1. Ke ku Jesus distaka na si ultimu noiti na Tera?

NA SI ultimu noiti na Tera, Jesus spresa preokupason garandi aserka di futuru di si sigiduris. Te mesmu i ora aserka di kila, i fala si Pape: “N ka na pidiu pa bu tira elis na mundu, ma pa bu guarda elis di puder di mal. Elis i ka di mundu, suma ku ami i ka di mundu.” (Jon 17:15, 16) Nes orason ki i fasi di fundu di si korson, Jesus distaka dus kusa: Amor garandi ki tene pa si sigiduris, ku importansia di si palabras ku sta na Jon 15:19 ku fala: “Abos i ka di mundu.” Na bardadi, pa Jesus, i muitu importanti pa si sigiduris kontinua siparadu di mundu!

2. Ke ki “mundu” ku Jesus na falaba del?

² “Mundu” ku Jesus na falaba del na rifiri tudu jintis ku vira Deus kosta, ku ta guvernadu pa Satanas, i ku sedu skravus di spiritu di iguismu ku di orgulyu ku bin di Satanas. (Jon 14:30; Efésius 2:2; 1 Jon 5:19) Na bardadi, “amisadi ku mundu i inimisadi ku Deus”. (Tiagu 4:4) Ma kuma gora ku algin ku misti kontinua na amor di Deus pudi sta na mundu i na mesmu tempu sta siparadu del? No na oja sinku maneras: (1) Ora ku no kontinua fiel pa Renu di Deus i no sedu neutrus na pulitika di mundu, (2) ora ku no risisti spiritu di mundu, (3) ora ku no aparensia ku no manera di bisti sedu simplis, (4) ora ku no kontinua leba un vida simplis, (5) i ora ku no bisti no armadura spiritual.

3. (a) Pabia ku Jesus nega partisipa na pulitika di si tempu? (b) Pabia ku no pudi fala kuma sigiduris unjidu di Jesus ta sirbi suma mbaŝaduris? (Nklui nota.)

³ En ves di partisipa na pulitika di si tempu, Jesus konsentra na prega Renu di Deus, ku sedu, futuru guvernu ku sta na seu ki na bin sedu Rei del. (Daniel 7:13, 14; Lukas 4:43; 17:20, 21) Asin, oca i staba dianti di guvernadur romanu Ponsiu Pilatus, Jesus pudiba fala: “Ña renu i ka de mundu”. (Jon 18:36) Si sigiduris fiel ta kopia si izemplu ora ke sedu fiel pa Jesus ku si Renu, tambi ora ke na papia ku utrus aserka di es Renu. (Mateus 24:14) Apostulu Paulu fala: “No bin suma mbaŝadur di Kristu. . . . No pidi bos, na nomi di Kristu, pa bo fasi pas ku Deus.” * — 2 Koríntius 5:20.

4. Kuma ku tudu dus grupu di kristons di bardadi ta mostra se lealdadi pa Renu di Deus? (Jubi kuadru “ Neutralidadi di purmerus kristons.”)

⁴ Suma mbaŝaduris ta representa un suberania o un país na utru tera, e ka ta miti na asuntu internu di tera ke na sirbi nel; e ta manti neutru. Ma e ta difindi interes di guvernu di país ke na representa. Mesmu kusa ta akontisi tambi ku sigiduris unjidu di Kristu, pabia se ‘pátria sta na céu.’ (Filipensis 3:20, NOBO TESTAMENTO NA KRIOL) Pabia di se zelu na prega Renu, e juda milyons di “utru karnel” pa “fasi pas ku Deus.” (Jon 10:16; Mateus 25:31-40) Esis tambi pa se ves, sta na apoia ermons unjidu di Jesus suma se amigus intimu. Suma un koral unidu ku sta na difindi interes di Renu Mesianiku, tudu dus grupu kontinua neutru na asuntus pulitiku di mundu. — Lei Isaias 2:2-4.

5. (a) Kuma ku kongregason kriston diferenti ku kongregason di Israel antigu? (b) Kuma ku kristons ta mostra es diferensa?

