Diferenti di kualker pekadur, Jesus viviba na seu suma un anju antis di i padidu na tera. (Jon 8:23) El i purmeru kriatura di Deus, i juda na kumpu tudu utru kusas. I uniku ki kumpudu diretamenti pa Jeova e ku manda i comadu di “un Fiju son di si Pape.” (Jon 1:14) Jesus comadu di “palabra” pabia el i porta-vos di Deus. — Lei Ditus 8:22, 23, 30; Kolosensis 1:15, 16.

Pa manda si Fiju pa tera, Deus transfiri si vida di seu pa bariga di un virẑen Judeu di nomi Maria. Asin, Jesus ka sedu fiju di nin un omi. (Lukas 1:30-35) Jesus binba pa tera (1) pa sina bardadi aserka di Deus, (2) pa danu un isemplu di kuma ku no dibi di fasi vontadi di Deus, mesmu ora ki no sta na difikuldadi, (3) pa da si vida perfeitu pa pudi ‘libranu.’ — Lei Mateus 20:28.

Un pres pudi pagadu pa liberta un algin di ameasa di mortu. (Saida 21:29, 30) Mortu ku bejisa ka fasiba parti di intenson ki Deus teneba pa pekaduris. Kuma ki no sibi kila? Deus falaba purmeru omi Adon di kuma si kontra i fasiba ke ki Biblia ta coma di “pekadu,” i na muri. (Kumsada 2:16, 17; 5:5) Sugundu Biblia, mortu “yentra” na mundu pabia di Adon. Asin, Adon pasanta tudu si fijus pekadu ku si kastigu ki sedu mortu. No pirsisa di libradu di  pekadu ku mortu ki no risibi di Adon. — Lei Romanus 5:12; 6:23.

Kin ki pudiba libranu di mortu? Ora ki no muri, no ta paga so kastigu di no propi pekadus. Nin un pekadur ka pudi paga pekadus di utrus. — Lei Salmu 49:7-9.

Diferenti di nos, Jesus i perfeitu. I ka pirsisaba di muri pa si pekadus — i ka ciga di fasi nin un pekadu. En ves di kila, Jesus muri pa pekadus di utrus. Deus mostra amor garandi dimas pa pekaduris pa manera ki i manda si Fiju pa i muri pa nos. Jesus mostra tambi amor pa nos, pa manera ki i obdisi si Pape i da si vida pa no pekadu. — Lei Jon 3:16; Romanus 5:18, 19.

Jubi video Ke ku Manda Jesus Muri?

Ocal na tera, Jesus kura duentis, i lantanda kilis ku muri i alivia jintis di sufrimentu. Asin i mostra ke ki i na bin fasi na futuru pa tudu pekaduris obdienti. (Mateus 15:30, 31; Jon 5:28) Dipus ki Jesus muri, Deus lantandal suma un anju puderosu. (1 Pedru 3:18) Dipus Jesus pasa na pera na mon direita di Deus, te ora ki Jeova dal puder di guverna suma Rei riba di tudu mundu. (Ebreus 10:12, 13) Gosi Jesus sta na rena suma Rei na seu i si sigiduris sta na anunsia e bon noba na mundu ntidu. — Lei Daniel 7:13, 14; Mateus 24:14.

I ka na tarda, Jesus na bin usa si puder suma Rei pa kaba ku tudu sufrimentu juntu ku kilis ku ta punu sufri. Tudu kilis ku pui fe na Jesus ora ke na obdisil, e na bin tene vida na un paraisu na tera. — Lei Salmu 37:9-11.