1, 2. Nunde ku no pudi oja un bon kau di sugundi aos?

IMAẐINA bu sta na yanda na un kamiñu, na un dia di turbada. Seu sta sukuru dimas. Raius na da faiska i na rebenta, dipus cuba kai risu. Bu kuri, bu na buska kau di sugundi, ku ten-dipresa. Pertu di strada, bu oja un kau di sugundi. I un kau suguru, seku i ku sta diritu. Bu na kontenti oja ki kau suguru!

² No sta na vivi na tempu di turbada. Kondison di mundu sta na bai di mal pa pior. Nunde ku no pudi oja kau di sugundi, asin pa ka no sufri danu spiritual i pirdi speransa di vida ku ka ta kaba? Jubi ke ki Biblia ta sina: “N na fala di SIÑOR: ‘El i ña Deus, ña kau suguru, ña lugar forti; N na fiansa nel.’” — Salmu 91:2.

3. Kuma ku no pudi fasi di Jeova no kau di sugundi?

³ Pensa nes! Jeova, Kriadur i Soberanu di universu, pudi sedu un bon kau di sugundi pa nos. I pudi proteẑinu, pabia i  mas puderosu di ki kualker algin o kualker kusa ku pudi fasinu mal. Mesmu si no fasidu mal, Jeova pudi kaba ku tudu ki mal. Kuma ku no pudi fasi di Jeova no kau di sugundi? No pirsisa di konfia nel. Alen di kila, Palabra di Deus falanu: “Bo fika sempri dentru di amor di Deus.” (Judas 21) Na bardadi, no pirsisa di manti na amor di Deus, manti un bon relason ku no Pape ku sta na seu. Asin, no pudi tene serteza di kuma el i no kau di sugundi. Ma kuma ku no pudi disenvolvi es relason?

4, 5. Di kal maneras ku Jeova ta mostra amor pa nos?

⁴ Pa manti na amor di Deus, no pirsisa di ntindi kuma ki Jeova mostra si amor pa nos. Pensa na alguns nsinus di Biblia ku bu aprindi ku ajuda des livru. Suma Kriadur, Jeova danu Tera suma un kau bunitu pa no mora. I incil ku manga di kusas di kume ku yagu, rikezas natural, limarias ku ta adimiranu ku kaus bunitu. Suma Dunu di Biblia, Deus kontanu si nomi ku si kualidadis. Alen di kila, si Palabra mostra ki i manda si propi Fiju ki ama pa Tera, i disa Jesus sufri i muri pa nos. (Jon 3:16) Ke ki es prenda signifika pa nos? I danu speransa pa un futuru maravilyosu.

⁵ No speransa pa futuru, dipindi tambi di utru kusa ku Deus fasi. Jeova stabilisi un guvernu ku sta na seu, Renu Mesianiku. I ka na tarda, i na bin kaba ku tudu sufrimentu i torna Tera na un paraisu. Pensa so nes! No na pudi vivi la ku pas i ku filisidadi pa sempri. (Salmu 37:29) Ma gosi, Deus ta danu orientason pa sibi kuma ku no pudi vivi di minjor manera ku no pudi desdi gosi. I danu tambi privileẑiu di orason, asin, no pudi kumunika kel avontadi. Es i so alguns maneras ku Jeova ta mostra amor pa tudu jintis i pa bo pesualmenti.

6. Kuma ku bu pudi aẑi di akordu ku amor ki Jeova mostra pa bo?

 ⁶ Purgunta importanti ku bu dibi di pensa nel i es: Kuma ki N na aẑi di akordu ku amor di Jeova? Manga di jintis na fala: “N ten di ama Jeova tambi.” I asin ku bu pensa? Jesus fala kuma, mandamentu mas garandi di tudu i es: “Ama Siñor bu Deus ku tudu bu korson, ku tudu bu alma, ku tudu bu ntindimentu.” (Mateus 22:37) Ku serteza bu tene manga di motivu pa ama Jeova Deus. Ma sera ki tene sintimentu di kuma no ama Deus i sufisienti pa fala kuma no ama Jeova ku tudu no korson, alma ku ntindimentu?

