1. Kal orason famozu ku no na bin izamina gosi?

MILYONS di jintis na mundu kunsi orason ku manga di jintis ta coma di “Pai nosso.” Es spreson ta rifiri un orason famozu ki propi Jesus Kristu da suma mudelu. I un orason ku tene signifikadu garandi, i konsiderason di si tris purmeru pididu na judau aprindi mas aserka di ke ki Biblia na bardadi ta sina.

2. Kal tris kusas ki Jesus sina si disipulus pa e pidi na orason?

² Na kumsada des orason mudelu, Jesus fala kilis ku na obil: “E ku manda bo dibi di ora asin: ‘No Pape ku sta na seu, no misti pa bu nomi rispitadu, pa bu renu bin, pa bu vontadi fasidu na tera suma na seu.’” (Mateus 6:9-13) Kal ki signifikadu des tris pididu?

3. Ke ki no pirsisa di sibi aserka di Renu di Deus?

³ No aprindi ja manga di kusas aserka di nomi di Deus, Jeova. Te sertu pontu, no falaba di vontadi di Deus — ke ki fasi ja, i ke ki i na bin fasi pa pekaduris. Gosi, ke ki Jesus na rifiri, oca i falanu pa no ora: “Pa bu renu bin”? Ke ki Renu di Deus? Kuma ki si vinda na pui pa nomi di Deus rispitadu o santifikadu? I kuma ki vinda di Renu relasiona ku vontadi di Deus fasidu?

4. Ke ki Renu di Deus i kin ki si Rei?

⁴ Renu di Deus i un guvernu ki Jeova Deus stabilisi ku un Rei ki i kuji. Kin ki Rei di Renu di Deus? Jesus Kristu. Jesus suma Rei i mas tudu utrus guvernanti, i comadu di “Siñor riba di tudu siñoris, Rei riba di tudu reis.” (Apokalipsi 17:14) I tene puder di fasi mas minjor di ki kualker guvernanti umanu, te mesmu minjor delis.

5. Nunde ku Renu di Deus sta, i ke ki i na bin guverna?

⁵ Nunde ku Renu di Deus sta? Nunde ki Jesus sta? Ku serteza bu lembra kuma i matadu na un staka, dipus i resusitadu. Korenta dias dipus, i subi pa seu. (Atus 2:33) Asin, i la ku Renu di Deus sta — na seu. E ku manda Biblia ta comal di “renu na seu.” (2 Timótiu 4:18) Renu di Deus sta na seu, ma i na bin guverna Tera. — Lei Apokalipsi 11:15.

6, 7. Ke ki ta fasi di Jesus un Rei sin igual?

⁶ Ke ki pui Jesus sedu un Rei sin igual? Pa un motivu, nunka i ka na muri. Oca i na kompara Jesus ku reis umanu, Biblia fala del asin: “El son ku ka ta muri, i mora na lus ku ningin ka pudi ciga nel.” (1 Timótiu 6:16) Es signifika ki tudu ben ki Jesus na fasi na sedu pa sempri. I na bin fasi manga di bon kusas pa jintis.

⁷ Jubi es profesia di Biblia aserka di Jesus: “Spiritu di SIÑOR na sinta riba del, Spiritu di jiresa ku ntindimentu, Spiritu di konsiju ku di puder, Spiritu di kunsimentu ku di rispitu pa SIÑOR. I na sta kontenti na rispitu pa SIÑOR. I ka na julga konformi kil ki oja ku si uju, nin i ka na disidi konformi kil ki obi ku oreja. Ma i na julga koitadis ku justisa; i na difindi diritu di jinti mansu na tera.” (Isaias 11:2-4) Es palabras ta  mostra ki Jesus na sedu un Rei justu ku ta sinti pena di jintis ku sta na Tera. Bu ka misti tene un rei suma es?

8. Ba kin ku na bin guverna ku Jesus?

⁸ Ali utru bardadi aserka di Renu di Deus: Jesus ka na guverna el son. I na bin guverna juntu ku utrus. Pur izemplu, apostulu Paulu fala Timotiu: “Si no fika firmi, tambi no na rena ku el.” (2 Timótiu 2:12) Na bardadi, Paulu, Timotiu ku utrus jintis fiel ku kujidu pa Deus na bin guverna juntu ku Jesus na Renu di seu. Kantu jintis ku na bin tene es opurtunidadi sin igual?

