1, 2. (a) Kuma ku manga di jintis ta nkara tarbaju? (b) Kuma ku Biblia ta nsentivanu nkara tarbaju?

PA MANGA di jintis aos na mundu, tarbaju i ka un kusa agradavel. E ka gosta di fasi un tarbaju ke ka gosta del pa manga di oras, e ka gosta di ideia di ba ta tarbaja kada dia. Kuma ku es tipu di jintis pudi tene motivason ku interesi na se tarbaju i gosta di se tarbaju?

² Biblia ta nsentivanu nkara tarbaju di manera pusitivu. I fala kuma tarbaju ku rusultadu di tarbaju i un benson. Salomon fala: “I bon tambi pa tudu omi kume, i bibi, i goza ke ki tarbaja; es i kusa ku Deus dal.” (Eklesiastis 3:13) Suma Jeova gosta di nos i misti sempri ben pa nos, i misti pa no tene kontentamentu na tarbaju i pa no goza di rusultadu di no tarbaju. Pa fika sempri na si amor, no pirsisa di vivi di akordu ku si pontu di vista i di akordu ku si prinsipius aserka di tarbaju. — Lei Eklesiastis 2:24; 5:18.

3. Kal purguntas ku no na bin fala del nes kapitulu?

³ Nes kapitulu, no na fala di kuatru purguntas: Kuma ku no pudi tene kontentamentu na no tarbaju? Kal tipu di tarbaju ki ka bon pa kristons di bardadi? Kuma ku no pudi ekilibra tarbaju ku atividadis spiritual? Kal ki tarbaju mas importanti ku no pudi fasi? Purmeru,  no jubi izemplu di dus garandis tarbajaduris na mundu — Jeova Deus ku Jesus Kristu.

4, 5. Kuma ku Biblia mostra kuma Jeova i un bon tarbajadur?

⁴ Jeova i tarbajadur mas garandi na mundu. Kumsada 1:1 fala: “Na kumsada Deus kumpu seu ku tera.” Oca Deus kaba kumpu tera ku tudu kusas ku sta nel, i “kontenti” ku rusultadu di tarbaju. (Kumsada 1:31) Es signifika kuma i kontenti ku si tarbaju. Sin duvida, Jeova, “Deus filis”, sintiba garandi prazer na sedu un bon tarbajadur. — 1 Timótiu 1:11, NM.

⁵ No Deus tarbajadur nunka ka para tarbaja. Manga di tempu dipus di Deus kumpu Tera ku kusas ku sta nel, Jesus fala: “Ña Pape na tarbaja te gosi”. (Jon 5:17) Ke ku si Pape staba na fasi? Sin duvida i kontinua tarbaja na seu pa gia pekaduris i kuida delis. I fasi pa i ten kristons unjidu ku spiritu ku na bin rena juntu ku Jesus na seu. Es kristons comadu di “nobu algin.” (2 Koríntius 5:17) Jeova sta na tarbaja pa kumpri si intenson pa pekaduris ku amal — pa e bin tene vida ku ka ta kaba na novu mundu. (Romanus 6:23) Jeova kontenti dimas ku rusultadu di es tarbaju. Manga di jintis ku seta mensaẑen di Renu, fika atraidu pa Deus i e fasi mudansas na se vida pa pudi fika sempri na si amor. — Jon 6:44.

6, 7. Ke ku ta mostra kuma Jesus ta pega tesu na tarbaju?

⁶ Jesus kunsidu suma un algin ku ta tarbaja. Antis di i bin pa Tera, i tarbajaba pa Deus suma si “mestri di obra” pa kumpu “tudu kusas . . . na seu ku na tera”. (Ditus 8:22-31, NM; Kolosensis 1:15-17) Oca ki bin pa Tera, Jesus kontinua sedu un bon tarbajadur. Ocal joven i aprindi tarbaju di konstruson, i bin kunsidu  suma “karpinteru”. * (Markus 6:3) Es i eraba un tarbaju pisadu ki pirsisba tene manga abilidadi, pabia ki tempu i ka tenba kau di sera madera, kau di bindi madera, ku feramentas eletriku. Bu pudi imaẑina Jesus bai buska madera — talves i sta na korta arvuris i karga madera pa kau ki na tarbaja nel? Imaẑina i sta na kumpu kasas — i sta na purpara i monta vigas, kumpu portas, i te mesmu kumpu alguns mobilias? Sin duvida Jesus sibi diritu alegria ku ta bin di fasi un bon tarbaju.