7. Ke ki amor pa Deus pudi judanu fasi? Splika.

⁷ Biblia mostra kuma, amor pa Deus i importanti dimas. Ke ki amor pa Deus pudi judanu fasi? No jubi un izemplu ku na mostra kila: Bu misti kume un fruta, ma algin dau kuku di ki fruta, sera ki bu na kontenti? Ku serteza i ka na kontentau! Es kuku i so kumsada di un arvuri ku na bin padi fruta. Suma kil kuku, tambi amor pa Deus i so kumsada. Biblia fala: “No amor pa Deus ta mostra na manera ku no ta obdisi si mandamentus. Si mandamentus gora, nin e ka kansadu.” (1 Jon 5:3) Asin si no tene amor di bardadi pa Deus, no amor dibi di kirsi i padi bon frutu. No ason dibi di mostra kuma na bardadi no ama Deus. — Lei Mateus 7:6-20.

8, 9. Kuma ku no pudi mostra no amor ku apresu pa Deus?

⁸ No ta mostra no amor pa Deus ora ku no obdisi si mandamentus i aplika si orientasons. I ka muitu difisil fasi kila. En ves di sedu kansadu, leis di Jeova fasidu pa judanu vivi di un bon manera, ku filisidadi i ku alegria. (Isaias 48:17, 18) Si no vivi na armonia ku orientason  di Jeova, no ta mostra no Pape ku sta na seu di kuma, no apresia tudu ke ki fasi pa nos. Infilismenti, puku jintis aos na mundu ku ta mostra es tipu di apresu. No ka misti sedu ingratu suma jintis ku viviba oca Jesus staba na Tera. Jesus kuraba des leprosu, ma so un son ku riba pa bin gardisil. (Lukas 17:12-17) Ku serteza no misti sedu suma kil ku gardisi, i ka suma ki novi ingratus!

⁹ Ma, kal ki mandamentus di Jeova ku no pirsisa di obdisi? No fala ja di manga delis nes livru, ma no na ripiti mas alguns. Obdisi mandamentus di Deus na judanu manti na amor di Deus.

10. Splika ke ku manda i importanti kontinua aprindi aserka di Jeova Deus?

¹⁰ Aprindi aserka di Jeova i un pasu importanti pa pertusi mas del. I un kusa ku dibi di kontinua. Si bu sta na rua na un noiti ki kau fria ciu, i bu sta na  kenta na fugu, sera ki bu na disa pa fugu rapati te na puntu di paga? Nau. Bu na kontinua buri leña pa fugu kontinua yardi. Bu vida dipindi di fugu kontinua yardi! Suma ku leña ta buri fugu, di mesmu manera, “kunsimentu di Deus” ta manti forsa di no amor pa Jeova. — Ditus 2:1-5.

11. Kal rusultadu ku nsinu di Jesus tene na si sigiduris?

¹¹ Jesus mistiba pa si sigiduris kontinua manti se amor vivu i forti pa Jeova i pa Si Palabra di bardadi ku tene balur. Dipus di si resureison, Jesus sina dus di si disipulus aserka di alguns profesias di Skrituras ebraiku ku kumpri nel. Kal ki seduba rusultadu? Mas tardi, e bin fala: “Nta no korson ka na yardinu ki ora na kamiñu ki na papia ku nos, oca i na splikanu Skritura?” — Lukas 24:32.

12, 13. (a) Entri maioria di pekaduris aos, ke ki akontisi ku amor pa Deus i pa Biblia ?(b) Ke ki no pudi fasi pa no amor pa Deus ka fria?

¹² Oca ku bu kumsa aprindi ke ki Biblia na bardadi ta sina, bu ka nota kuma bu korson kumsa yardi di alegria, amor pa Deus ku diseẑu garandi di papia ku utrus aserka di bardadi? Sin duvida bu nota kila. Manga di jintis sinti di mesmu manera. Purblema gosi i pa manti kil amor vivu i judal kirsi. No ka misti sigi mundu di aos. Jesus falaba ja: “Amor di manga di jinti na fria.” (Mateus 24:12) Ke ku pudi fasi, pa bu amor pa Jeova i pa bardadis di Biblia ka fria?

¹³ Kontinua aprindi aserka di Jeova Deus ku Jesus Kristu. (Jon 17:3) Medita o rifliti na ke ki bu aprindi na Palabra di Deus, punta bu kabesa: ‘Ke ki es ta sinan aserka di Jeova Deus? Kal motivu ki ta dan di ama Jeova ku tudu korson, alma ku ntindimentu? (Lei Salmu 77:12.) Es tipu di meditason na manti forsa di bu amor pa Jeova.

