1, 2. (a) Ke ku no ta punta utru ora aserka di jintis ku kumsa kasa, i pabia di ke? (b) Kal purguntas ku no na bin oja si resposta nes kapitulu?

BU GOSTA di bai mati kasamenti? Manga di jintis gosta, pabia i mumentus di alegria garandi. Kasadus ta bisti sabi ki dia. Alen di kila, se kara ta sta ŝeiu di alegria! Na ki dia e ta sta kontenti, i se futuru ta parsi sedu un futuru di speransa ku susesu.

² Ma mesmu asin, i sibidu kuma na manga di sintidus kasamenti tene manga di purblemas aos. I bardadi kuma no ta spera pa kasadus tene un bon kasamenti, ma utru ora no pudi punta: ‘Sera ki es kasamenti na sedu filis? Sera ki i na tarda?’ Resposta di es purguntas na dipindi si kontra omi o minjer fia na konsijus ku Deus da aserka di kasamenti i si e na aplikal. (Lei Ditus 3:5, 6.) E pirsisa di fasi kila pa e pudi fika sempri na amor di Deus. No jubi gosi resposta di Biblia pa e kuatru purguntas: Ke ku manda algin ta disidi kasa? Si bu na kasa, kin ku bu na kuji kasa ku el? Kuma ku bu pudi purpara pa kasamenti? Ke ku pudi juda un kasal pa e kontinua sedu filis na kasamenti?

3. Pabia ki ka na sedu jiresa kasa sin bon motivus?

³ Sertus jinti ta pensa kuma pa sedu filis i pirsis  kasa, pa relis bu ka pudi sedu filis na vida si bu ka tene un parseru. Es i ka bardadi! Jesus ku seduba un omi solteru fala di vida di solteru suma un don, tambi i fala kilis ku pudi fasil pa e fasil. (Mateus 19:10-12) Apostulu Paulu fala tambi di vantaẑens di sedu solteru. (1 Koríntius 7:32-38) Nin Jesus nin apostulu Paulu ka pui regra di kuma algin dibi di sedu solteru, na bardadi, tuji kasamenti fasi parti di “nsinamentu di dimonius”. (1 Timótiu 4:1-3) Alen di kila, pa kilis ku misti sirbi Jeova sin distrason, vida di solteru tene mas vantaẑen. I ka na sedu jiresa kasa so pabia di preson di utrus, sin bon motivus.

4. Kal basi ku un bon kasamenti ta da pa familia?

⁴ Ma, sera ki i ten bon motivus pa kasa? Sin i ten. Kasamenti tambi i un prenda ku bin di no Deus di amor. (Lei Kumsada 2:18.) E ku manda i tene sertus vantaẑen ku pusiblidadi di tisi filisidadi. Pur izemplu, un bon kasamenti i minjor basi pa un vida di familia. Mininus pirsisa di sta na un ambienti suguru nunde ku se papes na kria elis, mostra amor pa relis, iduka elis i da elis orientason. (Salmu 127:3; Efésius 6:1-4) Ma tene fijus, i ka uniku motivu pa kasa.

5, 6. (a) Suma ki sta na Eklesiastis 4:9-12, kal ki alguns benefisius pratiku di un amizadi forti? (b) Kuma ku kasamenti pudi sedu suma un korda di tris fiu?

⁵ Pensa na kontestu di versikulu di Biblia nunde ku tema di es kapitulu basia nel: “I minjor bo sedu dus di ki un son, pabia tarbaju ta mas rindi. Si un kai, utru pudi lantandal, ma koitadi kil ku sta el son. Si i kai, i ka na tene kin ku na lantandal. Tambi si dus durmi juntu, e ta kenta n̈utru. Ma un son, kuma ki na kenta? Si algin bin pa ataka, i pudi ngaña un algin son, ma dus pudi  risistil. Un korda di tris fiu i kansadu sapa.” — Eklesiastis 4:9-12.

