1, 2. (a) Kuandu ku prenda ta tene balur garandi pa bo? (b) Pabia di ke ku no pudi fala kuma, resgati i minjor prenda ku bu pudi risibi?

KAL ki minjor prenda ku bu ciga ja di risibi? Un prenda ka pirsisa di sedu karu pa sedu importanti. Na bardadi, balur di un prenda ka ta mididu so pa diñeru. En ves di kila, ora ki un prenda dau filisidadi o i satisfazi un nesesidadi na bu vida, i ta tene balur garandi pa bo.

² Na manga di prendas ku bu na misti risibi, i ten un son ku mas tudu. I un prenda di Deus pa pekaduris. Jeova danu manga di kusas, ma minjor prenda ki danu i resgati, ku sedu sakrifisiu di si Fiju, Jesus Kristu. (Lei Mateus 20:28.) Suma ki no na bin oja nes kapitulu, resgati i minjor prenda ku bu pudi risibi, pabia i pudi dau manga di filisidadi, i pudi satisfazi bu nesesidadis mas importanti. Na bardadi, resgati i minjor kusa ku Jeova fasi pa mostra si amor pa bo.

3. Ke ki resgati, i ke ki no pirsisa di ntindi pa pudi apresia si balur?

³ Di un manera simplis, resgati i meiu di Jeova pa libra o salba pekaduris di pekadu ku mortu. (Efésius 1:7) Pa ntindi signifikadu des nsinu di Biblia, no pirsisa di lembra ke ki pasa na Jardin di Eden. So ora ku no ntindi ke ki Adon pirdi oca i peka, ku no na pudi apresia balur ki resgati tene pa nos.

4. Ke ki vida umanu perfeitu signifika pa Adon?

⁴ Oca Jeova kumpu Adon, i dal un kusa presiosu dimas — vida umanu perfeitu. Jubi ke ki kila signifika pa Adon. Kumpudu di kurpu i ku pensamentu perfeitu, i ka pudiba nunka duensi, beju o muri. Suma un umanu perfeitu, i teneba un relason spesial ku Jeova. Biblia fala ki Adon seduba “fiju di Deus.” (Lukas 3:38) Asin, Adon teneba un relason intimu ku Jeova Deus, suma un fiju ku si pape gosta del. Jeova ta papiaba ku si fiju na Tera, i da Adon bon tarbaju, i kontal ke ki mistiba pa i fasi. — Kumsada 1:28-30; 2:16, 17.

5. Biblia fala Adon kumpudu na ‘imaẑen di Deus,’ ke ki kila signifika?

⁵ Adon kumpudu na ‘imaẑen di Deus.’ (Kumsada 1:27) Kila ka signifika kuma Adon teneba mesmu aparensia ku Deus. Suma ku no ojaba na Kapitulu 1 des livru, Jeova i un Spiritu ku ka pudi ojadu. (Jon 4:24) Asin, Jeova ka tene kurpu suma nos. Sedu kumpudu na imaẑen di Deus signifika kuma, Adon kumpudu ku kualidadis suma di Deus, ku sedu amor, jiresa, justisa, puder ku utrus kualidadis. Adon parsi ku si Pape di utru manera importanti, i teneba liberdadi di skolia. Asin, Adon i ka suma un makina  ku pudi fasi so tarbaju ki kumpudu pa rel. En ves di kila, i pudiba toma disisons pesual, i pudiba kuji fasi ben o mal. Si kujiba obdisi Deus, i na pudiba vivi pa sempri na Paraisu na Tera.

