1, 2. Da alguns izemplus di pekaduris ku Jeova nkaraba suma si amigus intimu?

KAL tipu di algin ku bu na kuji suma un amigu? Sin duvida, bu na misti tene kompañia di algin ku bo tene mesmu manera di nkara kusas, mesmu nteresi ku normas. I bu na atraidu pa algin ku tene bon kualidadis, suma onestidadi ku bondadi.

² Na tudu storia di mundu, Deus kuji sertus pekaduris pa sedu si amigus intimu. Pur izemplu, Jeova coma Abraon di si amigu. (Lei Isaias 41:8; Tiagu 2:23.) Deus fala di Davi suma “omi ku sedu suma ku ña korson misti” pabia i seduba tipu di algin ku Jeova gosta del. (Atus 13:22) Jeova nkara profeta Daniel suma ‘algin ki ama ciu.’ — Daniel 9:23.

3. Ke ku manda Jeova kuji sertu jintis pa sedu si amigu?

³ Ke ku manda Jeova nkaraba Abraon, Davi ku Daniel suma si amigus? I falaba Abraon: “Bu obi ke ku N falau.” (Kumsada 22:18) Asin, Jeova ta pertusi di jintis  umildi i ku ta fasi ke ki i fala. I fala israelitas: “Bo obi ña palabra; N ta sedu bo Deus, abos bo ta sedu ña pobu.” (Jeremias 7:23) Si bu obdisi Jeova, bu pudi tambi sedu si amigu!

4, 5. Kuma ki Jeova ta usa si puder pa juda si povu?

⁴ Pensa na ke ki amizadi ku Deus signifika. Biblia fala kuma Jeova sta na buska opurtunidadi “pa fortifika kilis ku tene korson pirfitu pa el.” (2 Kronikas 16:9) Kuma ki Jeova ta usa si puder pa judanu? Un manera mostradu na Salmu 32:8, nunde ku Jeova fala sin: “N na sinau, N mostrau kamiñu ku bu dibi di yanda nel; N na giau ku ña uju.”

⁵ Es palabras atraenti ta mostra kuma ki Jeova ta kuida di nos! I na dau orientason ku bu pirsisa del, i na proteẑiu nkuantu bu sta na pui es orientason na pratika. Deus misti judau pa bu konsigi nfrenta bu purblemas ku provasons. (Lei Salmu 55:22.) Asin, si bu na sirbi Jeova ku tudu korson, bu pudi tene konfiansa suma salmista ku fala: “N pui SIÑOR sempri ña dianti; manera ki sta na ña direita, N ka na bulbulidu.” (Salmu 16:8; 63:8) Sin, Jeova pudi judau di un manera ku na kontental. Ma, suma ku bu sibi, i ten un inimigu di Deus ku misti tujiu fasi kila.

6. Ke ki Satanas fala aserka di pekaduris?

⁶ Kapitulu 11 des livru splika kuma, Satanas Diabu disafia diritu di Deus guverna. Satanas akusa Deus di konta mintida, di kuma Jeova i injustu pa manera ki ka disa Adon ku Eva disidi pa se kabesa ke ki bon ku ke ki mau. Dipus ki Adon ku Eva peka, si fijus  kumsa ku ciu na Tera, Satanas kistiona motivason di tudu pekaduris. Satanas fala: ‘Jintis ka ta sirbi Deus pa amor. Dan un opurtunidadi, N pudi disvia kualker algin di Deus.’ Ke ki pasa ku omi comadu Jo ta mostra kuma i es ki Satanas pensa. Kin ki Jo, i kuma ki staba nvolvidu na disafiu di Satanas?

7, 8. (a) Ke ki pui Jo sedu un algin diferenti di jintis di si tempu? (b) Kuma ki Satanas kistiona motivason di Jo?

⁷ Jo viviba serka di 3.600 anus atras. I seduba un bon omi, pabia Jeova fala: “I ka ten ningin na mundu ku parsi ku el. I omi di bardadi ku ta rispitan, i ta yanda diritu, i libra di fasi mal.” (Jo 1:8) Jo kontentaba Deus.

⁸ Satanas kistiona motivason di Jo na sirbi Deus. Diabu fala Jeova: “Bu ka pui tapada na roda del [Jo] ku si familia ku tudu ki tene? Bu bensua si tarbaju, tok si limaria na buri ciu, distindi bu mon, bu toka na tudu ki tene; bu jubi, si i ka na kobau!” — Jo 1:10, 11.

9. Kuma ki Jeova ruspundi disafiu di Satanas i pabia di ke?

⁹ Dipus Satanas afirma kuma, Jo ta sirbi Deus pabia di ke ki dadu. Diabu afirma tambi kuma si Jo sufri provason, i na nega Deus. Kuma ki Jeova ruspundi disafiu di Satanas? Suma kiston nvolviba motivason di Jo, Jeova disa pa Satanas testa Jo. Asin, i na ojadu di un manera klaru amor o falta di amor ku Jo tene pa Deus.