9. Kantu jintis ku na bin guverna juntu ku Jesus, i desdi kal tempu ku Deus kumsa kuji elis?

⁹ Suma ki faladu na Kapitulu 7 des livru, apostulu Jon risibi un vison nunde ki oja “la na monti di Sion [si pusison di Rei na seu] i staba sikidu Karnel [Jesus Kristu], juntu ku 144.000 jinti ku teneba si nomi ku nomi di si Pape skritu na se testa.” Ba kin ki es 144.000? Propi Jon kontanu: “I elis ku ta yanda tras di Karnel pa tudu ladu ki na bai. I sedu kilis ki kumpradu na metadi di jintis pa e sedu purmeru oferta pa Deus ku Karnel.” (Apokalipsi 14:1, 4) Na bardadi, elis i sigiduris fiel di Jesus Kristu ku kujidu spesialmenti pa guverna juntu kel na seu. Dipus ke resusitadu pa vida na seu, “e na rena riba di mundu” juntu ku Jesus. (Apokalipsi 5:10) Desdi tempu di apostulus, Deus sta na kuji kristons fiel pa kompleta numeru di 144.000.

10. Ke ku manda i amor di parti di Deus fasi pa Jesus ku 144.000 guverna pekaduris?

¹⁰ Manera ku Deus fasi pa Jesus ku 144.000 guverna pekaduris ta mostra amor garandi ki tene pa nos. Utru motivu i kuma, Jesus sibi ke ki signifika sedu pekadur  i ke ki signifika sufri. Paulu fala asin aserka di Jesus: “No ka tene un ŝef di saserdoti ku ka pudi ten pena di no frakesa, ma un ku sedu tentadu na tudu, suma anos, ma ku nunka ka peka.” (Ebreus 4:15; 5:8) Tambi, kilis ku na guverna juntu kel sufri i e manti fiel suma pekaduris. Alen di kila, e luta ku mperfeison i e aguenta tudu tipu di duensas. Ku serteza, e na bin ntindi purblemas ku pekaduris ta nfrenta!

11. Ke ku manda Jesus fala si disipulus kuma e dibi di ora pa vontadi di Deus fasidu na seu?

¹¹ Oca Jesus fala ki si disipulus dibi di ora pa Renu di Deus bin, i fala tambi ki e dibi di ora pa vontadi di Deus fasidu “na tera suma na seu.” Deus sta na seu, i si vontadi sempri fasidu la pa anjus fiel. Ma, na Kapitulu 3 des livru, no ojaba ki un anju mau para fasi vontadi di Deus, i pui Adon ku Eva fasi pekadu. Na Kapitulu 10, no na bin aprindi mas ke ki Biblia ta sina aserka di ki anju mau, ku no kunsi suma Satanas, Diabu. Satanas ku anjus mau ku kuji sigil — comadu di dimonius — pirmitidu fika na seu pa un tempu. Asin, i ka tudu kilis ku staba na seu ku ta fasi vontadi di Deus. Es na muda ora ki Renu di Deus kumsa guverna. Nobu Rei mposadu, Jesus Kristu, na geria ku Satanas. — Lei Apokalipsi 12:7-9.

12. Kal dus akontisimentus importanti ki faladu del na Apokalipsi 12:10?

¹² Es palabras profetiku splika ke ki na akontisi: “N obi un garandi vos na seu ku na fala: ‘Salbason di no Deus ciga. Gosi i mostra si puder suma rei. Otridadi sta ja na mon di si Kristu, pabia kil ku firma dianti di no Deus pa akusa no ermons, di noti  ku di dia, i durbadu ja.’” (Apokalipsi 12:10) Bu nota dus akontisimentus importanti ku faladu del nes versikulu di Biblia? Purmeru, Renu di Deus ku tene Jesus suma Rei kumsa ja guverna. Sugundu, Satanas spulsadu di seu pa Tera.