6. Ke ki Adon pirdi oca i disobdisi Deus, i kuma ki si fijus sedu afetadu?

⁶ Na bardadi, oca ku Adon disobdisi Deus i kondenadu pa mortu, i paga un pres karu dimas. Pabia di si pekadu, Adon pirdi si vida umanu perfeitu ku tudu si benefisius. (Kumsada 3:17-19) Infilismenti, Adon pirdi es vida presiosu, i ka so pa rel, ma tambi pa si futuru fijus. Palabra di Deus fala: “Pekadu yentra na mundu pabia di un omi [Adon]; i tisi mortu. Asin tambi mortu pasa pa tudu jintis pabia tudu peka.” (Romanus 5:12.) Na bardadi, anos tudu no yarda pekadu di Adon. E ku manda Biblia fala i ‘bindi’ si kabesa ku si fijus na skravidon di pekadu ku mortu. (Romanus 7:14) I ka tenba nin un speransa pa Adon ku Eva pabia di livri vontadi e kuji disobdisi Deus. Ma ke ku no pudi fala di si fijus i di nos?

7, 8. Kal dus kusas ku resgati ta nvolvi?

⁷ Jeova bin sakura pekaduris atraves di resgati. Ke ki resgati? Resgati ta nvolvi dus kusas. Purmeru, un resgati i pres ki ta pagadu pa liberta o torna kumpra un kusa. I pudi komparadu ku pres ki pagadu na un tribunal pa liberta un algin kulpadu. Sugundu, un resgati i pres ku ta kubri, o paga, kustu di un kusa. I mesmu ku pres ki pagadu pa kubri danus ku un algin sufri. Pur izemplu, si un algin kausa un asidenti, i dibi di paga un montanti ku ta kuruspundi izatamenti ku balur di ke ki i dana.

⁸ Kuma ki pusivel kubri perda garandi ku Adon  kausanu, i sedu libertadu di skravidon di pekadu ku mortu? Gosi, no na fala di resgati ki Jeova da i ke ki kila pudi signifika pa bo.

9. Kal tipu di resgati ki pirsisba?

⁹ Suma un vida umanu perfeitu pirdidu, nin un pekadur mperfeitu ka pudi torna kumpral. (Salmu 49:7, 8) I pirsisba un resgati ku tene mesmu balur ku ke ki pirdidu. Es sta na armonia ku prinsipiu di justisa perfeitu ku sta na Palabra di Deus, ku fala: “Vida pa vida.” (Ripitison di Lei 19:21) Asin, ke ki na kubri balur di vida umanu perfeitu ku Adon pirdi? I pirsisba utru vida umanu perfeitu ku sedu ‘resgati ku kuruspundi.’ — 1 Timótiu 2:6.

10. Kuma ki Jeova paga resgati?

¹⁰ Kuma ki Jeova paga resgati? I manda un di si fiju spiritual pa Tera. Ma Jeova ka manda kualker kriatura spiritual. I manda kil ki mas gosta del, si uniku Fiju. (Lei 1 Jon 4:9, 10.) Di livri vontadi, es Fiju disa seu, nunde ki staba. (Filipensis 2:7) Suma ki no aprindi na Kapitulu 4 des livru, Jeova fasi un milagri oca i transfiri vida di si Fiju pa bariga di Maria. Atraves di spiritu santu di Deus, Jesus padidu suma umanu perfeitu, i ka sta bas di kastigu di pekadu. — Lukas 1:35.

11. Kuma ki so un omi pudi sirbi suma un resgati pa manga di jintis?

¹¹ Kuma ki so un omi pudi sirbi suma un resgati pa manga di pekaduris? Kuma ki manga di pekaduris yentra na pekadu? Lembra kuma, oca Adon peka i pirdi un kusa di balur, ku sedu, vida umanu perfeitu. Asin, i ka pudiba da si fijus el. En ves di kila, i  pudiba so da elis pekadu ku mortu. Jesus, ku Biblia coma di “sugundu Adon,” teneba un vida umanu perfeitu, i nunka i fasi pekadu. (1 Koríntius 15:45) Na sertu sintidu, Jesus toma lugar di Adon pa pudi salbanu. Jesus paga pres pa pekadu di Adon, pa manera ki da si vida perfeitu i kontinua obdisi Deus ku perfeison. Asin, Jesus tisi speransa pa fijus di Adon. — Romanus 5:19; 1 Koríntius 15:21, 22.