14. Kuma ki orason pudi judanu manti vivu no amor pa Jeova?

¹⁴ Utru manera di manti forsa di bu amor pa Jeova i  ora sempri. (1 Tesalonisensis 5:17) Na Kapitulu 17 des livru, no ojaba kuma orason i un prenda di balur ki Deus danu. Suma amizadi entri dus jintis ta torna mas forti ora ke na kumunika sempri di un manera abertu, di mesmu manera, no amizadi ku Jeova ta kontinua forti i vivu si no ta ora sempri. I importanti pa ka nunka no disa no orasons torna mekaniku — simplis palabras ku no ta ripiti-ripiti sin sintimentu o sin sintidu. No pirsisa di papia ku Jeova suma ku un mininu ta papia ku si pape ki gosta del. Sin duvida, no misti papia ku rispitu, ma di un manera abertu, klaru i ki bin di korson. (Salmu 62:8) Sin duvida, studu pesual di Biblia ku orason di tudu korson i kusas importanti di no adorason, e ta judanu manti na amor di Deus.

15, 16. Ke ku manda no dibi di nkara tarbaju di pregason di Renu suma un oportunidadi garandi i suma un rikeza?

¹⁵ Studu pesual di Biblia ku orason, i atus di adorason ku no pudi fasi anos so. Ma gosi, no jubi un aspetu di adorason ku no ta fasi di manera publiku: Papia ku utrus aserka di no krensas. Bu ciga ja di konta utrus alguns bardadi di Biblia? Si asin, bu tene un opurtunidadi garandi di sirbi Jeova. (Lukas 1:74) Ora ki no konta utrus bardadis di Biblia ku no aprindi aserka di Jeova Deus, no ta sta na kumpri un tarbaju importanti dimas ku dadu pa tudu kristons di bardadi — ku sedu pregason di bon noba di Renu di Deus. — Lei Mateus 24:14; 28:19, 20.

¹⁶ Apostulu Paulu ta nkaraba si tarbaju di pregason suma un kusa di balur, i comal di rikeza. (2 Koríntius 4:7) Papia ku jintis aserka di Jeova Deus ku si intenson, i minjor tarbaju ku bu pudi fasi. I tarbaju pa minjor Patron, i ta da minjor benefisiu ku pudi ten. Si bu  partisipa nes tarbaju, bu ta sta na juda jintis di korson sinseru pa e pertusi di no Pape ku sta na seu, i kumsa yanda na kamiñu pa vida ku ka ta kaba! Kal tarbaju ki pudi sedu mas bon di ki es? Alen di kila, papia aserka di Jeova i di si Palabra ta omenta bu propi fe i fortalisi bu  amor pa rel. Jeova ta apresia bu sforsu. (Ebreus 6:10) Sta okupadu nes tipu di tarbaju na judau manti na amor di Deus. — Lei 1 Koríntius 15:58.

17. Ke ku manda tarbaju di pregason i urẑenti aos?

¹⁷ I importanti lembra di kuma, tarbaju di pregason di Renu i urẑenti. Biblia fala: “Konta Palabra di Deus; si tempu i bon o i ka bon.” (2 Timótiu 4:2) Ke ku manda i urẑenti dimas fasi kila aos? Palabra di Deus falanu: “Ki garandi dia di SIÑOR sta pertu; i sta pertu, i na bin dipresa.” (Sofonias 1:14) Sin, tempu sta na pertusi ciu ora ki Jeova na bin kaba ku tudu es sistema di kusas. Jintis pirsisa di avisadu! E pirsisa di sibi kuma gosi i tempu di kuji Jeova suma se Deus. Fin “ka na tarda.” — Abakuk 2:3.

18. Ke ku manda no dibi di adora Jeova di manera publiku juntu ku kristons di bardadi?

¹⁸ Jeova misti pa no adoral di manera publiku juntu ku kristons di bardadi. E ku manda si Palabra fala: “No pensa na n̈utru, pa disperta n̈utru pa mostra amor, pa fasi bon tarbaju. Ka no disa kustumu di junta, suma utrus ta fasi, ma no anima n̈utru kada bias mas, suma ku no oja Dia ku Siñor na bin mas na pertu.” (Ebreus 10:24, 25) Ora ku no junta ku no irmons na fe, no ta tene un opurtunidadi garandi di ngaba i adora no Deus di amor. Tambi no ta fortalisi i nkoraẑa n̈utru.

