1. Kal benefisiu ku no pudi tene si no adora Deus di bon manera?

JEOVA DEUS ta preokupa ciu ku nos, i misti pa no benefisia di si orientason amorosu. Si no adoral di bon manera, no na sta kontenti i no na ivita manga di purblemas na vida. No na tene tambi si benson ku si ajuda. (Isaias 48:17) Ma, i ten manga di riliẑions ku ta afirma sina bardadi aserka di Deus. Mesmu asin, i ten diferensa garandi na se nsinus aserka di kin ki Deus, i ke ki i misti pa no fasi.

2. Kuma ku no pudi sibi manera sertu di adora Jeova, i kal izemplu ku pudi judanu ntindi kila?

² Kuma ku bu pudi sibi manera sertu di adora Jeova? Bu ka pirsisa di studa i kompara nsinus di tudu riliẑions. Bu pirsisa so di aprindi ke ki Biblia na bardadi ta sina aserka di adorason di bardadi. Pur izemplu: Na manga di teras, i ten purblema di diñeru falsu. Si bu daduba tarbaju di identifika es diñeru falsu, kuma ku bu na fasilba? Bu na tenta kunsi tudu tipu di diñeru falsu? Nau. Bu tempu na gastadu di minjor manera si bu studa diñeru di bardadi. Dipus di bu sibi kuma ki diñeru di bardadi sedu, bu na pudi rapada diñeru falsu. Di mesmu manera, ora ki no aprindi identifika riliẑion di bardadi, no na pudi rapada riliẑions falsu.

3. Sugundu ke ki Jesus fala, ke ki no dibi di fasi si no misti tene aprovason di Deus?

 ³ I importanti pa no adora Jeova di manera ki misti. Manga di jintis ta fia kuma tudu riliẑions ta kontenta Deus, ma Biblia ka sina kila. I ka basta so fala ami i kriston. Jesus fala: “I ka tudu jintis ku ta falan: ‘Siñor, Siñor,’ ku na yentra na renu di seu, ma i kil ku ta fasi vontadi di ña Pape ku sta na seu.” Asin, pa tene aprovason di Deus no dibi di aprindi ke ki Deus misti pa no fasi i fasil. Jesus coma kilis ku ka ta fasi vontadi di Deus di kilis “ku ta fasi mal.” (Mateus 7:21-23) Suma diñeru falsu, riliẑion falsu ka tene balur. Pior inda, es riliẑion ta prejudikanu.

4. Ke ki palabras di Jesus aserka di dus kamiñu signifika, i nunde ki kada kamiñu ta leba?

⁴ Jeova da kada kin na mundu, opurtunidadi di tene vida ku ka ta kaba. Ma, pa tene vida ku ka ta kaba na Paraisu, no dibi di adora Deus di manera sertu i vivi desdi gosi di un manera ki i misti. Infilismenti, manga di jintis nega fasi kila. E ku manda Jesus fala: “Bo yentra na porton pikininu, pabia porton i largu, kamiñu i garandi ku ta bai pa pirdison; manga di jinti ta yentra nel. Ma porton i pikininu, kamiñu i pertadu ku ta bai pa vida; puku jintis ku ta ocal.” (Mateus 7:13, 14) Riliẑion di bardadi ta leba pa vida ku ka ta kaba. Riliẑion falsu ta leba pa distruison. Jeova ka misti pa ningin distruidu, e ku manda i sta na da jintis na tudu ladu un opurtunidadi di aprindi aserka del. (2 Pedru 3:9) Na bardadi, manera ku no ta adora Deus signifika vida o mortu pa nos.

5. Kuma ku no pudi rapada kilis ku ta pratika riliẑion di bardadi?

⁵ Kuma ku no pudi oja kamiñu “ku ta bai pa vida”?  Jesus fala kuma no na rapada riliẑion di bardadi na vida di jintis ku ta pratikal. I fala: “Tudu arvuri bon ta da bon fruta. . . . Asin bo ta rapara elis pa se frutu.” (Mateus 7:17, 20) Ke ki Jesus misti fala? Si palabras signifika ki, kilis ku ta pratika riliẑion di bardadi na pruduzi ‘bon frutu,’ ku sedu, tudu ke ki e ta fia nel sta na armonia ku vontadi di Deus, i e tene bon konduta. E ka sedu perfeitu, e ta yara, ma mesmu asin, suma un grupu di adoraduris di bardadi e ta sforsa pa fasi vontadi di Deus. No jubi gosi seis kusas ku ta identifika kilis ku ta pratika riliẑion di bardadi.