 ⁵ I ka so pabia di lealdadi pa Kristu ku pui kristons di bardadi sedu neutru. Povu di Deus na tempu antigu ta viviba so na un tera, ma aos no fasi parti di un  ermondadi internasional. (Mateus 28:19; 1 Pedru 2:9) Asin, si no na difindi un partidu pulitiku, no ka na pudi tene sinseridadi pa prega utrus mensaẑen di Renu, i no pudi kausa purblema pa union kriston. (1 Koríntius 1:10) Alen di kila, si gera ten, no na geria kontra no ermons ku no faladu pa ama. (Jon 13:34, 35; 1 Jon 3:10-12) I ku bon motivu ku Jesus fala si disipulus pa ka toma spada. Te mesmu i fala elis pa ama se inimigus. — Mateus 5:44; 26:52; jubi kuadru “ Sera ki N kontinua sedu neutru?”

6. Kuma ku bu dedikason pa Deus ta afeta bu relason ku rei o otridadis di guvernu?

⁶ Suma kristons di bardadi, no dedika no vida pa Deus, i ka pa nin un pekadur, nin un organizason o un tera. 1 Koríntius 6:19, 20 fala: “I ka abos ku tene bo kabesa, pabia bo kumpradu ku bon pres.” Asin, i bon pa kilis ku na sigi Kristu lembra kuma, nkuantu e na da onra, mpustu, ku obdiensia limitadu pa “rei”, ku sedu otridadi di guvernu, e dibi di da “Deus kil ki di Deus.” (Markus 12:17; Romanus 13:1-7) Es nklui se adorason, se amor di tudu korson, ku se obdiensia fiel. Te mesmu e sta dispostu pa muri pabia di Deus, si pirsis. — Lukas 4:8; 10:27; lei Atus 5:29; Romanus 14:8.

7, 8. (a) Kin ku sta na ngana jintis di mundu? (b) Kuma ku si manera di pensa ta afeta jintis?

⁷ Utru manera di kristons kontinua siparadu di mundu i ora ke na resisti mau manera di pensa di mundu. Apostulu Paulu fala kuma, “anos no ka risibi spiritu di mundu”, o manera di pensa ku bin di Satanas. Pa kontrariu no risibi manera di pensa di Deus. (1 Koríntius 2:12) Tambi i lembranta kristons di Éfesu kuma, gosi e ka sta na ‘sigi mau kamiñu di mundu; i e  ka sta na obdisi ŝef ku ta manda riba di puderis spiritual di ar, spiritu ku na manda te gosi na jinti ku ta disobdisi Deus.’ — Efésius 2:2, 3.

⁸ Manera di pensa di mundu, ku bin di Satanas, ta leba jintis na disobdisi Deus i misti “kusas ku no kurpu ta dija, ku uju ta oja i misti”. (1 Jon 2:16; 1 Timótiu 6:9, 10) Es manera di pensa tene forsa, pabia i ta agrada karni mperfeitu, i ta ngana, tambi i nsistidu. Suma ar, i sta na tudu ladu, tambi i pudi afeta algin fasilmenti. I ora ku manera di pensa di Satanas afeta algin, i ta kumsa ku disenvolvi puku-puku mau kualidadis suma pur izemplu iguismu, orgulyu, ambison, spiritu di independensia moral ku rebeldia. * Es manera di pensa di mundu ta pui pa personalidadi di Satanas kirsi na korson di algin. — Jon 8:44; Atus 13:10; 1 Jon 3:8, 10.

9. Di kal manera ku spiritu di mundu pudi entra na no menti i na no korson?

⁹ Sera ki spiritu di mundu pudi kirsi na no menti ku no korson? Sin i pudi, si no pirmiti pa i sedu, ora ku no diskuda. (Lei Ditus 4:23.) Si nfluensia ta kumsa di manera finu, i pudi sedu atraves di un asosiason ku jintis ku pudi parsi sedu bon, ma na bardadi e ka ama Jeova. (Ditus 13:20; 1 Koríntius 15:33) Bu pudi tambi risibi es mau nfluensia atraves di lei livrus ki ka apropriadu, atraves di pornografia, site di apostatas, mau divirtimentu, ku disportu ku ta fasidu ku un spiritu garandi di kompitison. Na bardadi no pudi risibi es mau nfluensia, atraves di kualker algin o kualker kusa ku tene spiritu di Satanas o di si sistema.

