1. Kal ki intenson di Deus pa Tera?

NA bardadi intenson di Deus pa Tera i maravilyosu. Jeova misti pa Tera inci di jintis filis i ku tene bon saudi. Biblia fala ki “Deus fasi jardin na tera comadu Eden” o paraisu, dipus i “fasi pa arvuris nasi . . . ku bonitu ba pa oja, i bon pa kume.” Dipus ki Deus kumpu purmeru omi ku minjer, Adon ku Eva, i pui elis na kil paraisu bunitu i fala elis: “Bo padi ciu, bo inci mundu, bo manda riba del.” (Kumsada 1:28; 2:8, 9, 15) Asin, intenson di Deus i pa pekaduris padi fijus, omenta limiti di kil paraisu pa tudu Tera i kuida di limarias.

2. (a) Kuma ku no sibi ki intenson di Deus pa Tera na bin kumpri? (b) Sugundu ke ki Biblia fala, kal tipu di jintis ku na bin vivi pa sempri?

² Bu pensa kuma intenson di Jeova Deus, pa pekaduris vivi na Tera ku na torna paraisu, na bin kumpri? Deus fala, “Konformi N fala . . . N ta fasil.” (Isaias 46:9-11; 55:11) Ku serteza, Deus na bin fasi ke ki purmiti! I fala kuma ‘I ka kumpu tera pa i limpu, sin nada’ ma “i formal pa i tene moraduris.” (Isaias 45:18) Kal tipu di jintis ku Deus misti pa e vivi na  Tera? I pa kantu tempu ki i misti pa e vivi na Tera? Biblia ruspundi: “Justus na yarda ki tera, e na mora nel pa sempri.” — Anos ku pui italiku. — Salmu 37:29; Apokalipsi 21:3, 4.

3. Kal kondisons tristi ku ten aos na Tera, i kal purguntas ku kila ta lantanda?

³ Suma ki sibidu, es ka akontisi inda. Jintis kontinua duensi, muri; te mesmu e ta geria i mata n̈utru. Algun kusa kuri mal. Na bardadi, Deus ka mistiba pa Tera sedu suma ki sedu aos! Ke ki akontisi? Ke ku manda intenson di Deus ka kumpri? Nin un livru di storia ku skirbidu pa pekaduris ka pudi kontanu motivu, pabia purblema kumsa na seu.

4, 5. (a) Kin ku na bardadi papia ku Eva atraves di un kobra? (b) Kuma ki un algin bon i onestu pudi torna un ladron?

⁴ Purmeru livru di Biblia fala di un algin ku sta kontra Deus ku surẑi na jardin di Eden. I comadu di “serpenti,” ma el i ka un simplis limaria. Ultimu livru di Biblia identifikal suma “diabu ku Satanas, ku ta ngana tudu mundu.” I comadu tambi di “antigu serpenti.” (Kumsada 3:1; Apokalipsi 12:9) Es anju puderosu o kriatura spiritual ku no ka pudi oja, i usa un kobra pa papia ku Eva, i fasi suma si kontra kobra ku staba na papia. Sin duvida, es kriatura spiritual matiba kontra Jeova kumpu Tera pa pekaduris. — Jo 38:4, 7.

⁵ Suma tudu ke ki Jeova kumpu i perfeitu, gosi, kin ki kumpu es “Diabu,” o “Satanas”? Di un manera simplis, un di puderosu fijus spiritual di Deus fasi si kabesa Diabu. Kuma kes pudi sedu? Un algin bon i onestu pudi torna un ladron. Kuma ki kila pudi akontisi?  Kil algin pudi disa un mau diseẑu kirsi na si korson. Si kontinua pensa nel, ki mau diseẑu pudi bin torna mas forti. Dipus si tene opurtunidadi, i pudi aẑi sugundu si mau diseẑu. — Lei Tiagu 1:13-15.