⁶ I bardadi kuma es versikulus sta na fala di balur di amizadi entri dus amigus. Ma na bardadi, kasamenti tambi nvolvi un amizadi forti. Suma ku es testus mostra, es union ta da ajuda, konsolu ku proteson. Un kasamenti ta sedu forti ora ku algun kusa buridu na union di dus jinti. Suma ku es versikulu da ku ntindi, un korda di dus fiu pudi sedu fasil di sapa. Ma un korda di tris fiu kansadu sapa. Ora ku preokupason prinsipal di omi ku minjer sedu di kontenta Jeova, kasamenti ta sedu suma un korda di tris fiu. Jeova na bardadi ta sedu parti di se kasamenti, i asin union ta sedu mas forti.

7, 8. (a) Kal konsiju ku apostulu Paulu skirbi pa kristons solteru ku sta na luta ku diseẑu seksual? (b) Kal pontu di vista realista ku Biblia da aserka di kasamenti?

⁷ I so na kasamenti tambi ki pudi ten relason seksual. Na kasamenti, i normal nkara relason seksual suma un fonti di prazer. (Ditus 5:18) Mesmu ora ki un solteru pasa ja tempu di juventudi nunde ku diseẑu seksual ta sedu mas forti, i pudi sta inda na luta ku diseẑus seksual. Es diseẑu si ka kontroladu i pudi leba algin na un pratika susu o mau konduta. Apostulu Paulu nspiradu pa skirbi es konsiju pa solterus: “Ma si e ka pudi domina se kurpu, e dibi di kasa, pabia i minjor kasa di ki yardi ku vontadi di kasa.”— 1 Koríntius 7:9; Tiagu 1:15.

⁸ Kualker motivus ku algin pudi tene di kasa, i bon sedu realista. Suma ku apostulu Paulu fala, kilis ku kasa “na sufri kansera na kurpu.” (1 Koríntius 7:28) Kasadus ta pasa purblemas ku solterus ka ta pasa. Si bu disidi kasa, kuma ku bu pudi rapati purblemas i tene mas filisidadi ku kontentamentu? Un manera di fasi kila i pa kuji diritu kin ku bu na kasa ku el.

9. Kal ki pirigu di kasa ku un algin ku bu ka junta fe kel?

⁹ Apostulu Paulu nspiradu skirbi un prinsipiu importanti ku pudi aplikadu ora ku algin na kuji kin ki na kasa kel: “Ka bo liga ku kilis ki ka krenti”. (2 Koríntius 6:14) Pur izemplu, si dus limarias ku tene ciu diferensa na tamañu maradu juntu pa tarbaja, elis tudu e na sufri. Di mesmu manera, si un kriston kasa ku kin ki ka kriston, sin duvida e na tene purblemas, tudu dus na sufri. Si un delis misti fika sempri na amor di Jeova, ma ki utru ka ta preokupa ku kila, se prioridadis na vida ka na fila, i talves kila pudi omenta mas purblema. Es ku pui apostulu Paulu nsentiva kristons pa e kasa so ku kin ki “krenti” o kin ke tene mesmu fe ku el. — 1 Koríntius 7:39.

10. Manga di bias kal ku ta sedu rusultadu di ka sigi konsiju di Deus di kasa so ku kin ki ku no tene mesmu fe kel?

¹⁰ Na alguns kasu, sertus ermons o irmas solteru pensa kuma, i minjor kasa ku kin ke ka junta fe kel di ki fika na solidon. Alguns disidi nega konsiju di Biblia, i e kasa ku un algin ki ka servu di Jeova. Ma manga di bias rusultadu ta sedu tristi. Pabia e ta kaba pa diskubri kuma e kasa ku un algin ke ka pudi papia ku el aserka di kusas mas importanti na vida. Solidon ku kila ta tisi i ta mas garandi di ki kualker solidon ke teneba antis di kasa. I bonitu oja di kuma, i ten manga di ermons ku irmas solteru ku rispita es konsiju di Biblia i ku sta disididu pa sigil. (Lei Salmu 32:8.) Mesmu si un dia e bin misti kasa, e disidi kontinua solteru te na dia ke bin oca kin ke na kasa ku el entri kilis ku ta adora Jeova.

