JINTIS ku ta fia na nsinu di Trindadi ta fala ki Deus i tris jintis — Pape, Fiju ku Spiritu Santu. E ta fala kuma kada un des tris jintis i igual, e sedu tudu puderosu i e ka tene kumsada. Asin, sugundu nsinu di Trindadi, Pape i Deus, Fiju i Deus i Spiritu Santu i Deus, ma i ten so un Deus.

Manga di jintis ku fia na Trindadi ta seta kuma e ka pudi splika es nsinu. Ma mesmu asin, talves e ta pensa kuma es i nsinu di Biblia. I nteresanti nota kuma palabra “Trindadi” ka ciga di sta na Biblia. Ma, sera ki ideia di Trindadi sta la? Pa ruspundi es purgunta, no  jubi un versikulu di Biblia ku jintis ta usa pa apoia Trindadi.

Jon 1:1 fala: “Antis di mundu kumpudu, kil ki palabra i tenba ja; i staba ku Deus, i seduba mesmu Deus.” Mas dianti de mesmu kapitulu, apostulu Jon mostra di manera klaru kuma, “palabra” i Jesus. (Jon 1:14) Ma, suma palabra comadu Deus, alguns ta ciga konkluson di kuma Fiju ku Pape dibi di fasi parti di mesmu Deus.

Lembra kuma na kumsada, es parti di Biblia skirbidu na gregu. Mas tardi, tradutoris traduzi testu gregu pa utrus linguas. Ma, manga di tradutoris di Biblia ka usa frasi ‘palabra seduba mesmu Deus.’ Pabia di ke? Basiadu na se kuñisimentu di gregu bibliku, es tradutoris ciga konkluson di kuma, frasi ‘palabra seduba mesmu Deus’ dibi di traduziduba di utru manera. Di kal manera? Ali alguns izemplus: “Palabra seduba un deus” (The New Testament in an Improved Version) “Palabra staba ku Deus i seduba suma el.” (The Translator’s New Testament) Sugundu es tradusons, palabra i ka propi Deus. * En ves di kila, pabia di si altu pusison na metadi di kriaturas di Jeova, palabra faladu del suma “un deus.” Li, palabra “deus” signifika “puderosu.”

Maioria di jintis ka kunsi gregu bibliku. Asin, kuma ku bu pudi sibi ke ki na bardadi apostulu Jon mistiba fala? Pensa nes izemplu: Un pursor splika si alunus un asuntu. Dipus, alunus ntindi splikason di diferenti manera. Kuma ku alunus pudi rosolvi es asuntu? E pudi pidi pursor pa i da mas splikason. Sin duvida, aprindi  mas kusas na juda elis ntindi asuntu minjor. Di mesmu manera, pa ntindi signifikadu di Jon 1:1, bu pudi jubi dentru di Ivanjeliu di Jon, pa mas nformason aserka di pusison di Jesus. Aprindi mas kusas aserka des asuntu na judau ciga na un konkluson sertu.

Pur izemplu, jubi ke ki Jon skirbi mas na kapitulu 1 versikulu 18: “Te aos ningin ka oja Deus [tudu puderosu.]” Ma, pekaduris oja Jesus, Fiju, pabia Jon fala: “Kil ki palabra [Jesus] i bida omi; i mora na no metadi . . . No oja si gloria.” (Jon 1:14) Gosi, kuma ki Fiju pudi fasi parti di Deus tudu puderosu? Jon fala tambi ki palabra staba “ku Deus.” Ma, kuma ki un algin pudi sta ku utru i na mesmu tempu sedu ki algin? Alen di kila, suma ki sta na Jon 17:3, Jesus mostra diferensa klaru entri el ku si Pape ku sta na seu. I coma si Pape di “uniku Deus di bardadi.” Kuas na fin di si Ivanjeliu, Jon rusumi asuntu kes palabras: “Ma es kusas sta skritu pa bo fia kuma Jesus i Mesias, Fiju di Deus.” (Jon 20:31) Nota kuma Jesus ka comadu di Deus, ma Fiju di Deus. Es nformason ku dadu mas, na Ivanjeliu di Jon ta mostra kuma ki Jon 1:1 dibi di ntindidu. Jesus, ku sedu palabra i “un deus” na sintidu di kuma, i tene un altu pusison, ma el i ka mesmu ku Deus tudu puderosu.

Pensa mas na izemplu di pursor ku alunus. Imaẑina kuma alguns tene inda duvida, mesmu dipus ke obi mas splikason di pursor. Ke ke pudi fasi? E pudi bai pa utru pursor pa tene nformason di mesmu asuntu. Si sugundu pursor konfirma splikason di purmeru pursor, duvida di maioria di alunus pudi kaba. Di mesmu manera, si bu ka tene serteza di ke ki na bardadi skirbidur di Biblia, Jon, misti fala aserka di relason entri Jesus ku Deus tudu puderosu, bu pudi jubi mas nformason na utru skirbidur di Biblia. Pur izemplu, jubi ke ki skirbidu pa Mateus.  Aserka di fin des sistema di kusas, i mensiona ke ki Jesus fala: “Ningin ka sibi di ki dia ku ora, nin anjus di seu, nin Fiju di Deus; son ña Pape ku sibi.” (Mateus 24:36) Kuma kes palabras konfirma ki Jesus i ka Deus tudu puderosu?

Jesus fala kuma Pape sibi mas di ki Fiju. Ma, si Jesus seduba parti di Deus tudu puderosu, i na sibiba mesmu kusas ku si Pape sibi. Asin, Fiju ku Pape ka pudi sedu igual. Ma, alguns pudi fala: ‘Jesus papia es kusa oca i staba inda na tera suma omi.’ Ma, mesmu si sedu asin, ke gora di spiritu santu? Si seduba parti di mesmu Deus suma Pape, ke ku manda Jesus ka fala kuma Spiritu Santu sibi ke ki Pape sibi?

Si bu kontinua bu studu di Biblia, bu na bin kunsi manga di partis di Biblia ku ta fala des asuntu. E ta konfirma bardadi aserka di Pape, Fiju ku spiritu santu. — Salmu 90:2; Atus 7:55; Kolosensis 1:15; Ditus 8:22.