui seredadi tambi na obdisi ordi di mati sempri runions pa adora Deus i pa fortifika n̈utru. (Ebreus 10:24, 25) Mandamentus di Jeova nklui tambi konsiju di ba ta ora sempri i fasil di fundu di no korson. (Mateus 6:5-8; 1 Tesalonisensis 5:17) Ora ku no na vivi di akordu ku es mandamentus, no ta oja di manera mas klaru di kuma es mandamentus i orientasons amorosu. Obdisi es mandamentus ta danu sertu medida di kontentamentu ku nunka ka pudi ojadu na utru lugar di es mundu komplikadu. Ora ku bu medita na benefisius ku bu tene pabia di vivi di akordu ku leis di Deus, sera ki bu fe nes leis ka ta fika mas forti?

7, 8. Kuma ku Palabra di Deus nkoraẑa kilis ku ta preokupa si kontra e na kontinua fasi sempri ke ki justu?

⁷ Utru ora, alguns jintis ta preokupa si kontra i ka na bin sedu difisil dimas pa relis kontinua sempri apegadu na leis di Jeova. E ta tene medu di kuma e pudi bin yara. Si bu ciga ja di sinti asin, lembra sempri di es palabras: “Asin ku SIÑOR, bu Libertadur, Deus Santu di Israel, fala: “Ami i SIÑOR bu Deus, ku ta nsinau kusas mas minjor pa bo, ku ta giau na kamiñu ku bu dibi di yanda. A, i pena!  Si bu sukutaba ña mandamentus, bu pas na seduba suma korenti di yagu na riu; bu retidon i na sedu suma ondas di mar.” (Isaias 48:17, 18) Bu ciga ja di para pa pensa na nkoraẑamentu ku es palabras ta danu?

⁸ Nes versikulus, Jeova sta na lembrantanu kuma si no obdisil, no na tene benefisius. I promiti dus benefisius. Purmeru, no na tene pas kontinuadu suma un riu. Sugundu, no retidon na sedu suma ondas di mar. Ora ku bu sta na bera di mar bu na jubi ondas di mar ku na bati sempri na bera di mar, sin duvida bu ta tene sintimentu di un kusa permanenti. Bu sibi kuma ondas na kontinua bati na bera di mar pa sempri. Jeova fala kuma bu retidon, ku sedu, bu manera di fasi ke ki sertu, pudi sedu permenenti si bu obdisil. Si bu kontinua sforsa pa sedu fiel pa rel, nunka i ka na disau pa bu falia! (Lei Salmu 55:22.) Sera ki obi es promesa ka ta fortifika bu fe na Jeova i na si leis justu?

9, 10. (a) Pabia ki bon pa un kriston buska yangasa madureza? (b) Pabia ku tene pontu di vista spiritual ta tisi alegria?

⁹ Sugundu aspetu di bu obra di konstruson reveladu nes palabras nspiradu: “No avansa pa madureza” (Ebreus 6:1, NM) Madureza i un bon objetivu pa un kriston buska yangasa. Perfeison lunju nos inda, ma algin pudi yangasa madureza. Alen di es, kristons ta tene kontentamentu garandi ora ke na sirbi Jeova suma jintis maduru. Pabia ku no pudi fala es?

¹⁰ Un kriston maduru i un algin spiritual. I ta nkara kusas suma ku Jeova ta nkaral. (Jon 4:23) Apostulu Paulu fala: “Kilis ku ta vivi di akordu ku karni ta fiksa se menti na kusas karnal, ma kilis ku ta vivi di akordu ku spiritu, ta fiksa se menti na kusas di spiritu.” (Romanus 8:5, NM) Alegria di un algin ku tene pontu di vista karnal i pikininu,  pabia es tipu di pontu vista i di iguismu, i ka ta oja lunju, tambi i ta konsentra na kusas material. Algin ku tene pontu di vista spiritual ta tene manga di kontentamentu, pabia i ta konsentra na Jeova, “Deus filis”. (1 Timótiu 1:11, NM) Un algin spiritual ta sta ansiosu pa kontenta Jeova mesmu na mumentu ki na pasa difikuldadi. Pabia? Pabia difikuldadis ta dal opurtunidadi di mostra kuma Satanas i munturus, tambi i ta dal opurtunidadi di fortalisi si lealdadi, i kontenta no Pape ku sta na seu. — Ditus 27:11; lei Tiagu 1:2, 3.

11, 12. (a) Ke ku Paulu fala aserka di kapasidadi di ntindimentu di un kriston? (b) Ke ku signifika palabra gregu ku traduzidu “trena”? (c) Ke ku nvolvi trenamentu di un bebe ku di un atleta?

¹¹ Pa sedu un algin spiritual i maduru i pirsis trenamentu. Jubi so es versikulu: “Alimentu risu i pa jintis maduru, pa kilis ku atraves di usu e trena se kapasidadi di ntindimentu pa diferensia ben ku mal.” (Ebreus 5:14, NM) Oca apostulu Paulu fala di “trena” kapasidadi di ntindimentu, i usa un palabra gregu ku talves ta usaduba na kampu di fasi jinastika na Gresia na purmeru sekulu, pabia es palabra pudi traduzidu ‘trena suma un atleta.’ Gosi pensa na ke ku nvolvi es tipu di trenu.