10. Kuma ku no pudi risisti spiritu di mundu?

 ¹⁰ Kuma ku no pudi risisti spiritu pirigosu di mundu i fika sempri na amor di Deus? No pudi konsigi kila so ora ku no aproveita diritu di kusas spiritual ku Jeova danu, tambi ora ku no na ora sempri pa pidi ajuda di spiritu santu. Puder di Jeova ka pudi komparadu ku di Diabu o di mundu mau ku sta bas di si kontrolu. (Tiagu  4:7) Asin, i importanti pa no pertusi sempri di Jeova atraves di orason!

11. Kuma ku spiritu di mundu nfluensia manera di bisti di jintis?

¹¹ Aparensia di algin, si manera di bisti, ku si iẑeni pudi mostra kal spiritu ku sta na gial. Na manga di teras, manera di bisti di jintis piora tok un komentadur di television fala kuma, i ka na tarda i na sedu difisil diferensia kin ku ta bindi kurpu ku kin ku ka ta fasil. Te mesmu mininus femia ku ka ciga inda bajudesa kai nes maña. Un jornal fala asin: “Mostra kurpu ku sta na moda, bisti diritu ka sta na moda.” Utrus tene maña di bisti di un manera disleŝadu ku ta rifliti spiritu di rebelion i ku ta mostra kuma e ka rispita se kabesa.

12, 13. Kal prinsipius ku dibi di gianu na asuntu di aparensia ku manera di bisti?

¹² Suma servus di Jeova, no misti tene bon aparensia, ku signifika bisti diritu, di un manera limpu, ku ka na ofendi utrus, i ku na kombina ku okasion. Na tudu mumentu, no aparensia dibi di sedu “simplis, ku rispitu”. Ora ku es akompañadu ku “bon obras” i ta da pa kualker algin, macu o femia “ku fala kuma i na sirbi Deus.” I klaru di kuma no preokupason prinsipal, i ka pa coma atenson pa no kabesa, ma i pa no pudi “fika sempri dentru di amor di Deus”. (1 Timótiu 2:9, 10; Judas 21) No misti pa no bistimentu mas bonitu sedu “di dentru di korson . . . , ku ten balur dianti di Deus.” — 1 Pedru 3:3, 4.

¹³ Lembra tambi kuma, no aparensia ku stilu di no ropa pudi nfluensia kuma ku utrus na nkara adorason di bardadi. Purmeru Timótiu 2:9, 10 usa es palabra: “simplis.” Ma oca ku es versikulu skirbidu pa purmeru  bias na lingua gregu, palabra ku traduzidu pa “simplis” signifika ki, no dibi di rispita utrus. Asin, ora ku no na kuji ropa di bisti, no ka dibi di pensa so na diritu ku no tene di bisti ke ku no misti, ma pa kontrariu, purmeru no dibi di pensa na utrus. Mas importanti di tudu, no misti pa Jeova ku si povu ngabadu, i pa jintis oja kuma anos i ministrus di Deus, ku ta fasi “tudu pa gloria di Deus.” — 1 Koríntius 4:9; 10:31; 2 Koríntius 6:3, 4; 7:1.

No aparensia, no manera di bisti, ku limpeza ta sedu inda mas importanti ora ku no na partisipa na pregason o ora ku no na mati runions. Fasi bu kabesa es purguntas: ‘Sera ki ña aparensia ku ña iẑeni ta coma atenson pa algun kusa di mal na mi? Sera ki ta fasi utrus sinti mal? Sera ki N ta pensa kuma ña diritu nes asuntus i mas importanti di ki kualifika pa privileẑius di sirvisu na kongregason?’ — Filipensis 4:5; 1 Pedru 5:6.

