LISON 5
Kal ki intenson di Deus pa tera?
1. Ke ku manda Deus kumpu tera?
Jeova da pekaduris tera. Tera i no kasa. Asin, purmeru kasal, Adon ku Eva, ka kumpuduba pa vivi na seu — Deus kumpuba ja anjus pa vivi na seu. (Jo 38:4, 7) Pa kila, Deus tomaba purmeru omi i pul na un paraisu bonitu comadu di jardin di Eden. (Kumsada 2:15-17) Jeova daba elis ku se futuru fijus speransa di tene un vida sin fin na tera. — Lei Salmu 37:29; 115:16.
Na kumsada, so jardin di Eden ki seduba un paraisu. Purmeru kasal dibi di inciba tera ku se fijus. Ku tempu, e na pasaba kuida di tudu tera i tornal na un paraisu. (Kumsada 1:28) Tera nunka ka na ciga di distruidu. I na kontinua sempri sedu kau di pekaduris. — Lei Salmu 104:5.
Jubi video Ke ku manda Deus kumpu Tera?
2. Ke ku manda aos tera ka sedu un paraisu?
Adon ku Eva disobdisi Deus, pa kila, Jeova pui elis fora di jardin. Paraisu pirdidu i nin un omi ka konsigi rekuperal. Biblia fala: “Con i ntregadu na mon di jintis mau.” — Jo 9:24. — Lei Kumsada 3:23, 24.
Sera ki Jeova ka konsigiba kumpri si intenson pa pekaduris? Nau! El i puderosu. I ka pudi falia. (Isaias 45:18) I na bin pui pa pekaduris vivi suma ki i mistiba. — Lei Salmu 37:11, 34.
3. Kuma ki tera na bin tornadu mas na un paraisu?
Tera na bin tornadu mas na un paraisu, ora ki Jesus bin na guverna suma Rei kujidu pa Deus. Na gera di Armajedon, Jesus na bin lidera anjus di Deus i distrui tudu inimigus di Deus. Dipus Jesus na bin prindi Satanas pa 1.000 anu. Povu di Deus na bin salba di distruison pabia Jesus na bin gia i proteẑi elis. E na bin vivi pa tudu tempu na Paraisu li na tera. — Lei Apokalipsi 20:1-3; 21:3, 4.
4. Kal tempu ki sufrimentu na bin kaba?
Kal tempu ki Deus na bin kaba ku maldadi na tera? Jesus da “sinal” pa mostra kal tempu ki fin na pertu. Situason di mundu aos ta ameasa vida di jintis, i ta mostra ki, no sta gosi na vivi na kabantada des sistema di kusas. — Lei Mateus 24:3, 7-14, 21, 22.
Duranti 1.000 anu ki Jesus na guverna na seu riba di tera, i na kaba ku tudu sufrimentu. (Isaias 9:6, 7; 11:9) Alen di sirbi suma Rei, Jesus na bin aẑi suma Ŝef di Saserdoti, i na bin kaba ku pekadus di kilis ku ama Deus. Asin, atraves di Jesus, Deus na bin kaba ku duensas, bejisa ku mortu. — Lei Isaias 25:8; 33:24.
5. Ba kin ku na bin vivi na futuru Paraisu?
Na Salon di Renu, bu na junta ku jintis ki ama Deus i ku misti aprindi kuma ke pudi kontental
Jintis ku ta obdisi Deus na bin vivi na Paraisu. (1 Jon 2:17) Jesus manda si sigiduris pa e buska jintis mansu i sina elis kuma ke pudi kontenta Deus. Aos, Jeova sta na purpara milyons di jintis pa vida na futuru Paraisu na tera. (Sofonias 2:3) Na Salons di Renu di Tustumuñas di Jeova, jintis ta aprindi kuma ke pudi sedu bon omi, bon pape, bon minjer i bon mame. Mininus ku se garandis ta adora juntu i aprindi kuma ke pudi benefisia di bon noba. — Lei Mikeias 4:1-4.
