LISON 03
Sera ki no pudi fia na ke ku Biblia fala?
Biblia tene manga di promesas, tambi i ta da manga di konsijus. I pudi sedu ki bu misti sibi ke ku Biblia ta sina, ma na mesmu tempu bu pensa kuma i difisil fia na Biblia. Sera ki bu dibi di fia na promesas ku konsijus di un livru antigu? Sera ki bu pudi fia di kuma Biblia pudi judau tene minjor vida aos, i fia na ke ki fala aserka di futuru? Milyons di jintis fia. No na nsentivau pa bu izamina Biblia, i jubi si bu pudi fia tambi.
1. Sera ki kusas ku Biblia fala i bardadi?
Biblia fala kuma i tene “palabra di bardadi”. (Eklesiastis 12:10) I konta storias real, di jintis ku na bardadi izisti. (Lei Lukas 1:3; 3:1, 2.) Manga di storiaduris ku jintis ku ta piskisa kusas antigu, konfirma di kuma datas, jintis, lugaris ku akontisimentus ku Biblia fala del i bardadi.
2. Pabia ku no pudi fala kuma Biblia i ka un livru ku ka pasa prazu?
Manga di bias, Biblia fala di kusas ku jintis ka sibiba na ki tempu ki skirbidu. Pur izemplu, i fala di asuntus sientifiku. Maioria di kusas ki fala aserka di siensia, seduba kontrariu di ke ku jintis fiaba na ki tempu. Ma aos, siensia konfirma kuma ke ku Biblia fala i bardadi. Biblia i ‘di fiansa pa tudu sempri.’ — Salmu 111:7, 8.
3. Pabia ku no pudi fia na ke ku Biblia fala aserka di futuru?
Biblia tene profesias a ku kontaba ja “kusas ku ka kontisi inda.” (Isaias 46:10) I konta manga di kusas di manera izatu, manga di tempu antis de akontisi. Tambi i kontaba ja di manera klaru kusas ku sta na ojadu aos na mundu. Nes lison no na analiza alguns profesias di Biblia. I interesanti oja kuma ke sedu izatu!
APRINDI MAS
Analiza kuma ku siensia aos sta di akordu ku Biblia, i piskisa alguns profesias interesanti di Biblia.
4. Siensia sta di akordu ku Biblia
Na tempu antigu, maioria di jintis ta fiaba kuma i ten algun kusa ku sugura Tera. Mostra VIDEO.
Nota ke ku livru di Jo fala serka di 3.500 anu atras. Lei Jo 26:7, dipus bo kombersa aserka des purgunta:
-
Biblia falaba ja disna kuma mundu pindra “riba di nada”, pabia ku es i di adimira?
Temperatura di sol ta pui yagu di osianu bai pa nuven, dipus cuba ta bin cubi i ki yagu ta riba mas pa osianu. Te na anu 1800, jintis ka ntindiba diritu es sikulu di yagu. Ma, nota ke ku Biblia fala milyaris di anus atras. Lei Jo 36:27, 28, dipus bo kombersa aserka des purguntas:
-
Ke ku adimirau nes simplis splikason di sikulu di yagu?
-
Sera ki testu ku bu kaba di lei fortalisi bu konfiansa na Biblia?
5. Biblia falaba ja di akontisimentus importanti
Lei Isaias 44:27–45:2, dipus bo kombersa aserka des purgunta:
-
Kal kusas ku Biblia kontaba ja di manera klaru, 200 anu antis di Babilonia konkistadu?
Storiaduris konfirma kuma Rei Siru di Persia, ku si tropas e konkista sidadi di Babilonia na 539 AEK b. E disvia yagu di riu ku ta proteẑiba sidadi. Oca e entra sidadi e oja porton staba ja abertu, e toma sidadi sin gera. Aos, mas di 2.500 anus mas tardi, Babilonia dana inda, ningin ka mora la. Nota ke ku Biblia falaba ja.
Lei Isaias 13:19, 20, dipus bo kombersa aserka des purgunta:
-
Kuma ku es ku akontisi ku Babilonia ta konfirma kumprimentu des profesia?
Aos Babilonia sta na Iraki, i dana tudu
6. Biblia kontaba ja kusas ku no sta na oja aos
Biblia fala kuma no sta na vivi na “fin de tempu”. (2 Timótiu 3:1) Nota ke ku Biblia falaba ja kuma i na ojadu nes tempu:
Lei Mateus 24:6, 7, dipus bo kombersa aserka des purgunta:
-
Kal kusas ku Biblia falaba ja kuma i na ojadu na fin de tempu?
Lei 2 Timótiu 3:1-5, dipus bo kombersa aserka des purguntas:
-
Di akordu ku Biblia, kal ku na sedu komportamentu di maioria di jintis na fin de tempu?
-
Kal ki alguns des komportamentu ku bu ta oja?
ALGUNS JINTIS TA FALA: “Biblia i un simplis livru di pekaduris.”
-
Na bu opinion, kal ki prova mas garandi di kuma Biblia i un livru di konfiansa?
RUSUMU
Storia, siensia ku profesia ta mostra kuma no pudi fia na Biblia.
Rekapitulason
-
Sera ki Biblia i un livru ku tene bardadi?
-
Kal ki alguns kusas ku siensia sta di akordu ku Biblia?
-
Bu fia kuma Biblia pudi kontanu ke ku na akontisi na futuru? Pabia ku bu fia, o pabia ku bu ka fia?
TENE MAS INFORMASON
Sera ki Biblia fala un kusa ku siensia bin oja kuma i ka bardadi?
“Sera ki siensia sta di akordu ku Biblia?” (Artigu na internet)
Kal ki prova di kuma no sta na vivi na “fin de tempu”?
“6 Profesia di Biblia ku Sta na Kumpri Aos” (Sintinela di 1 di maiu di 2011)
Diskubri kuma ku profesias di Biblia aserka di imperiu Gregu kumpri.