6, 7. Kuma ki servus di Deus ta nkara Biblia, i kuma ki Jesus disa izemplu nes asuntu?

⁶ Servus di Deus ta basia se nsinus na Biblia. Propi Biblia fala: “Tudu Skritura, i Deus ku nspiral; i ten purbitu pa nsina, pa raprindi, pa kuriẑi, pa mostra manera di yanda diritu, pa omi [o minjer] di Deus pudi sta kompletu, trenadu diritu pa tudu bon tarbaju.” (2 Timótiu 3:16, 17) Apostulu Paulu skirbi pa si kumpañeris kriston: “Oca ku no leba bos rekadu di Deus, bo risibil; bo ka risibil suma palabra di omi, ma suma palabra di Deus, ku na bardadi i sedu.” (1 Tesalonisensis 2:13) Asin, krensas ku pratikas di riliẑion di bardadi ka ta basia na ideias o tradisons di pekaduris. E basia na Palabra nspiradu di Deus, Biblia.

⁷ Jesus Kristu disa un bon izemplu pa manera ki basia si nsinus na Palabra di Deus. Na orason pa si Pape ku sta na seu, i fala: “Bu palabra i bardadi.” (Jon 17:17) Jesus fia na Palabra di Deus, i tudu ke ki sinaba basia na Skrituras. Manga di bias Jesus ta fala: “I sta skritu.” (Mateus 4:4, 7, 10) Dipus i ta sita un parti di skritura. Di mesmu manera, povu di Deus aos, ka ta sina si propi ideias. E fia kuma Biblia i Palabra di Deus, i e ta basia se nsinus na ke ki fala.

8. Ke ki adora Jeova ta nvolvi?

 ⁸ Kilis ku ta pratika riliẑion di bardadi ta adora so Jeova i e ta fasi utrus kunsi si nomi. Jesus fala: “Bu na adora Jeova bu Deus; i el son ku bu na sirbi.” (Mateus 4:10, NM) Asin, servus di Deus ta adora so Jeova. Es adorason nklui fasi jintis kunsi kal ki nomi di Deus di bardadi i kuma ki sedu. Salmu 83:18 fala: ‘Abo ku tene nomi di Jeova, abo son ku sta riba di tudu mundu.’ Jesus disa izemplu na juda utrus kunsi Deus, suma ki fala na orason: “N na konta ña ermons bu nomi.” (Ebreus 2:12) Di mesmu manera, aos, adoraduris di bardadi ta sina utrus aserka di nomi di Deus, si intenson ku si kualidadis.

9, 10. Di kal manera ku kristons di bardadi ta mostra amor pa n̈utru?

⁹ Servus di Deus ta mostra amor sinseru pa n̈utru. Jesus fala: “Si bo ama n̈utru, tudu jinti ta rapara kuma abos i ña disipulus.” (Jon 13:35) Purmeru kristons teneba es tipu di amor pa n̈utru. Amor basiadu na Biblia ta vensi barera rasial, sosial i nasional, i ta uni jintis na un ermondadi di bardadi ku ka pudi siparadu. (Lei Kolosensis 3:14.) Membrus di riliẑions falsu ka tene es tipu di ermondadi amorosu. Kuma ku no sibi kila? E ta mata n̈utru pabia di diferensa di rasa o di nasioalidadi. Kristons di bardadi ka ta pega armas pa mata se ermons kriston o utru algin. Biblia fala: “Es ku ta mostra fiju di Deus ku fiju di diabu: Kil ku ka ta fasi kusas diritu, ku ka ama si ermon, i ka di Deus. . . . Pa no ama n̈utru. I ka suma Kain ku seduba di ki malvadu, i mata si ermon.” — 1 Jon 3:10-12; 4:20, 21.

¹⁰ Sin duvida, amor di bardadi signifika mas di ki ka mata utrus. Kristons di bardadi, di livri vontadi, ta usa se tempu, inerẑia ku se meius pa juda i nkoraẑa n̈utru. (Ebreus 10:24, 25) E ta juda n̈utru na tempus difisil, e ta  trata utrus ku onestidadi. Na bardadi, e ta aplika na se vida konsiju di Biblia di “fasi ben pa tudu jinti.” — Gálatas 6:10.