13. Kal ki rusultadu di Satanas spulsadu di seu?

¹³ Kal ki rusultadu des dus akontisimentus? Aserka di ke ki akontisi na seu, i faladu: “Seu, ku abos ku mora la, bo kontenti pabia de kusa ku kontisi!” (Apokalipsi 12:12) Na bardadi, anjus fiel na seu kontenti pabia, suma Satanas ku si dimonius ka sta mas na seu, tudu kilis ku sta na seu i fiel pa Jeova Deus. I ten pas ku armonia total na seu. Vontadi di Deus fasidu na seu.

14. Ke ki akontisi oca Satanas fercadu pa Tera?

¹⁴ Ke gora di Tera? Biblia fala: “Ai di kilis ku mora na tera ku mar! Pabia diabu disi pa bos ku garandi raiba; i sibi kuma i sobral puku tempu.” (Apokalipsi 12:12) Satanas paña raiba pabia i spulsadu di seu, i sobral so puku tempu. Na si raiba, i kausa purblemas, o “ai,” na Tera. No na bin aprindi mas aserka des “ai” na prosimu kapitulu. Ma suma i sedu sin, no pudi punta, kuma ki Renu di Deus na pui pa vontadi di Deus fasidu na Tera?

15. Kal ki vontadi di Deus pa Tera?

¹⁵ Lembra kal ki vontadi di Deus pa Tera. Bu aprindi ja aserka di kila na Kapitulu 3. Na Eden, Deus mostraba kuma si vontadi, i pa Tera sedu un paraisu ku inci di jintis justu ku na vivi pa sempri. Satanas leba Adon ku Eva pa e peka, i kila afeta kumprimentu di vontadi di Deus pa Tera, ma i ka mudal. Intenson di Jeova kontinua inda sedu es: “Justus na yarda ki tera, e na  mora nel pa sempri.” (Salmu 37:29) I Renu di Deus na bin kumpri kila. Di kal manera?

16, 17. Ke ki Daniel 2:44 falanu aserka di Renu di Deus?

¹⁶ Jubi profesia ku sta na Daniel 2:44. I fala sin: “Na tempu di ki reis, Deus di seu na lantanda utru renu ku nunka ka na danadu. Ki renu ka na pasa pa utru pobu; i na kebra-kebra tudu utru renus, i kaba ku elis. Ki renu na firmantadu diritu pa sempri.” Ke ki es ta sinanu aserka di Renu di Deus?

¹⁷ Purmeru, i ta mostranu ki, Renu di Deus stabilisidu ja “na tempu di ki reis,” o nkuantu utrus renu na izisti inda. Sugundu, i ta mostranu ki Renu na kontinua pa sempri. I ka na konkistadu i trokadu pa utrus guvernu. Tirseru, no oja ki, i na bin ten gera entri Renu di Deus ku renus des mundu. Renu di Deus na sedu vitoriosu. Pa fin, i na bin sedu uniku guvernu na mundu. Asin, pekaduris na bin tene minjor guvernu ku nunka e ciga di tene.

18. Kal ki nomi di gera entri Renu di Deus ku guvernus des mundu?

¹⁸ Biblia fala di manga di kusas aserka des gera garandi entri Renu di Deus ku guvernus des mundu. Pur izemplu, i ta sina ki, nkuantu tempu pa es gera na pertusi, spiritus mau na spalia mintidas pa disvia “reis di tudu mundu.” Ku kal objetivu? “Pa junta elis [reis] pa gera na ki garandi dia di Deus di tudu puder.” Reis di Tera na bin juntadu “na un lugar ku comadu Armajedon na lingua di ebreus.” (Apokalipsi 16:14, 16) Suma ki faladu nes dus versikulus, es gera entri guvernus di pekadur ku Renu di Deus ta comadu di gera di Armajedon.

19, 20. Ke ki pui te gosi vontadi di Deus ka fasidu inda na Tera?