10. Kal difikuldadis ku Jo pasa, i kuma ki reaẑi?

¹⁰ I ka tarda, Satanas testa Jo di diferenti maneras. Alguns limarias di Jo furtadu i utrus matadu. Manga di si servus matadu. Es tisi difikuldadi ekonomiku. Utru kasabi bin pa Jo, oca si des fiju muri na un turbada.  Ma, mesmu kes akontisimentus tristi, “Jo ka peka, nin i ka da Deus kulpa.” — Jo 1:22.

11. (a) Kal ki sugundu akusason ku Satanas fasi kontra Jo, i kuma ki Jeova ruspundi? (b) Kuma ki Jo reaẑi dianti di si duensa ku manga di dur?

¹¹ Satanas ka disisti. I dibi di pensa kuma, Jo aguenta perda di si bens, servus ku fijus, ma si duensi i na nega Deus. Jeova disa Satanas pui Jo un duensa meduñu ku manga di dur. Ma te mesmu kila ka pui Jo pirdi fe na Deus. En ves di kila, “na tudu e kusas Jo ka peka kontra Deus ku si boka,” o papia mal di Deus. — Jo 2:10.

12. Kuma ki konduta di Jo prova kuma disafiu di Diabu i falsu?

¹² Jo ka sibiba kuma i Satanas ki pul ki purblemas. Suma i ka sibi tudu nformason aserka di manera ki Satanas disafia diritu di Jeova guverna, Jo pensaba kuma i Deus ku pul purblemas. (Jo 6:4; 16:11-14) Mesmu asin, i kontinua fiel pa Jeova. Afirmason di Satanas di kuma Jo ta sirbi Deus pabia di nteresi, provadu kuma i falsu pabia Jo manti fiel!

13. Kal ki rusultadu di Jo sedu fiel pa Deus?

¹³ Fidelidadi di Jo pirmiti Jeova da resposta sertu pa disafiu di Satanas. Na bardadi, Jo seduba amigu di Jeova, i Deus pagal pa si fidelidadi. — Jo 42:12-17.

14, 15. Ke ku manda no pudi fala kuma disafiu di Satanas ku nvolvi Jo ta afeta tudu pekaduris?

¹⁴ Kiston di sedu fiel pa Deus ku Satanas lantanda i ka so pa Jo. Abo tambi bu sta nvolvidu. Es mostradu klaru na Ditus 27:11, nunde ku Palabra di Jeova fala: “Ña fiju, sedu jiru, bu pun pa N kontenti, pa N pudi sibi ruspundi kil ku njutin.” Es palabras ku skirbidu manga di anus dipus ku Jo muri, ta mostra ki Satanas  kontinua inda njuti Deus i akusa Si servus. Ora ku no na vivi di un manera ku ta kontenta Jeova, no ta sta na juda da resposta pa disafiu falsu di Satanas, i asin, no ta kontenta korson di Deus. Ke ki bu pensa des? Sera ki i ka bunitu partisipa na da resposta pa akusasons falsu di Diabu, mesmu si kila signifika fasi sertus mudansas na bu vida?

¹⁵ Jubi ke ki Satanas fala: “Omi ta da tudu ki tene pa guarda si vida.” (Anos ku pui italiku; Jo 2:4) Suma i fala “omi,” Satanas mostra di manera klaru kuma, si akusason i ka so pa Jo ma i pa tudu pekaduris. Es i un pontu importanti dimas. Satanas sta na kistiona bu fidelidadi pa Deus. Diabu misti pa bu disobdisi Deus i abandona kamiñu justu ora ku bu sta na difikuldadis. Kuma ki Satanas ta tenta fasi kila?

16. (a) Kal metudus ku Satanas ta usa pa tenta disvia jintis di Deus? (b) Kuma ki Diabu pudi usa es metudus kontra bo?

¹⁶ Suma ku no oja na Kapitulu 10, Satanas ta usa metudus diferenti pa tenta disvia jintis di Deus. Di un ladu, i ta ataka “suma lion ku na somna, i na buska kil ki pudi nguli.” (1 Pedru 5:8) Asin, nfluensia di Satanas pudi ojadu ora ki amigus, parentis, o utrus sta kontra bu sforsu di studa Biblia i aplika ke ki bu aprindi. * (Jon 15:19, 20) Pa utru ladu, Satanas “ta finji suma anju di lus.” (2 Koríntius 11:14) Diabu pudi usa metudus finu pa nganau i afastau di kamiñu di Deus. I pudi tambi tenta puu fika disanimadu, talves fasiu pensa kuma bu ka sta na altura di sigi normas  di Deus pa kontental. (Ditus 24:10) Mesmu ki Satanas aẑi suma un “lion ku na somna” o suma “anju di lus,” si disafiu i mesmu: I fala kuma, ora ku bu na nfrenta difikuldadis o tentasons, bu na para sirbi Deus. Kuma ku bu pudi ruspundi es disafiu i mostra bu fidelidadi pa Deus, suma Jo?