19. Ke ki no pudi fasi pa fortalisi amor na kongregason kriston?

¹⁹ Nkuantu no na asosia ku utrus adoraduris di Jeova, no ta omenta amor ku amizadi na kongregason. I importanti pa no jubi bon kualidadis na utrus, suma ki Jeova ta fasi. Ka bu pera perfeison di bu irmons na fe. Lembra di kuma, tudu sta na fasi sforsu pa disenvolvi se bon relason ku Deus, ma e sta na diferenti fasi di progresu. No dibi di lembra tambi ki kada un di nos ta yara.  (Lei Kolosensis 3:13.) Buska tene amizadi intimu ku kilis ku ama Jeova ciu, i bu na bin oja kuma bu kirsi na sintidu spiritual. Sin, adora Jeova ku bu irmons spiritual, na judau manti na amor di Deus. Kuma ki Jeova ta abensua kilis ku ta adoral ku fidelidadi i ku manti na si amor?

20, 21. Ke ki ‘vida di bardadi,’ i pabia di ke ki sedu un speransa maravilyosu?

²⁰ Jeova ta abensua si servus fiel ku vida. Ma kal tipu di vida? Sera ki na bardadi, bu sta na vivi gosi? Maioria di nos na fala: Sin, no sta na vivi. Pabia no ta da folgu, no ta kume i no ta bibi. Sin duvida, no dibi di vivi. Na no mumentus mas filis, talves no pudi te mesmu fala: “Es propi ki vida!” Ma, Biblia mostra kuma, na sintidu importanti, nin un pekadur aos ka sta na vivi di bardadi.

²¹ Palabra di Deus nsentivanu pa ‘pega risu vida di bardadi.’ (1 Timótiu 6:19) Es palabras ta mostra ki ‘vida di bardadi’ i kusa ku no pudi spera yangasa na futuru. Ora ku no yangasa vida ku ka ta kaba ku no sta na spera na un paraisu na Tera, no ka na duensi mas o beju. No na tene pas ku filisidadi. Na ki tempu no na tene ‘vida di bardadi,’ vida ki Deus mistiba pa no tene disna di kumsada — vida ku ka ta kaba. (1 Timótiu 6:12) Sera ki es i ka un speransa maravilyosu?

22. Kuma ku bu pudi ‘pega risu vida di bardadi’?

²² Kuma ku no pudi ‘pega risu vida di bardadi’? Na mesmu kontestu, Paulu nsentiva kristons pa “fasi ben” i pa “rikusi ku bon obra.” (1 Timótiu 6:18) I klaru kuma, tudu ta dipindi di kuma ku no ta aplika bardadi ku no aprindi atraves di Biblia. Ma sera ki Paulu misti fala kuma no na gaña ‘vida di bardadi’ atraves di bon obras? Nau, es speransa maravilyosu dipindi di no risibi “fabur  di Deus.” (Romanus 5:15) Ma, Jeova ta sta kontenti di abensua kilis ku ta sirbil ku fidelidadi. I misti ojau na vivi ‘vida di bardadi.’ Kilis ku manti na amor di Deus pudi spera tene un vida di filisidadi, di pas, pa sempri.

23. Ke ku manda i importanti manti na amor di Deus?

²³ Kada un di nos dibi di punta si kabesa: ‘N ta adora Deus di manera ki faladu na Biblia?’ Si no mostra kila, na no vida di kada dia, di kuma no ta adora Deus des manera, enton no sta na un bon kamiñu. No pudi tene konfiansa di kuma Jeova i no kau suguru. I na proteẑi si servus fiel na ultimus dias difisil des sistema di kusas. Jeova tambi na fasinu yentra ku suguransa na novu sistema di kusas ku sta pertu. I un alegria garandi vivi na kil tempu! No na kontenti dimas di sibi kuma no fasi bon skolia duranti es ultimus dias! Si bu fasi kil skolia gosi, bu na bin tene ‘vida di bardadi,’ vida pa sempri, suma ki Jeova Deus mistiba pa i sedu!