11. Pabia di ke ki importanti seta Jesus Kristu suma kin ki Deus usa pa salbanu?

¹¹ Kristons di bardadi ta seta Jesus Kristu suma kin ki Deus usa pa salbanu. Biblia fala: “I ka ten nin utru algin ku pudi salba, pabia ne mundu li, Deus ka da jinti nin utru nomi ku pudi salbanu.” (Atus 4:12) Suma ku no ojaba na Kapitulu 5, Jesus da si vida suma un resgati pa pekaduris obdienti. (Mateus 20:28) Alen di kila, Jesus i algin ku Deus kuji suma Rei na Renu di seu, ki na bin guverna mundu ntidu. Deus misti pa no obdisi Jesus i aplika si nsinus si no misti tene vida ku ka ta kaba. E ku manda Biblia fala: “Kin ku seta Fiju i ta tene vida ku ka ta kaba, ma kin ku ka seta Fiju i ka ta oja vida.” — Jon 3:36.

12. Ke ki signifika pa ka fasi parti di mundu?

¹² Adoraduris di bardadi ka ta fasi parti di mundu. Oca i na julgaduba pa guvernanti Romanu comadu Pilatus, Jesus fala: “Ña renu i ka de mundu.” (Jon 18:36) I ka mporta tera ke na vivi, kilis ku na bardadi ta sigi Jesus sta bas di si Renu ku sta na seu, e ku manda e ta manti neutralidadi firmi na asuntus pulitiku di mundu. E ka ta partisipa na konflitus. Adoraduris di Jeova ka ta miti boka na disison ku utrus toma pa fasi parti di partidus pulitiku, kandidata pa un kargu pulitiku o vota. Kilis ku na bardadi ta adora Deus sedu neutru na asuntus pulitiku, ma mesmu asin, e ta rispita lei. Pabia di ke? Pabia Palabra di Deus da ordi pa kada un delis “obdisi otridadi ku sta riba del.” (Romanus 13:1) Ora ki ten konflitu entri ke ki Deus fala ku ke ki sistema pulitiku fala, adoraduris di bardadi ta sigi izemplu  di apostulus ku fala: “I mas minjor pa obdisi Deus di ki obdisi omis.” — Atus 5:29; Markus 12:17.

13. Kuma ki kilis ku na bardadi ta sigi Jesus ta nkara Renu di Deus, i pa kila, ke ke ta fasi?

¹³ Kilis ku na bardadi ta sigi Jesus ta prega Renu di Deus suma uniku speransa pa pekaduris. Jesus falaba: “E Bon Noba di renu i na kontadu na tudu mundu pa sedu tustumuñu pa tudu rasa. Dipus, fin ta ciga.”  (Mateus 24:14) En ves di nsentiva jintis konfia na guvernantis umanu pa rosolvi se purblemas, kilis ku na bardadi ta sigi Jesus Kristu ta prega Renu di Deus ku sta na seu suma uniku speransa pa pekaduris. (Salmu 146:3) Jesus sinanu ora pa ki guvernu perfeitu oca ki fala: “Pa bu renu bin, pa bu vontadi fasidu na tera suma na seu.” (Mateus 6:10) Palabra di Deus falaba ja kuma es Renu ku sta na seu “na kebra-kebra tudu utru renus, i kaba ku elis. Ki renu na firmantadu diritu pa sempri.” — Daniel 2:44; Apokalipsi 16:14; 19:19-21.

14. Kal riliẑion ku bu pensa kuma i kumpri normas pa adorason di bardadi?

¹⁴ Basiadu na ke ki no kaba di oja, punta bu kabesa: ‘Kal grupu riliẑiozu ku ta basia tudu si nsinus na Biblia i fasi pa nomi di Jeova kunsidu? Kal grupu ku ta mostra amor suma ki Jeova fala, ku ta izersi fe na Jesus, ku ka ta fasi parti di mundu, ku ta prega Renu di Deus suma uniku speransa di bardadi pa pekaduris? Na tudu riliẑions ku ten na mundu, kal ki ta kumpri tudu es normas?’ Provas mostra klaru di kuma i Tustumuñas di Jeova. — Lei Isaias 43:10-12.