6. Kuma ki un fiju puderosu di Deus torna Satanas Diabu?

⁶ Es akontisi ku Satanas Diabu. I pudi sedu ki i obi Deus na fala Adon ku Eva pa e padi fijus i inci Tera. (Kumsada 1:27, 28) Sin duvida Satanas pensa: ‘Tudu es pekaduris pudiba adoran en ves di adora Deus!’ Asin un mau diseẑu kirsi na si korson. Dipus, i aẑi i disvia Eva i kontal mintidas aserka di Deus. (Lei Kumsada 3:1-5.) Asin i torna “Diabu,” ku signifika “Difamadur.” Na mesmu tempu, i torna “Satanas,” ku signifika “Inimigu.”

7. (a) Ke ku manda Adon ku Eva muri? (b) Ke ku manda tudu fijus di Adon ta beju i e ta muri?

⁷ Atraves di mintida ku tarpasa, Satanas Diabu pui Adon ku Eva disobdisi Deus. (Kumsada 2:17; 3:6) Suma rusultadu, e bin muri, suma ki Deus falaba e na muri si e disobdisi. (Kumsada 3:17-19) Suma Adon torna mperfeitu oca i peka, tudu si fijus yarda si pekadu. (Lei Romanus 5:12.) Situason pudi ilustradu ku un forma di fasi bulu. Si forma tene un difeitu, ke ki na akontisi ku kada bulu ku fasidu la? Kada bulu na tene un difeitu o mperfeison. Di mesmu manera, kada pekadur yarda un “difeitu” di mperfeison di Adon. E ku manda tudu pekadur ta beju i ta muri. — Romanus 3:23.

8, 9. (a) Kal disafiu ku Satanas lantanda? (b) Ke ku manda Jeova ka kaba ku rebeldis logu?

⁸ Kontra Satanas pui Adon ku Eva peka kontra Deus, na bardadi i staba na lidera un rebelion. I staba na disafia manera ku Jeova ta guverna. Na bardadi,  Satanas staba na fala: ‘Deus i un mau guvernanti. I ta konta mintida, i ta tuji si servus bon kusas. Pekaduris ka pirsisa di sedu guvernadu pa Deus. Elis propi e pudi disidi ke ki bon i ke ki mau. I e na mas sta ben bas di ña guvernu.’ Kuma ki Deus na lidaba kes akusason gravi? I ten kilis ku ta pensa kuma, Deus dibi di kababa so ku rebeldis. Ma sera ki es na ruspundiba  disafiu di Satanas? Sera ki kila na provaba kuma, manera di Deus guverna i minjor?

⁹ Justisa perfeitu di Jeova ka na pirmitilba kaba ku rebeldis logu. I disidi kuma, i pirsisba tempu pa ruspundi akusason di Satanas di un bon manera, i prova kuma Diabu i muntrus. Asin, Deus disidi disa pekaduris guverna se kabesa pa un tempu bas di nfluensia di Satanas. Ke ku manda Jeova fasil i pabia ki disa manga di tempu pasa antis di rosolvi es purblemas? Es asuntu na faladu del na Kapitulu 11 des livru. Ma gosi, i bon pensa nes: Sera ki Adon ku Eva teneba motivu di fia na Satanas, ku nunka fasi nada di bon pa relis? Sera ki e staba sertu di fia kuma Jeova, ku daba elis tudu ke tene, i un muntrus malvadu? Ke ki bu na fasiba?

10. Kuma ki bu pudi toma ladu di Jeova pa ruspundi akusason di Satanas?

¹⁰ I bon pensa nes purguntas pabia kada un di nos ta nfrenta mesmu situason aos. Na bardadi, bu tene opurtunidadi di apoia ladu di Jeova pa ruspundi akusason di Satanas. Bu pudi seta Jeova suma bu Guvernanti i juda mostra ki Satanas i un muntrus. (Salmu 73:28; lei Ditus 27:11.) Infilismenti, entri bilyons di jintis ku sta na mundu, i so puku jintis ku fasi es skolia. Es ta lantanda un purgunta importanti: Sera ki na bardadi Biblia ta sina ki Satanas ki na guverna es mundu?