11. Ke ku pudi judau kuji diritu kin ku bu na kasa kel? (Jubi tambi kuadru “ Kal tipu di algin ku N misti?.”)

¹¹ Es ka signifika kuma tudu kin ki servu di Jeova i algin apropriadu di kasa kel. Si bu sta na pensa  kasa, buska un algin ku tene personalidadi ku objetivus spiritual ku na da ku di bo i ku ama Jeova suma bo. Skravu fiel i diskretu fasi ja manga di publikasons aserka di es asuntu, i na sedu bon pa bu jubi es konsijus basiadu na Biblia i pa bu ora aserka di es asuntu i disa es konsijus orientau na toma es disison importanti. * — Lei Salmu 119:105.

12. (a) Kal kustumi aserka di kasamenti ku ten na manga di teras? (b) Kuma ku un izemplu bibliku ta sirbi di orientason nes asuntu?

¹² Na manga di teras, papes kustuma kuji omi o minjer pa se fijus. Nes kulturas kuas tudu jintis ta konkorda di kuma papes mas tene jiresa ku spiriensia pa toma es disison importanti. Manga di bias kasamentis rumadu ta da ben, suma ki seduba na tempus bibliku. Izemplu di Abraon ku manda si servu pa bai buska un minjer pa Isaki, i un bon izemplu pa papes ku ta vivi na teras ku tene es kultura. Diñeru ku nivel sosial ka eraba preukupason di Abraon. Pa kontrariu i fasi sforsus garandi pa konsigi minjer pa Isaki entri kilis ku ta adoraba Jeova. * — Kumsada 24:3, 67.

13-15. (a) Kuma ku prinsipiu ku sta na Ditus 24:27 pudi juda un joven ku na pensa kasa? (b) Si un minjer misti kasa ke ki pudi fasi pa purpara?

¹³ Si bu sta na pensa kasa, i na seduba bon pa bu  fasi bu kabesa es purgunta, ‘Sera ki na bardadi N sta prontu pa kasa?’ Resposta di es purgunta ka dipindi so di ke ku bu ta pensa aserka di amor, seksu, kumpañia, o fijus. Pabia kin ku pensa kasa dibi di pensa na responsabilidadis spesifiku ku kasamenti ta tisi.

¹⁴ Un omi ku sta na buska minjer dibi di pensa diritu nes prinsipiu: “Kabanta bu tarbaju la fora, bu labra bu lugar; dipus bu ta kumpu bu kasa.” (Ditus 24:27) Ke ki es signifika? Na pasadu, si un omi misti kasa minjer pa forma un familia, i dibi di punta si kabesa, ‘Sera ki N sta prontu pa kuida di minjer i di fijus ku no pudi bin tene?’ Purmeru i dibi di tarbaja, ku sedu kuida di si lugar di labur. Mesmu prinsipiu ta aplika pa no tempu. Un omi ku misti kasa pirsisa di purpara pa responsabilidadi di kasamenti. Nkuantu i sta na kondison di tarbaja, i dibi di tarbaja. Deus mostra kuma un omi ku ka ta kuida di nesesidadis fisiku, emosional ku spiritual di si familia, i pior di ki algin sin fe! — Lei 1 Timótiu 5:8.