12. Ke ki provadu pa manera ki Jesus kontinua fiel mesmu dianti di sufrimentu?

¹² Biblia da nformasons kompletu aserka di sufrimentu ki Jesus aguenta antis di muri. I sutadu i pregadu, i pasa un mortu ku dur na staka di turtura. (Jon 19:1, 16-18, 30; Apendisi, “Sera ki kristons dibi di usa krus na adorason?”) Ke ku manda i pirsisba pa Jesus sufri ciu? Mas dianti nes livru, no na bin aprindi ki Satanas kistiona si Jeova tene kualker servu umanu ku na kontinua fiel bas di provason. Jesus da minjor resposta pusivel pa disafiu di Satanas, manera ki kontinua fiel mesmu dianti di manga di sufrimentu. Jesus prova ki, un omi perfeitu ku tene liberdadi di skolia pudi manti fiel di un manera perfeitu pa Deus, nau importa ke ki Diabu fasi. Jeova dibi di staba kontenti dimas pa manera ku si Fiju amadu manti fiel! — Ditus 27:11.

13. Kuma ki resgati pagadu?

¹³ Kuma ki resgati pagadu? Na 14 di Nisan di 33 E.K., di kalendariu Judaiku, Deus disa pa si Fiju perfeitu i sin pekadu matadu. Asin, Jesus da si vida umanu perfeitu suma sakrifisiu “un bias pa sempri.” (Ebreus 10:10) Na tirseru dia, dipus ku Jesus muri, Jeova lantandal di mortu ku un vida spiritual. Pa  kabanta paga resgati, Jesus riba pa seu nunde Deus. (Ebreus 9:24) Jeova seta ke ki Jesus fasi, pa manera ki da si vida suma un sakrifisiu, ki pirsisba pa liberta pekaduris di skravidon di pekadu ku mortu. — Lei Romanus 3:23, 24.

14, 15. Pa no pekadu “purdadu,” ke ki no dibi di fasi?

¹⁴ Mesmu ku no kondison di pekadu, no pudi risibi bensons garandi pabia di resgati. No na oja alguns di bensons ku no pudi tene gosi i bensons ku no na bin tene na futuru, pabia des minjor prenda ku Deus danu.

¹⁵ Purdon di pekadus. Pabia di mperfeison ku no yarda, no tene un luta garandi pa fasi ke ki sertu. Anos tudu no ta yara na palabra o na ason. Ma, atraves di sakrifisiu di resgati di Jesus, no pekadu pudi “purdadu.” (Kolosensis 1:13, 14) Ma, pa risibi es purdon, no dibi di ripindi di bardadi. Tambi, ku umildadi no dibi di pidi pa Jeova purdanu na basi di no fe na resgati di si Fiju. — Lei 1 Jon 1:8, 9.

16. Ke ki ta pirmitinu adora Deus ku un konsiensia limpu, i kal ki balur des tipu di konsiensia?

¹⁶ Un konsiensia limpu dianti di Deus. Un konsiensia kulpadu pudi ku fasilidadi lebanu pirdi speransa i fasinu sinti suma no ka tene balur. Ma, atraves di purdon ku tornadu pusivel pa resgati, ku bondadi, Jeova pirmitinu adoral ku un konsiensia limpu mesmu ku no mperfeison. (Ebreus 9:13, 14) Es ta torna pusivel pa no sta avontadi na papia ku Jeova. Asin, no pudi pertusi del na orason sin medu. (Ebreus 4:14-16) Manti un konsiensia limpu ta da pas mental, ta promovi rispitu pa no kabesa i ta da filisidadi.