15. Pabia ku Palabra di Deus ka pui un lista di regras na asuntu di bisti, aparensia, ku iẑeni?

¹⁵ Biblia ka pui kristons un lista di regras na asuntu di bisti, aparensia ku iẑeni. Jeova ka misti tujinu usa no liberdadi di skolia o di usa no kapasidadi di pensa.  Ma pa kontrariu, i misti pa no sedu jintis maduru ku sibi rasiosina na basi di prinsipius di Biblia, i ku ta usa “spiriensia ku pratika pa ntindi ben ku mal.” (Ebreus 5:14) Mas importanti inda, i misti pa no sedu giadu pa amor — amor pa Deus ku amor pa no kumpañeris. (Lei Markus 12:30, 31.) Dentru di es limitis, i ten manga di maneras di bisti ku aparensia. Prova di kila pudi ojadu na multidons alegris di povu di Jeova ku ta bisti di manera diferenti i di koris diferenti na kualker parti di mundu ke sta nel.

16. (a) Kuma ku spiritu di mundu sedu kontrariu di nsinus di Jesus? (b) Kal purguntas ki bon fasi no kabesa?

¹⁶ Spiritu di mundu ta ngana, tambi i ta leba manga di jintis na buska diñeru ku kusas material pa oca  filisidadi. Ma, Jesus fala: “Vida di algin i ka sta na manga di kusa ki tene.” (Lukas 12:15) Apesar di kuma Jesus ka aprova un vida di sakrifisiu di mampasada, i sina jintis kuma, ‘kilis ku sibi kuma e pirsisa di kusas spiritual’ ku kilis ku leba un vida simplis, ku sedu vida konsentradu na kusas spiritual na tene filisidadi di bardadi. (Mateus 5:3, NM; 6:22) Punta bu kabesa: ‘Sera ki N fia na ke ku Jesus sina, o sera ki N sta na nfluensiadu pa “pape di mintida”? (Jon 8:44) Ke ku ña palabras, ña objetivus, ña prioridadis, ku ña manera di vivi ta mostra?’ — Lukas 6:45; 21:34-36; 2 Jon 6.

17. Konta alguns benefisius ku kilis ku ta leba un vida simplis ta tene.

¹⁷ Pa oja kuma konsiju di Jesus i bardadi, no pirsisa di aplikal, pabia Biblia fala: “Ka bo sedu son obiduris di palabra. . . . Bo sedu fasiduris di kil ku palabra fala.” (Tiagu 1:22) Pur izemplu, kilis ku ta leba un vida simplis ta sinti alegria na sirvisu di Renu. (Mateus 11:29, 30) E ta ivita manga di preokupasons ki ka pirsis, i e ta libra di manga di duris mental ku emosional. (Lei 1 Timótiu 6:9, 10) E ta kontenti ku kil ki pirsis pa vivi ku el, asin, e ta tene mas tempu pa se familia ku se kumpañeris kristons. I rusultadu di kila, e ta durmi sabi. (Eklesiastis 5:12) E ta sinti alegria di da, i e ta fasil na kualker mumentu ke pudi. (Atus 20:35) Tambi e ta tene “garandi speransa”, pas mental ku kontentamentu. (Romanus 15:13; Mateus 6:31, 32) I ka ten ke ku pudi kumpra es bensons!

18. Ke ku Biblia fala aserka di no inimigu, si tatikas, ku tipu di gera ku no tene?

¹⁸ Kilis ku fika sempri na amor di Deus ta benefisia tambi di proteson spiritual kontra Satanas ku misti tuji kristons tene filisidadi ku vida ku ka ta kaba. (1 Pedru  5:8) Apostulu Paulu fala: “No ka na geria kontra jintis, ma kontra garandi puderis ku otridadis ku ŝefis sataniku ku ta manda ne mundu sukuru, ku forsa spiritual di mal na mundu selestial.” (Efésius 6:12) Ora ku no na “geria”, no ta fasil mon ku mon. Es gera i ka gera di armas pisadu, nunde ku no pudi manti un bon distansia i fugia inimigu apartir di un lugar sugundidu. Alen di kila, palabras “puderis”, “otridadis”, ku “ŝefis sataniku” ta mostra kuma, atakis ku ta bin di spiritus maus sta ben organizadu.