11, 12. (a) Kuma ki un tentason ki Jesus pasa ta mostra ki Satanas i guvernanti des mundu? (b) Ke mas ku ta mostra kuma Satanas i guvernanti des mundu?

¹¹ Jesus nunka duvida kuma i Satanas ki guvernanti  des mundu. Atraves di un milagri, Satanas ciga di mostra Jesus “tudu renus di mundu ku si gloria.” Dipus Satanas purmiti Jesus: “N na dau es tudu si bu mpina, bu adoran.” (Mateus 4:8, 9; Lukas 4:5, 6) Pensa nes. Kuma ki Satanas pudiba da Jesus tudu renus di mundu si i ka di sil? Jesus ka nega kuma, tudu es guvernus di mundu pertensi Satanas. Ku serteza, Jesus na fasiba kila si Satanas ka staba tras des guvernus.

¹² Na bardadi, Jeova i Deus ku ten tudu puder, Kriadur di Universu maravilyosu. (Apokalipsi 4:11) Ma, nin parti di Biblia ka fala kuma Jeova o Jesus i guvernanti des mundu. Na bardadi, di un manera klaru, Jesus fala di Satanas suma “ŝef de mundu.” (Jon 12:31; 14:30; 16:11) Te mesmu Biblia fala di Satanas Diabu suma “deus de mundu.” (2 Koríntius 4:3, 4) Aserka des inimigu o Satanas, apostulu Jon skribi: “Mundu sta bas di puder di ki malvadu.” — 1 Jon 5:19.

13. Ke ku manda i pirsis un novu mundu?

¹³ Kada anu, mundu sta na torna mas pirigosu. I sta ŝeiu di tropas agresivu, pulitikus disonestu, lideris riliẑiozu finjiduris ku kriminosus garandi. I impusivel muda mundu ntidu. Biblia mostra kuma tempu pertu pa Deus kaba ku mundu mau na si gera di Armajedon. Un novu mundu di justisa na toma lugar des mundu. — Apokalipsi 16:14-16.

14. Kin ki Deus kuji pa sedu Rei di si Renu, i kuma ki faladuba ja del?

¹⁴ Jeova Deus kuji Jesus Kristu pa sedu Guvernanti  di si Renu o guvernu ku sta na seu. Manga di tempu atras Biblia falaba: “Un mininu padidu ja pa nos; no dadu un fiju. Puder di guberna sta riba di si ombras; si nomi na comadu . . . Rei di Pas. Kirsimentu di gubernu ku si pas ka na ten kabantada.” (Isaias 9:6, 7) Aserka des guvernu, Jesus sina si disipulus ora: “Pa bu renu bin, pa bu vontadi fasidu na tera suma na seu.” (Mateus 6:10) Suma ku no na bin oja na Kapitulu 8 des livru, i ka na tarda, Renu di Deus na bin kaba ku tudu guvernus des mundu, i es propi Renu na bin toma se lugar. (Lei Daniel 2:44.) Dipus Renu di Deus na bin tisi paraisu li na Tera.

15. Ke ki “nobu tera”?

¹⁵ Biblia garantinu: “Anos, suma ki [Deus] fala na si purmesa, no na pera nobu seu ku nobu tera, nunde ki son ben ku na fasidu.” (2 Pedru 3:13; Isaias 65:17) Palabra “tera” nes versikulu, ta rifiri jintis ku mora na Tera. Asin “nobu tera” justu i un sosiedadi di jintis ku risibi aprovason di Deus.

16. Kal prenda sin igual ki Deus na da kilis ki aprova, i ke ki no dibi di fasi pa risibil?

¹⁶ Jesus purmiti ki na novu mundu ku na bin, kilis ku Deus aprova na bin risibi prenda di “vida ku ka ta kaba.” (Markus 10:30) Di fabur yabri bu Biblia na Jon 3:16 ku 17:3, i lei ke ki Jesus fala no dibi di fasi pa risibi vida ku ka ta kaba. Gosi jubi na Biblia bensons ku kilis ku kualifika pa risibi prenda maravilyosu di Deus na bin tene na Paraisu li na Tera.