 ¹⁹ Ke ki Renu di Deus na bin fasi atraves di gera di Armajedon? Pensa di nobu aserka di kal ki vontadi di Deus pa Tera. Jeova Deus mistiba pa Tera inci di jintis justu, perfeitu ku na sirbil na Paraisu. Ke ki pui kila ka akontisi te gosi? Purmeru, anos i pekadur, no ta duensi i no ta muri. No ojaba na Kapitulu 5 di kuma, Jesus muri pa nos, pa no pudi vivi pa sempri. Ku serteza bu na lembra di palabras ku sta na Ivanjeliu di Jon: “Deus ama jinti di mundu dimas, tok i da si uniku Fiju, pa tudu kil ku setal ka ta pirdi, ma i ta tene vida ku ka ta kaba.” — Jon 3:16.

²⁰ Utru kusa i ki, manga di jintis ta fasi kusas mau. E ta konta mintida, e ta ngana i e ta leba un vida imoral. E ka misti fasi vontadi di Deus. Jintis ku ta fasi mal na bin kabadu kel na gera di Deus comadu Armajedon. (Lei Salmu 37:10.) Utru motivu ku pui vontadi di Deus ka fasidu inda na Tera, i pabia guvernus ka ta nsentiva jintis fasil. Manga di guvernus pirdi forsa, e sedu mau o kuruptu. Biblia fala di un manera klaru: “Omi ta manda riba di si kumpañer pa fasil mal.” — Eklesiastis 8:9.

21. Kuma ki Renu di Deus na bin pui pa vontadi di Deus fasidu na Tera?

²¹ Dipus di Armajedon, pekaduris na bin sta bas di uniku guvernu, ku sedu, Renu di Deus. Es Renu na bin fasi vontadi di Deus i tisi bensons garandi. Pur izemplu, i na fica Satanas ku si dimonius na abismu. (Apokalipsi 20:1-3) Puder di sakrifisiu di Jesus na bin aplikadu, asin jintis fiel ka na bin duensi i muri mas. En ves di kila, bas di guvernu di Renu, e na  pudi vivi pa sempri. (Lei Apokalipsi 22:1-3.) Tera na tornadu na un paraisu. Asin, Renu di Deus na bin pui pa vontadi di Deus fasidu na Tera, i na bin santifika nomi di Deus. Ke ki es signifika? I signifika kuma, bas di guvernu di Deus, tudu jintis bibu na ngaba nomi di Jeova.

22. Ke ku manda no pudi fala ki Renu di Deus ka binba oca Jesus staba na Tera o logu dipus ki resusitadu?

²² Oca Jesus falaba si disipulus pa ora, “Pa bu renu bin,” i staba klaru di kuma, Renu ka binba inda na ki tempu. Sera ki i bin oca Jesus subi pa seu? Nau, pabia Pedru ku Paulu fala kuma dipus ki Jesus resusitadu, profesia di Salmu 110:1 kumpri nel: “SIÑOR fala ña Siñor: ‘Sinta na ña direita tok N pui bu inimigus suma tapeti pa bu diskansa pe nel.’” (Atus 2:32-35; Ebreus 10:12, 13) I tenba un piriudu di spera antis di Renu di Deus kumsa guverna.

23. (a) Kal tempu ku Renu di Deus kumsa guverna? (b) Ke ki na bin faladu del na prosimu kapitulu?

²³ Kantu tempu ki piriudu di spera na dura antis di Renu di Deus kumsa guverna? Duranti sekulu 19 ku 20, studantis sinseru di Biblia, ntindi puku-puku di kuma, es piriudu di spera na kaba na 1914. (Aserka des data, jubi Apendisi “1914 — Un anu importanti na profesia di Biblia.”) Akontisimentus  di mundu ku kumsa na 1914 ta konfirma kuma, ntindimentu des studantis sinseru di Biblia staba sertu. Kumprimentu di profesia di Biblia ta mostra ki na 1914, Kristu torna Rei i Renu di Deus ku sta na seu kumsa guverna. Asin, no sta na vivi na “puku tempu” ki sobra pa Satanas. (Apokalipsi 12:12; Salmu 110:2) No pudi fala tambi ku tudu serteza di kuma, i ka na tarda, Renu di Deus na bin aẑi pa pui pa vontadi di Deus fasidu na Tera. Bu ka aŝa kuma es i bon noba? Bu fia kuma es i bardadi? Prosimu kapitulu na judau oja ki, na bardadi Biblia ta sina es kusas.