19. Splika ke ki armadura spiritual di kristons.

¹⁹ Apesar di no frakesas ku no limitasons, no pudi ngaña es gera. Kuma? Si no “bisti tudu armadura di Deus.” (Efésius 6:13) Efésius 6:14-18 fala di es armadura nes palabras: “Asin, bo firma risu; bo tene bardadi suma sintu ku bo mara; bo vida retu i ta sedu bo armadura di pitu. Bo pruntia pa konta Bon Noba di pas — es i ta sedu bo sapatu. Riba de kusas tudu bo toma fe suma darga [o tajadera] ku bo ta pudi paga ku el tudu fleŝa di fugu ku ki malvadu na ferca pa bos. Bo toma tambi salbason suma kapasiti, ku spada ku Spiritu ta da ku sedu palabra di Deus. Bo pui bo sintidu na orason ku pididu; bo ora tudu tempu na puder di Spiritu.”

20.  Kal ki diferensa di no situason ku situason di un soldadu literal?

²⁰ Suma armadura spiritual i un kusa ku bin di Deus, no pudi tene serteza di kuma i na proteẑinu, si no bistil tudu tempu. Diferenti ku soldadus literal, ku pudi pasa manga di tempu sin gera, kristons sta sempri na gera di vida o morti. Es gera ka na para tok Deus ta kaba ku mundu di Satanas i ferca spiritus mau na abismu. (Apokalipsi 12:17; 20:1-3) Asin, ka bu disisti di geria kontra bu frakesas o mau diseẑus, pabia anos tudu no pirsisa di “kastiga” no kurpu pa pudi manti fiel pa Jeova. — 1 Koríntius 9:27.

21. Kuma ku no pudi ngaña gera spiritual ku no tene?

 ²¹ Kontudu, no ka pudi ngaña es gera so ku no forsa. Asin, apostulu Paulu lembrantanu nesesidadi di ora “tudu tempu na puder di Spiritu.” Na mesmu tempu, no dibi di sukuta Jeova atraves di studu di si Palabra i atraves di asosia ku no kumpañeris “soldadu” na tudu opurtunidadi, pabia no sta ku utrus nes gera! (Filemon 2; Ebreus 10:24, 25) Kilis ki fiel na tudu es arias, na ngaña es gera, tambi e na pudi difindi se fe ora ki disafiadu.

22, 23. (a) Pabia ku no dibi di sta pruntu pa difindi no fe na tudu mumentu? (b) Kal purguntas ki bon pa no punta no kabesa? (c) Kal asuntu ku no na bin fala del na prosimu kapitulu?

²² Jesus fala: “suma abos i ka di mundu, . . . mundu ta nfastia bos.” (Jon 15:19) Asin, kristons sempri dibi di sta pruntu pa difindi se fe na un manera kalmu i ku rispitu. (Lei 1 Pedru 3:15) Punta bu kabesa: ‘Sera ki N tindi pabia ku utru ora Tustumuñas di Jeova ta toma un pusison ki kontrariu ku opinion popular? Ora ku N na toma es pusison difisil ki kontrariu ku opinion popular, sera ki N sta konvensidu di kuma, ke ku Biblia ku skravu fiel fala i bardadi? (Mateus 24:45; Jon 17:17) I ora ki ciga ora di fasi ke ki sertu na uju di Jeova, sera ki N ta sta purparadu i filis di sedu diferenti?’ — Salmu 34:2; Mateus 10:32, 33.

²³ Manga di bias no diseẑu di kontinua siparadu di mundu ta testadu di maneras muitu finu. Pur izemplu, suma ki mensionadu antis, Diabu ta tenta disvia servus di Jeova pa mundu atraves di divirtimentu di mundu. Kuma ku no pudi kuji bon divirtimentu ku na fasinu sinti ben i kontinua ku un konsiensia limpu? Es asuntu na faladu del na prosimu kapitulu.