⁷ Jesus seduba un algin ku ta pega tesu na fasi si tarbaju di pregason. Pa tris anu i meiu i staba okupadu na fasi es tarbaju mas importanti. Suma i mistiba yangasa mas numeru di jintis ki pudi, i tarbaja risu i ka pirdi tempu, i ta lantaba parmaña sedu i tarbaja te di noiti. (Lukas 21:37, 38; Jon 3:2) I viaẑa pa “kada prasa, ku kada tabanka, i na konta Bon Noba di renu di Deus.” (Lukas 8:1) Jesus yanda manga di kilometrus na stradas ku ka alkatradu pa leba jintis mensaẑen di bon noba.

8, 9. Kuma ku Jesus tene kontentamentu na si tarbaju?

⁸ Sera ki Jesus sinti kontentamentu na si tarbaju di pregason? I sinti! I sumia simintera di bardadi di Renu, dipus i disa bulañas prontu pa kebur. Fasi tarbaju di Deus da Jesus forsa ku inerẑia tok i staba dispostu pa diskisi di kumida pa pudi kumpri tarbaju di Deus. (Jon 4:31-38) Pensa na kontentamentu ki i teneba oca ku na fin di si tarbaju di pregason na Tera i fala si Pape: “N mostra bu gloria na mundu; N kompleta tarbaju ku bu dan pa N fasi.” — Jon 17:4.

 ⁹ Na bardadi Jeova ku Jesus i minjoris izemplu di jintis ku tene kontentamentu na se tarbaju. No amor pa Jeova ta motivanu pa no “parsil” o imital. (Efésius 5:1) No amor pa Jesus ta lebanu na “yanda na si pe” o kopia si izemplu. (1 Pedru 2:21) Gosi no jubi kuma ku anos tambi no pudi tene kontentamentu na no tarbaju.

10, 11. Ke ku pudi judanu disenvolvi un atitudi pusitivu aserka di tarbaju?

¹⁰ Tarbaju fasi parti di vida di kristons di bardadi. No misti tene prazer ku kontentamentu na no tarbaju, ma es pudi sedu un disafiu si kontra no tene un tarbaju ku no ka gosta del. Na un situason des, kuma ku no pudi tene kontentamentu na no tarbaju?

¹¹ Disenvolvi un atitudi pusitivu. I ka tudu ora ku no pudi muda no situason, ma no pudi muda no atitudi. Medita na pontu di vista di Deus aserka di tarbaju pudi judau tene un atitudi pusitivu pa tarbaju. Pur izemplu, si abo i ŝef di familia, lembra di kuma bu tarbaju, mesmu ku bu ka gosta del, na judau sustenta bu familia. I kuida di familia i un kusa importanti na uju di Deus. Si Palabra fala kuma, kin ku ka ta kuida di si familia “i pior di ki algin ku ka sedu krenti.” (1 Timótiu 5:8) Si bu lembra di kuma bu tarbaju na pirmitiu kumpri responsabilidadi ku Deus dau, kila pudi judau tene sertu midida di kontentamentu ku objetivu na bu tarbaju, ku talves bu kolegas di tarbaju ka tene.

12. Si no ta pega tesu na tarbaju i no sedu onestu, kal benefisius ku no na tene?

¹² Pega tesu i sedu onestu. Tarbaja duru i aprindi kuma di fasi bon tarbaju ta tisi manga di benefisius. Manga  di bias patrons ta gosta di tarbajaduris ku ta pega tesu i ku sibi tarbaja. (Ditus 12:24; 22:29) Suma kristons di bardadi, no dibi di sedu tambi onestu na no tarbaju, pa ka furta diñeru, material di tarbaju o kume tempu di patron. (Efésius 4:28) Suma ku no ojaba na kapitulu ku pasa, sedu onestu tene manga di benefisius. Jintis ta tene konfiansa na un tarbajadur onestu. Mesmu si no patron ka nota di kuma anos i bon tarbajadur, no pudi tene kontentamentu di tene “un konsiensia onestu” i sibi kuma no sta na agrada Deus ku no ama. — Ebreus 13:18, NM; Kolosensis 3:22-24.

13. Kal rusultadus ku no bon izemplu pudi tene na kau di tarbaju?

 ¹³ Lembra di kuma no konduta pudi ngaba Deus. Ora ku no kontinua sigi normas kriston na no kau di tarbaju, utrus ta nota di kila. Kal ki rusultadu di fasi es? No pudi ‘faja . . . nsinamentu di Deus no Salbadur.’ (Titu 2:9, 10) Na bardadi, no bon konduta pudi leba utrus na oja bonitasku di no adorason, i kila na fasi pa i sedu mas atraenti pa elis. Imaẑina kuma ku bu na sinti si bu kolega di tarbaju kumsa ku mostra interesi na bardadi pabia di bu bon izemplu na kau di tarbaju! Mas importanti inda, pensa so nes: Kal benson ku pudi komparadu ku benson di sibi kuma bu bon konduta ngaba Jeova i fasi si korson kontenti? — Lei Ditus 27:11; 1 Pedru 2:12.