17, 18. Kuma ku no pudi tene serteza di kuma, i na bin ten pas ku suguransa na tudu parti di mundu?

¹⁷ Maldadi, gera, krimi ku violensia na kaba. “Jintis  mau na disparsi . . . Ma jintis mansu na yarda tera.” (Salmu 37:10, 11) Pas na ten pabia ‘Deus na para gera na tudu ladu di mundu.’ (Salmu 46:9; Isaias 2:4) Dipus “jintis justu na ngaña forsa; i na ten manga di sabura nkuantu lua ten” — i kila signifika pa sempri! — Salmu 72:7.

¹⁸ Adoraduris di Jeova na bin vivi na suguransa. Nkuantu israelitas na tempus bibliku ta obdisi Deus, e ta viviba na suguransa. (Sirmonias 25:18, 19) I na sedu maravilyosu tene mesmu suguransa na Paraisu! — Lei Isaias 32:18; Mikeias 4:4.

19. Kuma ki no sibi kuma i na bin ten manga di kusas di kume na novu mundu di Deus?

¹⁹ I ka na ten mas falta di kusas di kume. Salmista kanta: “Pa i ten manga di trigu riba di kabesa di montis.” (Salmu 72:16) Jeova Deus na bin abensua justus, i “tera na da si kebur.”— Salmu 67:6.

20. Ke ku manda no pudi tene serteza di kuma, tudu Tera na bin torna un paraisu?

²⁰ Tudu Tera na bin torna un paraisu. Kasas ku jardins bunitu na bin toma lugar di kaus ku pekaduris dana. (Lei Isaias 65:21-24; Apokalipsi 11:18) Ku tempu, partis di Tera ku rekuperadu na omenta tok tudu Tera ta torna bunitu i produtivu suma jardin di Eden. I nunka Deus ka na maina ‘yabri si mon, i fartanda diseẑu di tudu ku tene vida.’ — Salmu 145:16.

21. Ke ku ta mostra kuma, i na bin ten pas entri pekaduris ku limarias?

²¹ I na bin ten pas entri pekaduris ku limarias. Limarias di matu ku di kasa na bin kume juntu. Te mesmu mininu siñu ka na medi limarias ku gosi sedu brabu. — Lei Isaias 11:6-9; 65:25.

22. Ke ku na bin akontisi ku duensa?

 ²² Duensa ka na bin ten. Suma guvernanti di Renu di Deus ku sta na seu, Jesus na bin kura jintis mas di ke ki fasiba oca i staba na Tera. (Mateus 9:35; Markus 1:40-42; Jon 5:5-9) Dipus, ‘Nin un algin ku mora na tera ka na fala: ‘N sta duenti.’ — Isaias 33:24; 35: 5, 6.

23. Ke ku manda resureison na tisi alegria pa no korson?

²³ Jintis ku no ama ku muri na bin vivi di novu. Si e obdisi Deus, e ka na muri mas. Tudu kilis ku muri i ku sta na memoria di Deus na bin resusitadu. Na bardadi, “i ten ku ten un resureison di mortu di bons [“justus,” NM] ku maus [“injustus,” NM].” — Atus 24:15; lei Jon 5:28, 29.

24. Ke ki bu pensa di vivi na un Paraisu na Tera?

²⁴ Un futuru maravilyosu na pera kilis ku kuji aprindi aserka di no Kriadur Garandi, Jeova Deus, i sirbil! I aserka di ki futuru Paraisu na Tera ku Jesus na falaba del, oca ki purmiti ki kriminosu ku muri pertu del: ‘Bu na sta ku mi na Paraisu.’ (Lukas 23:43) I importanti pa no aprindi mas aserka di Jesus Kristu, pabia i atraves del ku tudu es bensons na sedu pusivel.