¹⁵ Di mesmu manera, si un minjer disidi kasa, signifika kuma i seta asumi alguns responsabilidadis garandi. Livru di Ditus mostra kuma ku un bon minjer ta sedu. I ta pega tesu na tarbaju i tene bon kualidadis ku un minjer pirsisa di tene pa juda si omi i pa kuida di kasa. (Ditus 31:10-31) Ora ku omi o minjer turmenta kasa sin sta purparadu pa asumi responsabilidadis di kasamenti, nta i sta na pensa so na se kabesa sin pensa na ke ki pudi da pa si futuru omi o minjer. Mas importanti di tudu, kilis ku sta na pensa kasa pirsisa di sta purparadu na sintidu spiritual.

16, 17. Kilis ku sta na purpara pa bin kasa dibi di medita na kal prinsipius?

¹⁶ Purparason pa kasamenti nvolvi medita na papel  ku Deus da omi ku minjer. Omi pirsisa di sibi ke ku signifika sedu kabesa o ŝef di familia. Es papel ka dal liberdadi di ba ta fasi kil ki misti. En ves di kila, i dibi di kopia manera ku Jesus usa si ŝefia. (Efésius 5:23) Di mesmu manera, un minjer kriston dibi di ntindi papel importanti di minjer. Sera ki i na sta dispostu pa ‘fika bas di si omi’? (Efésius 5:22) I sta ja bas di otridadi di Jeova ku di Jesus Kristu. (1 Koríntius 11:3) Asin, otridadi di si omi na familia signifika kuma i dibi di sta dispostu pa sta bas di omi. Sera ki i na apoia otridadi di un omi mperfeitu o i na seta sta bas del? Si oja kuma i ka na pudi fasi es, nta i minjor pa i ka kasa.

¹⁷ Alen di kila, kin ku misti kasa dibi di sta purparadu pa kuida di nesesidadis spesial di si kumpañer. (Lei Filipensis 2:4.) Apostulu Paulu fala: “Ma tambi N na falal pa bos. Kada un di bos dibi di ama si propi minjer suma si kabesa. Minjer dibi di rispita si omi.” Bas di nspirason, apostulu Paulu oja kuma omi tene nesesidadi spesial di sinti kuma si minjer tene rispitu garandi pa rel. Tambi minjer tene nesesidadi spesial di sinti kuma si omi amal. — Efésius 5:21-33.

18. Ke ku manda jintis ku na namora dibi di sibi kontrola se kabesa na namoru?

¹⁸ Namoru i ka so tempu pa divirti. Ma i tempu pa omi ku minjer aprindi lida ku n̈utru, pa jubi si se personalidadi na da pa e kasa. I tempu tambi nunde ki pirsis sibi kontrola bu kabesa. Tentason pa tene intimidadi fisiku ta sedu muitu forti, pabia atrason i un kusa natural. Ma kilis ku na bardadi ama n̈utru na ivita di fasi kusas ku pudi fasi utru mal na sintidu spiritual. (1 Tesalonisensis 4:6) Asin si bu sta na namora, sibi kontrola bu kabesa; i un kualidadi ku pudi judau na tudu bu vida, mesmu si bu kasa o nau.

19, 20. Kuma ku manera di kristons nkara kasamentu diferenti ku manera ku manga di jintis ta nkaral aos? Da izemplu.

¹⁹ Si dus jintis ku kasa misti pa se kasamenti tarda, e pirsisa di rispita komprimisu ke toma. Na nuvelas ku filmis manga di bias kasamentis ta tene un fin bonitu ku jintis ta misti. Ma na vida real, kasamenti i ka un fin, i kumsada di un kusa ku Jeova fasi pa i tarda. (Kumsada 2:24) I tristi oja di kuma i ka asin ku manga di jintis ta pensa aos na mundu. Na alguns kultura, jintis ta kompara kasamenti ku “fasi non na korda.” Talves e ka ta da di konta kuma es ilustrason ta diskribi pontu di vista ku maioria di jintis tene aserka di kasamenti. Pabia ku no pudi fala sin? Pabia un non ku maradu diritu pudi tarda tambi i pudi dismancadu fasilmenti.

