LIVRU di Apokalipsi tene spresons ku ka dibi di ntindidu di manera literal. Pur izemplu, i fala di un minjer ku na si testa i staba skritu nomi “Garandi Babilonia.” Es minjer faladu del suma kin ku sinta na “multidon di jinti.” (Apokalipsi 17:1, 5, 15) Suma ki nin un minjer literal ka pudi fasi es, Babilonia Garandi dibi di sedu simboliku. Asin, ke kes simboliku minjer di mau vida ta representa?

Na Apokalipsi 17:18, mesmu minjer simboliku faladu del suma “garandi prasa ku ta manda riba di reis di mundu.” Palabra “prasa” ta rifiri un grupu di jintis ku tene un mesmu objetivu. Suma es “garandi prasa” ta kontrola “reis di mundu,” minjer comadu di Babilonia  Garandi dibi di sedu un organizason ku tene un nfluensia internasional. Es i ka un organizason pulitiku o komersial, ma i tudu grupu di riliẑion falsu na mundu. Jubi kuma ki alguns partis di livru di Apokalipsi ta lebanu ciga es konkluson.

Minjer comadu Babilonia Garandi i ka un organizason pulitiku, pabia Palabra di Deus fala kuma “reis di tera”, o elementus pulitiku des mundu, ta “pekaba” ku el. Si pekadu na rifiri aliansas ki fasi ku reis des mundu, i tambi i ta fasi kualker kusa pa pudi tene se favor i pa influensia elis. Kila ku pui i comadu di “minjer di fama ku tene mau vida.” — Apokalipsi 17:1, 2; Tiagu 4:4.

Minjer comadu Babilonia Garandi i ka un organizason komersial pabia “nogosiantis di mundu”, ku sedu elementus komersial, na bin cora ora ki kabadu kel. Na bardadi, tantu reis suma komersiantis faladu del suma kilis ku na jubi Babilonia Garandi di “lunju.” (Apokalipsi 18:3, 9, 10, 15-17) Pa kila, i normal konklui ki Babilonia Garandi i ka un organizason pulitiku o komersial, ma i un organizason riliẑiozu.

Identidadi riliẑiozu di Babilonia Garandi konfirmadu mas pa diklarason di kuma i ta ngana tudu nasons atraves di si ‘pratikas di spiritismu.’ (Apokalipsi 18:23) Suma ki tudu tipu di spiritismu bin di riliẑion ku dimonius, i ka surpreza pa manera ki Biblia coma Babilonia Garandi di “morada di dimonius.” (Apokalipsi 18:2; Ripitison di Lei 18:10-12) Es organizason faladu del tambi suma kil ku sta kontra riliẑion di bardadi, i ta pirsigi “anunsiaduris” ku “pobu di Deus.” (Apokalipsi 18:24) Na bardadi, Babilonia Garandi tene es tipu di odiu garandi kontra riliẑion di bardadi ku ta lebal na pirsigil ku violensia te mesmu mata kilis ku ta da “tustumuñu di Jesus.” (Apokalipsi 17:6) Asin, es minjer comadu di Babilonia Garandi ta representa di manera klaru, tudu riliẑions na mundu ntidu, ku sta kontra Jeova Deus.