¹² Ora ku no kumsa padidu, no kurpu ka sta inda trenadu. Pur izemplu, un bebe pudi ntindi so alguns muvimentus di si mon ku pes. Asin, i ta sakudi si mons sin sintidu, tok utru ora i ta suta si kara, kusa ku pudi surprendil o kausal dur. Ma puku-puku, atraves di usu, si kurpu ta kumsa ku trenadu. Bebe ta kumsa ku n̈atiña, dipus i ta kumsa ku yanda, dipus i ta kuri. * Ke ku no pudi fala di un atleta? Ora ku bu oja un  atleta na vira na ar i na fasi manobra bonitu sin falia, sin duvida bu ta ciga konkluson di kuma kurpu i suma un makina ku ta tarbaja ben. Atleta ka dati i tene ki abilidadi so pa azar, i toma manga di tempu pa fasi trenu. Biblia fala kuma es tipu di trenamentu “ten sertu purbitu”. Ma trenamentu spiritual di no kapasidadi di ntindimentu tene inda mas balur! — 1 Timótiu 4:8.

13. Kuma ku no pudi trena no kapasidadi di ntindimentu?

¹³ Nes livru, no fala ja ciu di kusas ku pudi judau trena bu kapasidadi di ntindimentu pa bu pudi manti fiel pa Jeova suma un algin spiritual. Fasi orason, i pensa na prinsipius di Deus ku si leis ora ku bu na toma disison di kada dia na bu vida. Kualker disison ku bu sta pa toma, punta bu kabesa: ‘Kal leis o prinsipius di Biblia ku ta aplika nes asuntu? Kuma ku N pudi aplika elis? Kal disison ku na kontenta ña Pape ku sta na seu?’ (Lei Ditus 3:5, 6; Tiagu 1:5.) Kada disison ku bu toma basiadu na prinsipius ku leis di Deus, na trena mas inda bu kapasidadi di ntindimentu. Es trenamentu na judau sedu un algin spiritual i kontinua sedu asin.

14. (a) No pirsisa di faima pa kal kusas pa pudi kirsi na sintidu spiritual? (b) Kal kuidadu ku no pirsisa di toma?

¹⁴ Algin pudi disenvolvi tok i sedu maduru, ma kirsimentu spiritual ka ta para. Pa i ten kirsimentu i pirsis alimenta. Apostulu Paulu fala: “Alimentu risu i pa jintis maduru.” Pa fortifika bu fe, i importanti pa bu kume  sempri alimentu risu na sintidu spiritual. Ora ku bu sta na aplika diritu ke ku bu aprindi, bu ta sta na mostra jiresa. Biblia fala: “Jiresa i kusa mas importanti”. Asin, no pirsisa di faima sempri pa kusas spiritual ku no Pape ta danu. (Ditus 4:5-7; 1 Pedru 2:2) I klaru di kuma tene kuñisimentu ku jiresa ku bin di Deus ka dibi di fasinu pa no sedu orgulyosu. No dibi di izamina sempri no kabesa pa ka disa orgulyu o utru frakesa kria rais i kirsi na no korson. Apostulu Paulu fala: “Bo jubi bo kabesa, bo julga si bo na vivi na fe inda.” — 2 Koríntius 13:5.

15. Pabia ku amor i importanti na kirsimentu spiritual?

¹⁵ Obra di kumpu kasa pudi kaba, ma talves i pudi ten inda alguns tarbaju di akabamentu. Manutenson ku reparason i importanti, tambi i pudi sedu nesesariu buri aneksu pabia di mudansa di situasons. Ke ku no pirsisa di fasi pa pudi sedu maduru i manti no spiritualidadi? Purmeru di tudu, no pirsisa di tene amor. No pirsisa di omenta sempri amor ku no tene pa Jeova i pa no kumpañeris di adorason. Si no ka tene amor, tudu kuñisimentu ku no pudi tene ku no obras na sedu suma mon di sal na yagu. (1 Koríntius 13:1-3) Atraves di amor, no pudi yangasa madureza kriston i kontinua kirsi na sintidu spiritual.

16. (a) Kal tipu di pensamentus ku Satanas ta tenta fasi jintis tene? (b) Kal feramenta ku Jeova danu pa proteẑi kel?

¹⁶ No jubi mas un aspetu di bu obra di konstruson. Pa pudi fortifika bu fe suma verdaderu sigidur di kristu, bu pirsisa di proteẑi bu manera di pensa. Satanas, ku sedu guvernanti di es mundu, i mestri di fasi jintis tene pensamentus negativu, di ka tene konfiansa na se kabesa, i di kai na disisperu. (Efésius 2:2) Es tipu di pensamentu  i pirigosu pa un kriston suma ku bagabaga i pirigosu pa un kasa di madera. Filismenti Jeova danu un feramenta pa proteẑinu, ku sedu, speransa.