15. Ke ki Deus misti pa no fasi alen di fia kuma i izisti?

¹⁵ Pa kontenta Deus i ka basta so fia nel. Na bardadi, Biblia fala ki, te mesmu dimonius fia ki Deus ten. (Tiagu 2:19) Ma, e ka ta fasi vontadi di Deus i e ka tene si aprovason. Pa tene aprovason di Deus, i ka basta so fia kuma Deus ten, ma no dibi di fasi tambi si vontadi. Tambi no dibi di sipara di riliẑion falsu i pega na adorason di bardadi.

16. Kal ason ku no dibi di toma aserka di riliẑion falsu?

¹⁶ Apostulu Paulu mostra kuma, no ka dibi di fasi  parti di adorason falsu. I skirbi: “Siñor fala: ‘Bo sai na se metadi; bo separa delis. Ka bo toka nada susu; ami N ta risibi bos.’” (2 Koríntius 6:17; Isaias 52:11) E ku manda kristons di bardadi ta ivita kualker kusa ku sta ligadu ku riliẑion falsu suma, feriadus, usu di imaẑen na adorason ku utrus kusas ku na bin faladu del na prosimu kapitulu.

17, 18. Ke ki “Garandi Babilonia,” i ke ku manda i urjenti ‘sai di la’?

¹⁷ Biblia mostra ki tudu tipu di riliẑion falsu fasi parti di “Garandi Babilonia.” * (Apokalipsi 17:5) Es nomi ta lembrantanu antigu sidadi di Babilonia, nunde ku riliẑion falsu kumsa dipus di Diluviu na tempu di Noe. Manga di nsinus ku pratikas ku ta ojadu aos na riliẑions falsu, bin di antigu Babilonia. Pur izemplu, Babilonius ta adoraba trindadi o tris deus. Di mesmu manera, aos, manga di igreẑas di kristandadi ta sina kuma Deus i un Trindadi, ku sedu, Deus Pape, Deus Fiju ku Deus Spiritu Santu. Ma Biblia sina di manera klaru kuma i ten so un Deus di bardadi, Jeova, i ki, Jesus Kristu i si Fiju. (Jon 17:3) Babilonius fiaba tambi kuma pekaduris tene un alma ku ka ta muri ku ta kontinua vivi dipus di mortu i pudi sufri na un kau di kastigu. Aos, manga di riliẑions ta sina kuma i ten alma o spiritu ku ta kontinua vivi, i ku pudi sufri na nfernu di fugu.

¹⁸ Suma adorason di antigu Babilonia spalia pa tudu mundu, Babilonia Garandi mudernu pudi sedu identifikadu suma tudu grupu di riliẑions falsu. Deus falaba ja di kuma, es grupu di riliẑions falsu na bin kabadu kel di repenti. Bu oja ke ku manda i importanti pa bu sipara di kualker parti di Babilonia Garandi? Jeova Deus  misti pa bu ‘sai di la’ rapidu nkuantu tempu ten inda. — Lei Apokalipsi 18:4, 8.

19. Ke ki bu na gaña si bu sirbi Jeova?

¹⁹ Suma rusultadu di bu disison di disa pratikas di riliẑion falsu, alguns pudi disidi para ndianta ku bo. Ma, sirbi Jeova juntu ku si povu, na pui pa bu gaña mas di kil ku bu pirdi. Suma purmeru disipulus di Jesus ku disaba se kusas pa sigil, bu na bin tene manga di ermons spiritual. Bu na pasa fasi parti di un familia garandi na mundu ntidu di milyons di kristons di bardadi, ku ta mostra amor di bardadi. I bu na bin tene speransa maravilyosu di vida ku ka ta kaba “na tempu ku na bin.” (Lei Markus 10:28-30.) Talves ku tempu, kilis ku abandonau pabia di bu krensas pudi bin studa Biblia i torna servus di Jeova.

20. Kal ki futuru pa kilis ku ta pratika riliẑion di bardadi?

²⁰ Biblia sina kuma, i ka na tarda, Deus na bin kaba kes sistema di kusas mau, i trokal ku un novu mundu justu bas di guvernu di si Renu. (2 Pedru 3:9, 13) I na sedu un mundu maravilyosu! I na ki novu sistema di kusas, i na ten so un riliẑion, uniku tipu di adorason di bardadi. I na seduba bon pa bu da pasus ki pirsis pa junta ku adoraduris di bardadi desdi gosi!