²⁰ Manga di jintis aos ta nkara kasamenti suma un kusa pa puku tempu. E ta lestu ku toma komprimisu di kasa ku ideia di kuma i na satisfasi se nesesidadis, ma si parsi kuma purblema na ten e ta kaba ku kasamenti. Lembra kuma Biblia usa izemplu di korda pa fala di union suma pur izemplu union di kasamenti. Korda di barku ta fasidu pa i tarda pa ka i disfia o sapa mesmu na turbada o bentu mas forti. Di mesmu manera, kasamenti fasidu pa tarda. Lembra kuma Jesus fala: “Kil ku Deus junta, omi ka dibi di rapatil.” (Mateus 19:6) Si bu kasa, bu pirsisa di nkara kasamenti di es manera. Sera ki es tipu di komprimisu ta pui pa kasamenti sedu difisil? Nau.

21. (a) Kal atitudi ku omi ku minjer dibi di tene pa n̈utru? (b) Ke ku pudi juda elis fasi kila?

²¹ Omi ku minjer pirsisa di tene un pontu di vista pusitivu pa n̈utru. Si kada kin ta sforsa pa konsentra  na bon kualidadis ku sforsu ku si kumpañer ta fasi, nta i na ten alegria ku kontentamentu na kasamenti. Sera ki no pudi konsentra na kualidadis pusitivu di no parseru mperfeitu? Jeova sibi kuma anos i mperfeitu, ma mesmu asin no konfia kuma, i ta konsentra na no bon kualidadis. Salmista punta: “SIÑOR, si bu fasi lista di pekadus, kin ku pudi firma?” (Salmu 130:3) Omis ku minjeris pirsisa tambi di tene es mesmu pontu di vista  pusitivu ku dispusison di ba ta purda n̈utru. — Lei Kolosensis 3:13.

22, 23. Kal bon izemplu ku Abraon ku Sara disa pa kasadus aos?

²² Konformi anus na pasa, kasamenti pudi tisi mas alegria ku filisidadi. Biblia fala di kasamenti di Abraon ku Sara oca e seduba ja un kasal di idadi. Sin duvida se kasamenti teneba purblemas. Imaẑina kuma ki seduba difisil pa Sara, un minjer di talves 60 i tal anu, disa sidadi di Ur ku teneba mas kondison pa bai mora na tendas pa restu di si vida. Na bardadi i setaba sta bas di otridadi di si omi. Suma un kumpañer i judadur di Abraon, Sara juda pa disisons di Abraon sai ben. Si submison i di korson. Mesmu “dentru del” i ta coma si omi di siñor. (Kumsada 18:12; 1 Pedru 3:6) Rispitu ki teneba pa Abraon bin di korson.

²³ Ma es ka signifika kuma Abraon ku Sara sempri ta staba di akordu na tudu asuntu. Un bias Sara da un suẑeston ku “ka sabi” Abraon. Mesmu asin, ku orientason di Jeova, Abraon obi ku umildadi ke ku si minjer falal, i kila tisi benson pa familia. (Kumsada 21:9-13) Omis ku minjeris di aos pudi aprindi ciu di es kasal ku rispita Deus, mesmu kilis ku fasi ja manga di anus na kasamenti.

24. Kal tipu di kasamenti ku ta ngaba nomi di Jeova, i pabia di ke?

²⁴ Na kongregason kriston i ten manga di kasamentis filis — kasamentis nunde ku minjer ta rispita ciu si omi, i omi ta ama si minjer, i tudu dus ta sforsa pa pui vontadi di Jeova na purmeru lugar na se vida. Si bu disidi kasa, kuji diritu kin ku bu na kasa kel, purpara diritu pa kasamenti, i tarbaja pa i ten pas ku amor na bu kasamenti, asin bu kasamenti na ngaba Jeova Deus. Si bu fasi kila, sin duvida bu kasamenti na judau fika sempri na amor di Deus.