LISON 10
Kuma ku bu pudi identifika adorason di bardadi?
1. Sera ki i ten so un riliẑion di bardadi?
‘Bo toma sintidu ku profetas falsu.’ — MATEUS 7:15.
Jesus sinaba si sigiduris so un riliẑion, ki sedu riliẑion di bardadi. I suma un kamiñu ku ta leba pa vida ku ka ta kaba. Jesus fala: ‘Puku jintis ku ta oca’ ki kamiñu. (Mateus 7:14) Deus ta seta so adorason ki basia na si Palabra di bardadi. Tudu adoraduris di bardadi sta unidu na un fe. — Lei Jon 4:23, 24; 14:6; Efésius 4:4, 5.
Jubi video Sera ki Deus ta seta tudu tipu di adorason?
2. Ke ki Jesus fala aserka di kristons falsu?
“E fala kuma e kunsi Deus, ma e ta negal ku kusas ke ta fasi.” — TITU 1:16.
Jesus avisaba kuma profetas falsu na kurumpi Kristianismu. Fora, e ta parsi sedu suma adoraduris di bardadi. Se igreẑas ta afirma sedu Kriston. Ma na bardadi bu pudi sibi kal tipu di jintis ke sedu. Kuma? So adorason di bardadi ku ta pruduzi Kristons di bardadi, ku ta mostra bon maneras ku asons ki jintis pudi nota del. — Lei Mateus 7:13-23.
3. Kuma ku bu pudi identifika adoraduris di bardadi?
Jubi e sinku manera di identifika elis:
-
Adoraduris di bardadi rispita Biblia suma Palabra di Deus. E ta sforsa pa vivi sugundu ke ki Biblia fala. Asin, riliẑion di bardadi diferenti ku riliẑion basiadu na ideias di pekadur. (Mateus 15:7-9) Adoraduris di bardadi ka ta prega un kusa dipus e fasi utru. — Lei Jon 17:17; 2 Timótiu 3:16, 17.
-
Kilis ku ta sigi Jesus na bardadi, ta rispita nomi di Deus, Jeova. Jesus rispita nomi di Deus pa manera ki i fasil pa i kunsidu. I juda jintis kunsi Deus i sina elis ora pa nomi di Deus santifikadu. (Mateus 6:9) Nunde ku bu mora, kal riliẑion ku ta fasi pa nomi di Deus kunsidu? — Lei Salmu 105:1; 1 Kronikas 16:8. *
-
Kristons di bardadi ta prega aserka di Renu di Deus? Deus manda Jesus pa prega bon noba di Renu. Renu di Deus i uniku speransa pa pekaduris. Jesus kontinua papia aserka del mesmu oca i na muri. (Lukas 4:43; 8:1; 23:42, 43) I falaba kuma si sigiduris na prega aserka de Renu. Ba kin suma Jesus, ku ta prega di kasa pa kasa i konta jintis aserka di Renu di Deus? — Lei Mateus 24:14.
-
Sigiduris di Jesus ka fasi parti de mundu mau. E ka ta toma parti na pulitika, nin na kusas suma grevi ku manifestasons. (Jon 17:16; 18:36) Tambi e ka ta kopia mau pratikas ku mañas di mundu. — Lei Tiagu 4:4.
-
Entri kristons di bardadi i ta notadu amor ke tene pa n̈utru. Atraves di Palabra di Deus e aprindi rispita tudu etnias. Manga di bias riliẑions falsu ta da apoiu garandi pa geras di mundu, ma adoraduris di bardadi ta nega fasi kila. (Mikeias 4:1-3) En ves di kila, kristons di bardadi ta usa se tempu ku meius pa juda i nkoraja utrus. — Lei Jon 13:34, 35; 1 Jon 4:20.
4. Bu pudi identifika riliẑion di bardadi?
Kal riliẑion ku basia tudu si nsinus na Palabra di Deus, ku rispita nomi di Deus, i ku ta papia di Renu di Deus suma uniku speransa pa pekaduris? Kal jintis ku ta mostra amor i ku ta ivita gera? Ke ki bu pensa? — Lei 1 Jon 3:10-12.
^ par. 3 Biblia (1998), Bíblia no Crioulo da Guiné-Bissau publicada como BIBLIA mostra na paẑina iii kuma nomi ebraiku di Deus i Yahweh, ma e trokal pa titulu SIÑOR.