17. Kal ki rason prinsipal di obdisi mandamentus di Jeova?

¹⁷ Bu pudi ruspundi disafiu di Satanas si bu vivi di un manera ku na kontenta Deus. Ke ki kila signifika? Biblia ruspundi: “Ama SIÑOR bu Deus ku tudu bu korson, ku tudu bu alma, ku tudu bu forsa.” (Ripitison di Lei 6:5) Nkuantu bu amor pa Deus na kirsi, bu na tene diseẑu di fasi ke ki misti pa bu fasi. Apostulu Jon skirbi: “No amor pa Deus ta mostra na manera ku no ta obdisi si mandamentus.” Si bu ama Jeova ku tudu bu korson, bu na oja kuma “si mandamentus gora, nin e ka kansadu.” — 1 Jon 5:3.

18. Kal ki alguns mandamentus di Jeova? (Jubi kuadru “ Ka bu Fasi ke ki Jeova Odia.”)

¹⁸ Kal ki mandamentus di Jeova? Alguns delis nvolvi konduta ku no dibi di ivita. Pur izemplu, jubi kuadru ku tene tema “ Ka bu fasi ke ki Jeova odia.” Bu na oja la, lista di konduta ki Biblia ta kondena di manera klaru. Si bu jubil pa purmeru bias, alguns pratikas ku sta na lista pudi parsi ki i ka mau. Ma, dipus di bu rifliti na testus di Biblia ku sitadu, bu na oja jiresa di leis di Jeova. Fasi mudansas na bu konduta, pudi sedu disafiu mas garandi ku bu ciga ja di nfrenta. Ma, vivi di un manera ku ta kontenta Deus ta tisi kontentamentu ku filisidadi garandi. (Isaias 48:17, 18) I kusa ku bu pudi yangasa. Kuma ku no sibi kila?

19. Kuma ku no sibi kuma Deus ka ta pidi pa fasi mas di kil ku no pudi fasi?

 ¹⁹ Nunka Jeova ka na pidi pa no fasi mas di kil ku no pudi fasi. (Lei Ripitison di Lei 30:11-14.) I kunsi no kapasidadi ku no limitasons mas di ki nos. (Salmu 103:14) Alen di kila, Jeova pudi danu forsa pa obdisil. Apostulu Paulu fala: “Deus i fiel; i ka na disa pa bo tentadu mas di ki kil ku bo pudi ku el; na ora di tentason i ta da tambi manera di kapli, pa bo pudi nguental.” (1 Koríntius 10:13) Pa judau aguenta, Jeova pudi dau ‘puder garandi.’ — 2 Koríntius 4:7.

20. Kal kualidadis ku ta kontenta Deus ku bu dibi di mostra, i ke ku manda i importanti?

²⁰ Sin duvida, kontenta Jeova nvolvi mas di ki ivita kusas ki odia. Bu pirsisa tambi di ama ke ki ama. (Romanus 12:9) Sera ki bu ka na sinti atraidu pa jintis ku bo tene mesmu manera di nkara kusas, mesmu nteresi ku normas? Jeova ta sinti atraidu tambi. Asin, aprindi ama kusas ku Jeova ama. Alguns delis faladu del na Salmu 15, nunde ku no pudi lei aserka di kilis ku Deus ta nkara suma si amigus. (Lei Salmu 15:1-5.) Amigus di  Jeova ta mostra ke ki Biblia ta coma di ‘frutu di spiritu.’ I nklui kualidadis suma “amor, alegria, pas, pasensa, pruntidon pa juda, bondadi, sedu algin di fiansa, mansensa ku puder pa guberna kurpu.” — Gálatas 5:22, 23.

21. Ke ki pudi judau disenvolvi kualidadis ku na kontenta Deus?

²¹ Lei i studa Biblia sempri na judau disenvolvi kualidadis ku ta kontenta Deus. I aprindi ke ki Deus misti pa no fasi na judau armoniza bu pensamentus ku pensamentus di Deus. (Isaias 30:20, 21) Mas ku bu na fortalisi bu amor pa Jeova, mas bu diseẑu di vivi di un manera ku na kontenta Deus na omenta.

22. Kal ki benefisiu di vivi di un manera ku ta kontenta Deus?

²² I pirsis sforsu pa vivi di un manera ku na kontenta Jeova. Biblia kompara muda bu vida suma dispi bu antigu manera di sedu i bisti nobu manera. (Kolosensis 3:9, 10) Ma aserka di mandamentus di Jeova, salmista skirbi: “Kil ku ta obdisi elis i ten garandi purbitu.” (Salmu 19:11) Abo tambi bu na bin oja kuma, vivi di un manera ku ta kontenta Deus tene manga di bensons. Si bu fasi kila, bu na da un resposta pa disafiu di Satanas i pui korson di Jeova kontenti!