PARTI 7
Kuma ku bu pudi kria bu fiju?
“E ordis ku N na dau aos e ten ku sta na bu korson. Nsina elis pa bu fijus”. — Ripitison di Lei 6:6, 7
Oca Jeova fasi pa familia izisti, i da papes responsabilidadi di kria se fijus. (Kolosensis 3:20) Papes, i bo responsabilidadi kria bo fijus pa e ama Jeova i pa e bin sedu responsavel. (2 Timótiu 1:5; 3:15) Tambi bo dibi di sibi ke ku sta na se korson. I klaru di kuma bo isemplu i importanti dimas. Pa bo pudi sina diritu bo fijus palabra di Jeova, purmeru, bo dibi di pul inda na bo korson. — Salmu 40:8.
1 FASI PA BU FIJUS SINTI AVONTADI PA PAPIA KU BO
ES KI BIBLIA FALA: “Tudu algin dibi di sta pruntu pa obi, ma pa i tarda pa papia”. (Tiagu 1:19) Ku serteza bu misti pa bu fijus sinti kuma e pudi papia ku bo avontadi. E dibi di sibi kuma bu sta pruntu pa sukuta elis ora ke misti papia ku bo. Kria un ambienti di pas, pa fasilita elis papia avontadi. (Tiagu 3:18) Si e sinti kuma bu na sedu duru ku elis o kritika elis, talves e pudi ka sta avontadi ku bo. Sedu pasienti ku bu fijus, i mostra elis kuma bu ama elis. — Mateus 3:17; 1 Koríntius 8:1.
KE KU BU PUDI FASI:
Ora ku bu fijus misti papia ku bo, da elis atenson.
Kombersa ku bu fijus sempri, i ka so ora ki ten purblema.
2 TENTA NTINDI KE KE MISTI FALA
ES KI BIBLIA FALA: “Bon ntindimentu ta ngaña fabur”. (Ditus 13:15) Utru ora, pa ntindi sintimentu di bu fijus, bu pirsisa di ntindi ke ku se palabras misti fala. Manga di bias jovens kustuma fala kusas ke ka na fasi, o ki na bardadi i ka kila ke misti fala. Biblia fala: “Algin ku ta ruspundi antis di obi, i na mostra si tulesa ku si borgoña.” (Ditus 18:13) Ka bu lestu di paña raiba. — Ditus 19:11.
KE KU BU PUDI FASI:
Disidi sempri pa ka ntrumpi bu fiju o reaẑi ku raiba ora ki i na papia, mesmu si sedu kusa ku ka kontentau.
Tenta lembra kuma ku bu ta sintiba oca bu tene se idadi, i ke ki ta parsiba importanti pa bo.
3 BO MOSTRA KUMA BO STA UNIDU
ES KI BIBLIA FALA: “Ña fiju, para sintidu na nsinamentu di bu pape; ka bu disa kusa ku bu mame nsinau”. (Ditus 1:8) Jeova da pape ku mame otridadi riba di fiju. Bo dibi di sina bo fijus rispita bos i obdisi bos. (Efésius 6:1-3) Si pape ku mame ka “uni na un pensamentu ku un sintidu” mininu pudi nota kila. (1 Koríntius 1:10) Si bo ka ciga na ntindimentu, ka bo mostra kila se dianti, pabia kila pudi rapati rispitu ke tene pa bos.
KE KU BU PUDI FASI:
Papia ku bu parseru pa bo ciga ntindimentu aserka di kuma ku bo na disiplina bo fijus.
Si bo tene opinion diferenti aserka di kuma ku bo na kria bo fijus, tenta ntindi opinion di bu parseru.
4 BO FASI UN PROGRAMA
ES KI BIBLIA FALA: “Nsina mininu na kamiñu ki dibi di yanda”. (Ditus 22:6) Pa bu fiju tene un bon kriason, bu pirsisa di fasi algun kusa. Bu pirsisa di tene un programa ki na nklui disiplina bu fijus. (Salmu 127:4; Ditus 29:17) Disiplina ka signifika so kastigu, ma i nvolvi tambi juda bu fijus ntindi ke ku manda regra pudu. (Ditus 28:7) Sina elis tambi ama Palabra di Jeova i ntindi si orientasons. (Salmu 1:2) Es na juda elis tene un bon konsiensia. — Ebreus 5:14.
KE KU BU PUDI FASI:
Fasi pa bu fijus nkara Deus suma algin real ke pudi fia nel.
Juda elis sibi rapara i ivita pirigu imoral, suma kilis ku ta ojadu na internet. Sina elis kuma ke pudi ivita di kilis ku ta ten ku mininus.
“Nsina mininu na kamiñu ki dibi di yanda”.
No pensa kuma bu na gosta des tambi
NSINUS DI BIBLIA
Mininus
Usa es atividadis interesantis di nsinu, basiadu na Biblia pa sina bu fiju normas spiritual.
