LISON 8
Ke ku manda Deus disa maldadi ku sufrimentu?
1. Kuma ki maldadi kumsa?
Deus disa pa omis guverna pa manga di tempu pa mostra kuma e ka pudi resolvi purblemas di pekaduris
Maldadi kumsa na tera oca Satanas kontaba purmeru mintida. Deus ka kumpu Satanas suma un mau anju. Na kumsada i seduba un anju perfeitu, ma “i ka sikidu na bardadi.” (Jon 8:44) I disinvolvi un diseẑu pa adorason ki na bardadi i pertensi so Deus. Satanas konta mintida pa purmeru minjer, Eva, i konvensil pa i obdisil en ves di obdisi Deus. Adon junta ku Eva na disobdisi Deus. Disison di Adon tisi sufrimentu ku mortu. — Lei Kumsada 3:1-6, 19.
Oca Satanas fala Eva pa i disobdisi Deus, i staba na kumsa un rebelion kontra diritu di Deus guverna. Maioria di jintis junta ku Satanas na nega Deus suma se Guvernanti. Asin, Satanas pasa sedu “ŝef de mundu.” — Lei Jon 14:30; 1 Jon 5:19.
2. Sera ki kriason di Deus teneba difeitu?
Tudu ke ki Deus fasi i perfeitu. Pekaduris ku anjus ki Deus kumpu seduba kapas di obdisi Deus di manera perfeitu. (Ripitison di Lei 32:4, 5) Deus kumpunu ku liberdadi di kuji fasi ben o fasi mal. E liberdadi ta danu oportunidadi di mostra no amor pa rel. — Lei Tiagu 1:13-15; 1 Jon 5:3.
3. Ke ku manda Deus disa sufrimentu te gosi?
Desdi tempu di Adon, Jeova disa pa jintis rebela kontra si diritu di guverna. Pabia? Pa mostra ki nin un sforsu di guverna sin el ka pudi benefisia jintis. (Eklesiastis 7:29; 8:9) Dipus di 6.000 anu di storia di pekadur, kusas torna klaru. Guvernus di pekadur falia na kaba ku gera, krimi, injustisa o duensa. — Lei Jeremias 10:23; Romanus 9:17.
Diferenti ku guvernu di pekadur, guvernu di Deus ta benefisia kilis ku setal. (Isaias 48:17, 18) I ka na tarda, Jeova na bin kaba ku tudu guvernu di pekadur. So jintis ku kuji sedu guvernadu pa Deus ku na bin mora na tera. — Isaias 11:9. Lei Daniel 2:44.
Jubi video Ke ku manda Deus disa sufrimentu?
4. Ke ki pasiensia di Deus ta pirmitinu fasi?
Satanas afirma kuma pekaduris ta sirbi Jeova so pa nteresi iguista. Bu misti mostra di kuma es i mintida? Bu pudi! Pasiensia di Deus ta pirmitinu mostra, si kontra no sta na apoia guvernu di Deus o di pekadur. No manera di vivi ta mostra kal ladu ku no apoia. — Lei Jo 1:8-12; Ditus 27:11.
5. Kuma ku no pudi kuji Deus suma no Guvernanti?
Ke ki no kuji ta mostra si kontra no misti pa Deus sedu no Guvernanti
No pudi kuji Deus suma no Guvernanti ora ki no aprindi i partisipa na adorason di bardadi basiadu na Palabra di Deus, Biblia. (Jon 4:23) No pudi nega Satanas suma no guvernanti ora ki no lunjusi di pulitika ku gera, suma ki Jesus fasi. — Lei Jon 18:36.
Satanas ta usa si puder pa pui pa pekadu ku mau pratikas parsi suma bon kusas. Ora ki no nega ki pratikas, alguns amigus ku parentis pudi gozanu o sta kontra nos. (1 Pedru 4:3, 4) Pa kila, no dibi di kuji. No na buska amizadi ku kilis ku ta gozanu o ku kilis ku ama Jeova? No na obdisi bon leis di Deus ku ta mostra si amor pa nos? Si no fasil, no na prova kuma Satanas muntrus pa manera ki afirma kuma, nin un pekadur ka na obdisi Deus bas di difikuldadi. — Lei 1 Koríntius 6:9, 10; 15:33.
Amor di Deus pa pekaduris i un garantia di kuma maldadi ku sufrimentu na bin kaba. Kilis ki mostra fe na bin vivi sabi pa tudu tempu na tera. — Lei Jon 3:16.