17. Kal bensons ku sedu pusivel pabia Jesus muri pa nos?

 ¹⁷ Speransa di vida ku ka ta kaba na paraisu na Tera. Romanus 6:23 fala: “Pagamentu di pekadu i mortu.” Mesmu versikulu kontinua fala: “Ma kil ku Deus ta danu di grasa i vida ku ka ta kaba, pabia di Kristu Jesus no Siñor.” Na Kapitulu 3 des livru, no falaba di bensons di futuru Paraisu na Tera. (Apokalipsi 21:3, 4) Tudu es bensons pa futuru, suma vida ku ka ta kaba ku saudi perfeitu, sedu pusivel pabia Jesus muri pa nos. Pa risibi es bensons, no pirsisa di mostra ki no apresia prenda di resgati.

18. Ke ku manda no dibi di mostra apresu pa prenda di resgati?

¹⁸ Ke ku manda no dibi di mostra apresu garandi pa Jeova pabia di resgati? Na bardadi, prenda ta sedu spesial ora ki nvolvi gastu di tempu, sforsu ku diñeru di parti di kin ku na da. I ta tokanu ciu oja kuma, un prenda ta mostra amor di bardadi ku si dunu tene pa nos. Resgati i prenda mas importanti di tudu prendas, pabia Deus fasi un sakrifisiu garandi  pa danu el. Jon 3:16 fala: “Deus ama jinti di mundu dimas, tok i da si uniku Fiju.” Resgati i prova mas garandi di kuma Jeova amanu. Tambi i prova di amor di Jesus, pabia di livri vontadi i da si vida pa no benefisiu. (Lei Jon 15:13.) Prenda di resgati dibi di konvensinu ki Jeova ku si Fiju, ama kada un di nos. — Gálatas 2:20.

19, 20. Di kal maneras ku bu pudi mostra kuma, bu tene fe na prenda di Deus ki resgati?

¹⁹ Gosi, kuma ki bu pudi mostra apresu pa prenda di Deus ki resgati? Purmeru, aprindi aserka di Jeova ku danu resgati. (Jon 17:3) Studu di Biblia ku ajuda des publikason pudi judau fasi kila. Nkuantu bu na kunsi Jeova, bu amor pa rel na sedu mas forti. Es amor na lebau fasi ke ki misti. — 1 Jon 5:3.

²⁰ Mostra kuma bu tene fe na sakrifisiu di resgati di Jesus. Biblia fala: “Kin ku seta Fiju i ta tene vida ku ka ta kaba.” (Jon 3:36) Kuma ku no pudi mostra kuma no tene fe na sakrifisiu di Jesus? Es tipu di fe i ka so na boka. Tiagu 2:26 fala: “Fe, si i ka mostra na obras, i sta mortu.” Fe di bardadi ta ojadu atraves di “obras,” ku sedu no asons. Un manera di mostra kuma no tene fe na Jesus i atraves di fasi tudu ku no pudi pa kopial, i ka so pa no palabras, ma tambi pa no asons. — Jon 13:15.

21, 22. (a) Ke ku manda no dibi di mati komemorason di Sia di Siñor kada anu? (b) Ke ku na bin splikadu na Kapitulus  6 ku 7?

²¹ Kada anu mati komemorason di Sia di Siñor. Na noiti di 14 di Nisan di 33 E.K., Jesus kumsa un selebrason spesial ku Biblia coma di “Sia di Siñor.” (1 Koríntius 11:20; Mateus 26:26-28) Es selebrason  comadu tambi di Memorial di mortu di Jesus. Jesus kumsa es selebrason pa juda si apostulus ku tudu kristons di bardadi dipus delis, pa e lembra di kuma, atraves di si mortu suma umanu perfeitu, i da si vida suma resgati. Aserka des selebrason, Jesus fala: “Bo fasi es pa ña lembransa.” (Lukas 22:19) Komemora Memorial ta lembrantanu amor garandi ku Jeova ku Jesus mostra atraves di resgati. No pudi mostra no apresu pa resgati ora ku no mati komemorason di morti di Jesus kada anu. *

²² Na bardadi, provison di resgati di Jeova tene un balur garandi dimas. (2 Koríntius 9:14, 15) Es prenda pudi benefisia te mesmu kilis ku muri. Kapitulus 6 ku 7 na bin splika kila.