14-16. Ora ku no na kuji un tarbaju, kal purguntas importanti ki bon pensa nel?

¹⁴ Biblia ka konta kal tipus di tarbaju ki bon o kal ki ka bon. Ma es ka signifika kuma no pudi seta kualker tipu di tarbaju. Skrituras pudi judanu kuji un bon tarbaju ku na kontenta Deus i ivita di tarbaju ku ka na kontental. (Ditus 2:6) Ora ku bu na kuji un tarbaju, i ten dus purguntas importanti ki bon pensa nel.

¹⁵ Sera ki fasi es tipu di tarbaju i un di kusas ku Biblia kondena? Palabra di Deus kondena di manera klaru furtu, mintida, ku fasi idulus. (Saida 20:4; Atus 15:29; Efésius 4:28; Apokalipsi 21:8) No na nega kualker tarbaju ku na lebanu fasi es kusas. No amor pa Jeova ka na pirmitinu nunka seta un tarbaju ku na nvolvi fasi un pratika ku na viola mandamentus di Deus. — Lei 1 Jon 5:3.

¹⁶ Sera ki fasi es tarbaju na lebanu fasi parti o apoia  un pratika mau? Jubi so un izemplu. Tarbaja na un obra i ka mal. Ma ke gora si un kriston dadu tarbaju di kumpu un igreẑa? I bardadi kuma si tarbaju ka na nvolvi apoia diretamenti adorason falsu. Ma sera ki si tarbaju di kumpu un igreẑa ka na apoia atividadi di nsina kusas falsu aserka di Palabra di Deus? (Apokalipsi 18:4) Suma no ama Jeova, no ka misti ten nada ku pratikas ku Biblia kondena.

17. (a) Aserka di kuji tarbaju, kal kusas ki bon pensa diritu nel? (Jubi kuadru “ Sera ki N dibi di seta es tarbaju?”) (b) Kuma ku no konsiensia pudi judanu toma disisons ku na kontenta Deus?

 ¹⁷ No pudi oja resposta pa manga di purguntas aserka di tarbaju si no analiza diritu resposta pa ki dus purguntas ku fasidu na paragrafu 15 ku 16. Alen di kila, i ten inda utrus kusas ki bon pensa diritu nel ora ku no na kuji un tarbaju. * No ka dibi di spera pa skravu fiel i diskretu pui regras ku na da pa tudu tipu di situason ku pudi surẑi. Li ku no pirsisa di usa jiresa. Suma ku no aprindi na Kapitulu 2, no pirsisa di eduka i trena no konsiensia atraves di buska sibi manera di aplika ke ku Palabra di Deus fala na no vida di kada dia. Si atraves  di “pratika” no trena no kapasidadi di “ntindi ben ku mal”, no konsiensia pudi judanu toma bon disisons ku na kontenta Deus i judanu fika sempri na si amor. — Ebreus 5:14.

18. Pabia ki ka fasil manti ekilibriu spiritual?

¹⁸ Suma no sta na vivi na tempu di “fin” ku manga di “kansera” i ka na fasil toma disisons ku na judanu kontinua tene aprovason di Jeova. (2 Timótiu 3:1) I difisil konsigi tarbaju i manti na ki tarbaju. Suma kristons di bardadi, no sibi kuma i importanti tarbaja pa sustenta no familia. Ma si no ka toma kuidadu, preson na kau di tarbaju o nfluensia di pensamentu materialista di mundu pudi intirfiri na no atividadis spiritual. (1 Timótiu 6:9, 10) No jubi gosi kuma ku no pudi kontinua sedu ekilibradu i sertifika di “kusa mas bon”. — Filipensis 1:10.

19. (a) Pabia ku Jeova meresi tudu no konfiansa? (b) Ke ku konfiansa na Jeova ta judanu ivita del?

¹⁹ Pui tudu bu konfiansa na Jeova. (Lei Ditus 3:5, 6) Sera ki i ka meresi es tipu di konfiansa? I meresi, pabia i ta kuida di nos. (1 Pedru 5:7) I kunsi no nesesidadis mas di ki anos propi, i si mon nunka ka kurtu. (Salmu 37:25) I na sedu bon si no sukuta es lembreti di si Palabra: “Bo libra di faimadesa di diñeru. Bo fika kontenti ku kil ku bo tene, pabia Deus fala: ‘N ka na disau, nin N ka na bandonau.’” (Ebreus 13:5) Manga di servus di tempu kompletu pudi prova kuma na bardadi Deus pudi juda algin oca kil ki pirsis pa vivi. Si no tene tudu konfiansa di kuma Jeova na kuida di nos, kila  na ivitanu di preokupa dimas ku buska sustentu pa no familia. (Mateus 6:25-32) No ka na disa tarbaju lebanu bagana mon na atividadis spiritual, suma prega bon noba o asisti runions. — Mateus 24:14; Ebreus 10:24, 25.

