Prezadu leitor ku ama Jeova:

Jesus fala: “Bo ta kunsi bardadi; bardadi ta liberta bos.” (Anos ku pui italiku; Jon 8:32) Es palabras i nkoraẑanti dimas! Na bardadi, i pusivel kunsi bardadi, mesmu nes “ultimus dias” difisil nunde ku mintida mas ciu. (2 Timótiu 3:1, NM) Bu lembra oca ku bu kumsa kunsi bardadi ku sta na Palabra di Deus pa purmeru bias? I seduba un spiriensia bonitu!

Suma ki importanti tene kuñisimentu izatu di bardadi i partisipa sempri na konta utrus el, asin tambi ki importanti vivi di akordu ku bardadi. Ma pa fasi kila, no pirsisa di fika sempri na amor di Deus. Ke ki es signifika? Resposta di es purgunta pudi ojadu na palabras ku Jesus papia na noiti antis di si mortu. I fala si apostulus fiel: “Si bo obdisi ña mandamentus, bo ta kontinua na ña amor, di mesmu manera ku N obdisi mandamentus di ña Pape, N kontinua na si amor.” — Anos ku pui italiku; Jon 15:10.

Nota kuma Jesus konsigi fika sempri na amor di Deus pabia i obdisi mandamentus di si Pape. Es ta aplika tambi pa nos aos. Pa fika sempri na amor di Deus, no pirsisa di vivi di akordu ku bardadi na no vida di kada dia. Na ki mesmu noiti, Jesus fala: “Si bo sibi e kusas, bo na sedu filis si bo fasil.” — Jon 13:17, NM.

Di tudu korson no na spera di kuma es livru na judau kontinua aplika bardadi na bu vida di kada dia pa bu pudi fika sempri na ‘amor di Deus, nkuantu bu na pera . . . vida ku ka ta kaba.’ — Judas 21.