FASI DISIPULUS
LISON 11
Nsina di manera simplis
Prinsipiu di Biblia: “Kuma ku algin na ntindi ke ku bo na fala si bo na papia un lingua ku ka kunsidu?” — 1 Kor 14:9.
Ke ku Jesus fasi
1. Jubi VIDEO, o lei Mateus 6:25-27. Dipus pensa diritu nes purguntas:
-
Kuma ku Jesus usa komparason pa mostra di kuma Jeova ta kuida di nos?
-
Jesus sibi manga di kusas aserka di kacus, ma mesmu asin, kal kusas simplis ki konsentra nel? Pabia ku es seduba un bon manera di nsina?
Ke ku no aprindi di Jesus?
2. Ora ku no nsina di un manera simplis, jintis na lembra di ke ku no nsina elis i no na toka se korson.
Kopia isemplu di Jesus
3. Ka bu papia ciu. En ves di konta tudu ke ku bu sibi aserka di un asuntu, konsentra na informason ku sta na publikason di studu. Ora ku bu fasi un purgunta, pera ku pasensa pa bu studanti ruspundi. Si i ka sibi resposta o i fala un kusa ku sta kontra ke ku Biblia ta nsina, fasi utrus purguntas pa judal rasiosina. Ora ku bu studanti ntindi un asuntu, bai pa utru.
4. Usa ke ku bu studanti sibi ja pa judal ntindi nobu kusas. Pur isemplu, antis di kumsa un lison ku na fala di resureison, bu pudi fasi un revisonsiñu di ke ku studanti aprindiba ja aserka di ke ku ta kontisi ora ku un algin muri.
5. Usa komparasons diritu. Antis di usa un komparason, punta bu kabesa:
-
‘Sera ki es komparason i simplis?’
-
‘Sera ki i na fasil pa ña studanti ntindil?’
-
‘Sera ki i na juda ña studanti ka lembra so di komparason, ma tambi lembra di pontu prinsipal?’
