FERIADUS ku ta fasidu aos na manga di partis di mundu pa maioria di diferentis riliẑions ku kilis ku ka tene riliẑion, ka oriẑina di Biblia. Gosi, kal ki oriẑen des selebrasons? Si bu tene pusibilidadi di fasi piskisa, na biblioteka, bu na gosta di oja ke ki livrus di referensa fala  aserka di feriadus ku mas ta fasidu nunde ku bu mora. Jubi alguns izemplus.

Paskua. The Encyclopædia Britannica fala kuma: “Na Nobu Testamentu, i ka ten nada ku ta mostra kuma paskua [suma ki ta komemoradu na Kristandadi] ta fasidu.” Kuma ki paskua kumsa? I bin di adorason pagon. Mesmu ki ta faladu kuma, es feriadu ta komemora resureison di Jesus, kustumus asosiadu ku paskua i ka kriston.

Festa di anu novu. Data ku kustumu ligadu ku festas di anu novu ta varia di un tera pa utru. Aserka di oriẑen des festa, The World Book Encyclopedia fala: “Guvernanti Romanu, Juliu Sesar, stabilisi 1 di Janeru suma dia di anu novu na 46 Antis di Kristu. Romanus dedikaba es dia pa Janu, deus di portons, portas ku kumsada. Nomi di mis Janeru bin di Janu, ku tene dus kara — un pa dianti i utru pa tras.” Asin, festas di anu novu bin di kustumus pagon.

Festa di karnaval. Alguns komentarius di notisia aserka di karnaval fala sin: “Multidon ku manga di konfuson.” “Kuatru dia di cami i tudu noiti na festa.” “Pa alguns visiadu di festa, karnaval pudi dura manga di dias.” The New Encyclopædia Britannica fala ki, karnaval pudi relasiona ku festa pagon di sol na Roma antigu. Asin, karnaval asosiadu ku diferenti epoka, ma mesmu asin, i sta na mesmu kategoria ku kilis ku ta fasiduba, ku sedu, festansas. I parsi ciu ku festas Romanu pa onra di Baku (ku ta comaduba Dionisiu), deus di viñu na mitolojia gregu.

Utrus feriadus. I ka pusivel fala di tudu festas ku ta fasidu na mundu ntidu. Ma, feriadus ku ta onra pekaduris o organizasons umanu, ka ta setadu pa Jeova. (Jeremias 17:5-7; Atus 10:25, 26) Lembra tambi di kuma, pa selebrasons riliẑiozu kontenta Deus o nau, ta dipindi di si oriẑen. (Isaias 52:11; Apokalipsi 18:4) Orientasons di Biblia ku faladu del na Kapitulu 16 des livru na judau sibi kuma ki Deus ta nkara partisipa na feriadus ku ka sedu riliẑiozu.