17. Kal izemplu ku sta na Palabra di Deus ku ta mostra importansia di speransa?

¹⁷ Biblia fala di diferentis partis di armadura spiritual ku no pirsisa del pa gera kontra Satanas ku si mundu. Un parti importanti di es armadura i kapasiti, “speransa di salbason”. (1 Tesalonisensis 5:8) Na tempus bibliku, un soldadu sibiba kuma si i ka pui kapasiti na gera i pudi muri. Manga di bias, es kapasiti ta fasiduba ku metal dipus i ta foradu ku kuru, asin kapasiti pudi proteẑi kabesa di kusas ku lansadu kontra el. Suma ku kapasiti ta proteẑi kabesa, asin tambi ku speransa ta proteẑi bu menti, bu manera di pensa.

18, 19. (a) Kal izemplu ku Jesus disa na asuntu di kontinua tene speransa? (b) Kuma ku no pudi imital?

¹⁸ Jesus i prinsipal izemplu di algin ku kontinua tene speransa. Bu lembra di ke ki sufri na si ultimu noiti ocal na Tera? Un di si amigu intimu trail pabia di diñeru. Utru te mesmu nega kuma i ka kunsil. Utrus abandonal e kuri. Jintis di si tera propi vira kontra el e pidi pa soldadus romanus matal atraves di turtura. No pudi fala kuma Jesus nfrenta provasons mas difisil ku ningin ka na ciga di nfrenta. Ke ku judal aguenta es tudu? Ebreus 12:2 ruspundi: “Pabia di alegria ku staba si dianti i aguenta staka di turtura, i dispreza borgoña, i bai sinta na direita di tronu di Deus.” Jesus nunka ka pirdi di vista “alegria ku staba si dianti.”

¹⁹ Kal alegria ku staba dianti di Jesus? Jesus sibiba kuma aguenta difikuldadis na kontribui pa santifikason di nomi santu di Jeova. Tambi i sibiba kuma kila na da prova mas garandi di kuma Satanas i munturus. I ka tenba speransa ku pudiba da Jesus alegria mas garandi di ki es! Tambi  i sibiba kuma Jeova na rekompensal pa manera ki manti fiel, ku sedu, i na volta sta mas juntu ku si Pape. Jesus mantiba es speransa alegri na si menti mesmu na pioris mumentu. No pirsisa tambi di fasi mesmu kusa. Anos tambi no tene alegria ku sta no dianti. Jeova da kada un di nos privileẑiu di juda na santifika si nomi. No pudi mostra kuma Satanas i munturus si no kuji Jeova suma no suberanu i manti sempri na amor di no Pape na kualker difikuldadi ku tentason ku no pudi pasa.

20. Ke ku pudi judau kontinua tene pensamentu pusitivu ku speransa?

²⁰ Jeova ka sta so dispostu pa rekompensa si servus fiel, ma tambi i sta ansiosu pa fasi kila. (Isaias 30:18; lei Malakias 3:10) I tene vontadi di satisfasi diseẑus koretu di si servus. (Salmu 37:4) Asin, manti bu menti konsentradu na speransa ku stanu dianti. Nunka ka bu disa pa pensamentus negativu di mundu di Satanas ku ka bali dominau. Si bu sinti kuma spiritu di es mundu sta na entra na bu menti o korson fasi orason intensu pa pidi pa Jeova dau “pas di Deus ku pasa tudu ntindimentu”. Es pas ku bin di Deus na proteẑi bu korson ku bu kapasidadi mental. — Filipensis 4:6,7.

21, 22. (a) Kal speransa gloriosu ku “garandi multidon” tene? (b) Na speransa ku kristons tene, kal ku bu mas misti oja? (c) Ke ku bu sta disididu pa fasi?

 ²¹ Es i speransa maravilyosu di pensa nel! Si bu fasi parti di “garandi multidon” ku na bin “sai di garandi tribulason”, pensa na vida ku bu na bin tene nin i ka na tarda. (Apokalipsi 7:9, 14, NM) Ora ku Satanas ku si dimonius ka izisti mas, bu na sinti diskansu garandi ku bu ka pudi imaẑina gosi. Kin di nos ku nunka ciga di vivi sin preson di mau nfluensia di Satanas? Ora ku es preson ka izisti mas i na ten alegria di tarbaja pa bidanta Tera na un paraisu bas di orientason di Jesus ku si 144.000 ku na guverna juntu kel na seu! No sta ansiosu di oja duensas kabadu kel, di risibi di volta no parentis o amigus ku muri, i di vivi suma ku Deus mistiba pa no vivi! Nkuantu no na avansa pa perfeison, un rekompensa garandi na akontisi, Romanus 8:21 fala: “E na risibi liberdadi glorisu di fijus di Deus.”

²² Jeova misti pa bu tene liberdadi garandi ku bu ka pudi imaẑina. Pa tene es liberdadi i dipindi di obidiensia. Sera ki i ka bali pena fasi sforsu gosi di obidisi Jeova kada dia? Sin i bali pena! Asin, kontinua fortifika bu fe ki puru dimas pa bu pudi fika sempri na amor di Deus!