Kiridu ermons ku irmas:

Amor pa Deus i pa jintis ku ta lebanu ‘bai pa jinti di tudu nasons, fasi elis disipulus i batisa elis.’ (Mat 28:​19, 20; Mar 12:​28-31) Mostra amor sin pensa so na no kabesa, tene puder garandi. I pudi toka korson di kilis ku sta “dispostu pa tene vida ku ka ta kaba.” — At 13:​48, Tradução do Novo Mundo.

Antis, no ta konsentraba na nkorna apresentasons i da jintis publikasons. Gosi, no pirsisa di minjoria no manera di kombersa ku jintis. No misti mostra amor pa utrus, ora ku no na papia di asuntus ku na interesa elis. Es signifika, sibi adapta i nota ke ku na preokupa i interesa kada algin ku no kontra ku el. Kuma ku es broŝura na judanu fasil?

Es broŝura tene 12 lisons ku na nsinanu tene maneras di sedu ku no pirsisa del, pa mostra amor i fasi disipulus. Kada lison basia na un storia di Biblia ku na fala di un manera di sedu ku Jesus, o utrus kristons di purmeru sekulu mostra na ministeriu. Objetivu i ka pa nkorna apresentasons, ma i pa jubi maneras di mostra amor pa jintis. I bardadi di kuma no pirsisa di mostra tudu es maneras di sedu na pregason. Ma no na fala di kuma ku alguns maneras di sedu i importanti dimas, ora ku no na kumsa kombersas, fasi rivisitas o ora ku no na diriẑi studus bibliku.

Ora ku bu na studa kada lison, pensa diritu na kuma ku bu na mostra es manera di sedu, ora ku bu na papia ku jintis nunde ku bu mora. Sforsa pa aumenta bu amor pa Jeova i pa jintis. Es amor i ka un simplis teknika. I na judau yangasa bu objetivu di fasi disipulus.

No da balur pa es oportunidadi garandi di tarbaja ku bos na mesmu sintidu. (Sof 3:9) Pa Jeova bensua bos ciu, nkuantu bo kontinua ama jintis i fasi disipulus!