20. (a) Ke ku signifika tene “bon” uju? (b) Ke ku pudi judau fasi kila?

²⁰ Konsentra na fasi vontadi di Deus. (Mateus  6:22, 23.) Jesus fala kuma no pirsisa di tene “bon” uju. Es signifika ki no dibi di ivita komplika no vida ku manga di kusas ki ka importanti. Un kriston pirsisa di konsentra na fasi vontadi di Deus. Si no fasi kila no ka na sta preokupadu ku buska un tarbaju ku na paganu ben o buska tene un vida di luŝu. Nin no ka na kuri tras di novu mudelu di kusas o kuri tras di kusas di minjor kualidadi ku publisidadi ta misti mostranu kuma, si no ka tenel no ka na sedu filis. Ke ku pudi judanu konsentra na fasi vontadi di Deus? Ivita kansa bu kabesa ku manga di dibidas ki ka pirsis. Ka bu komplika bu vida ku kusas ku ta toma manga di tempu ku atenson. Sigi konsiju di Biblia ku fala pa kontenti si no tene “kumida ku ropa”. (1 Timótiu 6:8) Sforsa simplifika bu vida te nunde ku bu pudi.

21. (a) Pabia ku no pirsisa di fiksa prioridadis? (b) Ke ku dibi di tene prioridadi na no vida?

²¹ Kontinua pui kusas spiritual na purmeru lugar. Tempu ku inerẑia ku no ta usa kada dia i limitadu, pabia di kila no dibi di fiksa prioridadis. Pa utru ladu kusas ki ka muitu importanti pudi robanu tempu, i asin toma lugar di kusas mas importanti. Ke ku dibi di tene prioridadi na no vida? Manga di jintis na mundu ta pui edukason superior na purmeru lugar pa e pudi bin tene un tarbaju ku na paga elis manga di diñeru. Ma Jesus nsentiva si sigiduris pa e “kontinua buska purmeru, Renu”. (Mateus 6:33, NM) Suma kristons di bardadi, no ta pui Renu di Deus na purmeru lugar di no vida. No manera di vivi — no skolias, no objetivus, no atividadis — dibi di mostra klaru di kuma interesis di Renu ku vontadi di Deus i mas importanti pa nos di ki preokupason ku kusas material o utru kusas.

22, 23. (a) Kal ki tarbaju mas importanti pa kristons di bardadi? (b) Kuma ku no pudi mostra di kuma es tarbaju i importanti pa nos? (Jubi kuadru “ Ña disison judan tene kontentamentu ku filisidadi na vida.”) (c) Aserka di tarbaju ke ku bu sta disididu pa fasi?

²² Suma no sibi kuma no sta na vivi kuas na fin di ultimus dias, no ta konsentra na tarbaju mas importanti pa kristons di bardadi — prega i fasi disipulus. (Mateus 24:14; 28:19, 20) Suma Jesus, no misti sta okupadu na es tarbaju ku pudi salva vida. Kuma ku no pudi mostra di kuma es tarbaju i importanti pa nos? Maioria di servus di Deus ta fasi tarbaju di pregason di tudu korson suma publikaduris di kongregason. Alguns organiza se vida pa e pudi sirbi suma pionerus o misionarius. Suma e sibi kal ki balur di objetivus spiritual, manga di papes nsentiva se fijus pa e buska entra na sirvisu di tempu kompletu. Sera ki publikaduris zelozu di Renu ta oca kontentamentu na se tarbaju di pregason? Klaru ki e ta oca! Sirbi Jeova di tudu alma i minjor kamiñu pa tene un vida filis ku manga di bensons. — Lei Ditus 10:22.

²³ Manga delis entri nos ta gasta manga di oras na tarbaju pa pudi oca sustentu pa se familia. Lembra di kuma Jeova misti pa no tene kontentamentu na no tarbaju. Ora ku no armoniza no atitudi i no asons ku pontu di vista di Jeova i ku si prinsipius, no na pudi tene kontentamentu na no tarbaju. Asin, ka bu disa nunka bu tarbaju disviau di tarbaju mas importanti — ku sedu, konta bon noba di Renu di Deus. Si no pui es tarbaju na purmeru lugar na no vida, no na mostra di kuma no ama Jeova i asin fika sempri na si amor.