LISON 2
Kin ki Deus?
1. Ke ku manda no dibi di adora Deus?
Deus di bardadi i Kumpudur di tudu kusas. I ka tene kumsada i nin i ka na tene fin. (Salmu 90:2) El ki Dunu di bon noba ki sta na Biblia. (1 Timótiu 1:11) Suma Deus danu vida, i el son ku no dibi di adora. — Lei Apokalipsi 4:11.
2. Kal tipu di algin ku Deus sedu?
Nin un pekadur ka ciga di oja Deus pabia el i un Spiritu. Si forma di vida i superior di pekaduris, ku tene kurpu fisiku i ku ta vivi na tera. (Jon 1:18; 4:24) Ma, no pudi sibi kuma ki Deus ta pensa i sinti atraves di kusas ki kumpu. Pur isemplu, diferentis frutas ku floris ta mostranu si amor ku jiresa. Tamañu di seu ku tera ta mostranu si puder. — Lei Romanus 1:20.
No pudi inda aprindi mas aserka di kuma ki Deus ta pensa i sinti atraves di leitura di Biblia. Pur isemplu, i ta kontanu ke ki Deus gosta del ku ke ki i ka gosta del, kuma ki ta trata jintis, i kuma ki i ta reaẑi na diferenti situasons. — Lei Salmu 103:7-10.
3. Deus tene un nomi?
Jesus fala: “No Pape ku sta na seu, no misti pa bu nomi rispitadu.” (Mateus 6:9) Deus tene manga di titulus, ma i tene so un uniku nomi. Na kada lingua, i ta prununsiadu di manera difrenti. Na kriol i kustuma prununsiadu “Jeova.” Ma i ten jintis ku ta prununsial “Yahweh.” — Lei Salmu 83:18. *
Nomi di Deus tiradu na manga di Biblias i trokadu ku titulus Siñor o Deus. Ma oca Biblia skribidu, nomi di Deus staba la serka di 7.000 bias. Ora ki i na sina jintis aserka di Deus, Jesus ta fasiba elis kunsi nomi di Deus. — LeiJubi video Deus tene un nomi?
4. Jeova ta preokupa ku nos?
Sera ki manga di sufrimentu ki ten, signifika di kuma Jeova i un Deus ku ka ta preokupa ku nos? Alguns jinti ta fala kuma, i el ku ta punu sufri, pa tentanu o testanu, ma kila i ka bardadi. — Lei Tiagu 1:13.
Deus da pekadur dignidadi di fasi skolia di si livri vontadi. Sera ki no ka apresia no liberdadi di kuji sirbi Deus? (Josué 24:15) Ma manga di jinti kuji fasi utrus mal, e ku manda sufrimentu omenta. Jeova ta fika ku tristesa na korson, ora ki i oja e koldadi di injustisa. — Lei Kumsada 6:5, 6.
Jeova i un Deus ku ta preokupa ku nos. I misti pa no vivi sabi. I ka na tarda, i na bin kaba ku sufrimentu juntu ku kilis ku ta punu sufri. Ma mesmu asin, i tene bon rason di disa sufrimentu pa puku tempu. Na Lison 8, no na bin sibi es i kal rason. — Lei 2 Pedru 2:9; 3:7, 13.
5. Kuma ku no pudi pertusi mas di Deus?
Jeova kumbidanu pa no pertusi del atraves di papia kel na orason. El i sta nteresadu na kada un di nos. (Salmu 65:2; 145:18) I sta dispostu pa purda. Utru ora no ta yara, ma mesmu asin, i ta rukuñisi sforsu ki no ta fasi pa kontental. Mesmu ku no falias, no pudi tene un relason intimu ku Deus. — Lei Salmu 103:12-14; Tiagu 4:8.
Suma Jeova danu vida, no dibi di amal mas di ki kualker algin. (Markus 12:30) Nkuantu bu sta na mostra amor pa Deus, na aprindi mas aserka del i fasi ke ki i misti, bu na pertusi mas del. — Lei 1 Timótiu 2:4; 1 Jon 5:3.
^ par. 4 Biblia (1998), Bíblia no Crioulo da Guiné-Bissau publicada como BIBLIA mostra na paẑina iii kuma nomi ebraiku di Deus i Yahweh, ma e trokal pa titulu SIÑOR.