1. Ke ki no dibi di fasi pa pudi kontenta Deus?

SI NO misti goza di bon relason ku Deus, no dibi di lunjisi di riliẑion falsu. No dibi di pratika riliẑion di bardadi. Aos, milyons di jintis na tudu parti di tera sta na fasil.

2. Nunde ki bu pudi oja Tustumuñas di Jeova, i kal ki se tarbaju?

² Biblia falaba ja ki adoraduris di bardadi na forma “un garandi multidon” ki na bin “di tudu nason, tudu rasa, tudu pobu ku tudu lingua.” (Apokalipsi 7:9) Na mas di 235 teras, milyons di Tustumuñas di Jeova sta ativu na juda utrus aprindi ­aserka di kamiñu di Jeova ku si leis.

3. Kin ku Tustumuñas di Jeova ta adora i kal tipu di adorason ke ta ivita?

³ Tustumuñas di Jeova rukuñisi ki Jeova i uniku ku meresi adoradu. E ka ta adora idulus o imaẑens di riliẑion. (1 Jon 5:21) Tambi, e ka ta adora mortus o toma parti na sirmonias ku ta apoia krensas di riliẑion falsu ku “nsinamentu di dimonius.” (1 Timótiu 4:1) Ma e ta konsola kilis ku se familia muri i e ta splika elis promesa di Deus di ki i na bin lantanda mortus pa vivi li na tera na un paraisu. — Jon 5:28, 29; Atus 24:15.

4. Kal ki pusison di povu di Deus aserka di arti, futis ku jambakusindadi?

⁴ Tustumuñas di Jeova ka ten nada ku kusas di arti, futis, jambakusindadi. E sibi di kuma es kusas tudu bin di Diabu. E ka ta fiansa na makati o mesiñu pa proteẑi se kabesa — se konfiansa i na Jeova. — Ditus 18:10.

5. Na kal sintidu ki Tustumuñas di Jeova “i ka di mundu”?

⁵ Jesus falaba si disipulus ki “elis i ka di mundu.” (Jon 17:16) Propi Jesus nega miti na pulitika oca i staba li na tera. (Jon 6:15) Di mesmu manera, Tustumuñas di Jeova ka ta miti na pulitika, difindi se tera, o yentra na gera des mundu. Kontrariu des, e ta paga mpustu i e ta obdisi leis di tera nunde ke na vivi. — Jon 15:19; Romanus 13:1, 7.

6. Kal ki orientason ku servus di Deus ta sigi aserka di kasamenti?

⁶ Pabia di kuma e ta obdisi lei di guvernantis, Tustumuñas di Jeova ta legalisa se kasamenti. (Titu 3:1) E ta obdisi mandamentu di Deus, asin e ka ta kasa dus minjer. (1 Timótiu 3:2) Suma e ta aplika lei di Deus na se vida, i ta difisil pa kasamenti kaba.

7. Kuma ki Tustumuñas di Jeova ta mostra amor na se metadi?

⁷ Tustumuñas di Jeova tene amor na se metadi. E bin di diferentis teras i diferentis rasas. Mesmu asin, amor ke tene pa n̈utru, ku amor ke tene pa Deus, ta uni elis na un ermondadi di bardadi. Ora ki i ten disastri o i surẑi un nesesidadi, Tustumuñas di Jeova ta sta pruntu pa juda utrus. Tustumuñas di Jeova ta mostra amor klaru na se manera di vivi. — Jon 13:35.

8. Kal kusas mau ku povu di Deus ta ivita?

⁸ Povu di Jeova ta sforsa ciu pa sedu onestu i leba un vida limpu. E ta ivita furtu, mintida, leba vida susu, cami, i pratika nogos di malandrisa. Se omis ka ta suta se minjeris. Antis de torna Tustumuñas di Jeova, alguns delis ta pratikaba es kusas, ma ku ajuda di Jeova e para. Asin e “labadu” na uju di Deus. — 1 Koríntius 6:9-11.

9. Ke ki un sertu livru fala aserka di igreẑas di Kristons na Afrika?

⁹ I bardadi ki manga di riliẑions ta afirma ki e sta na bardadi. E ta ponta dedu  pa se tarbaju garandi ke sta na fasi. Suma isemplu, um livru ciga di fala aserka di igreẑas di Kriston na Afrika: “[Nobu grupu di Kristons] toma funson di muru o jambakus. . . . E ta afirma di kuma e pudi konta ke ki na bin sedu, i fasi milagris. Na se metadi i ten kilis ku ta fala di kusas ke oja i na bin sedu, e ta splika suñus. E ta usa yagu sagradu, azeiti sagradu, sinza, vela ku nsensu pa kura jintis i afasta duensas.”

10, 11. Ke ku manda milagris di aos ka ta mostra di kuma un riliẑion bin di Deus?

¹⁰ Jintis des riliẑions ta afirma ki milagris ta mostra di kuma e tene benson di Deus. Ma e milagris ka ta mostra ki un riliẑion tene apoiu di Jeova. Satanas ta da puder pa sertus adoraduris falsu pa e pudi fasi ‘milagri.’ (2 Tesalonisensis 2:9) Alen des, Biblia falaba ja di kuma dons di milagris di parti di Deus, suma konta ke ku na bin ten, papia na linguas, i tene kuñisimentu spesial “na disparsi.” — 1 Koríntius 13:8.

¹¹ Jesus avisaba ja: “I ka tudu jintis ku ta falan: ‘Siñor, Siñor,’ ku na yentra na renu di seu, ma i kil ku ta fasi vontadi di ña Pape ku sta na seu. Manga delis na puntan na ki dia: ‘Siñor, Siñor, no ka anunsia na bu nomi? No ka serka dimonius na bu nomi? No ka fasi manga di milagri na bu nomi?’ Na ki ora N na fala elis klaru: ‘Nunka N ka kunsi bos. Bo lunjusi di mi, abos ku ta fasi mal.’” — Mateus 7:21-23.

12. Ba kin ku na yentra na renu di seu?

¹² Gosi, ba kin ku na yentra na renu di seu? I kilis ku ta fasi vontadi di Jeova.

13. Kal ki tarbaju ku Deus da si povu pa fasi aos, i ba kin ku sta na fasil?

¹³ Kal ki vontadi di Deus pa si povu aos? Jesus fala: “E Bon Noba di renu i na kontadu na tudu mundu pa sedu tustumuñu pa tudu rasa.” (Mateus 24:14) Es i tarbaju ki Tustumuñas di Jeova sta na fasi ku tudu vontadi.

14. Ke ki Renu di Deus, i ba kin ku na rena la?

¹⁴ “Na tudu mundu,” Tustumuñas di Jeova ta anunsia ki Renu di Deus i un guver­nu ku sta na seu ki na bin rena ku justisa na mundu ntidu. E ta nsina ki Jeova pui ja Kristu Jesus suma Rei di kil Renu, Juntu ku el 144.000 kujidu di tera pa rena ku el. — Daniel 7:14, 18; Apokalipsi 14:1, 4.

15. Ke ki Renu di Deus na kaba kel?

¹⁵ Tustumuñas di Jeova ta usa Biblia pa mostra jintis ki Renu di Deus na bin kaba ku tudu kusas de mundu di Satanas. Tambi i na kaba ku riliẑion falsu juntu ku si nsinus ku ta nsulta Deus, i ku ta kontenta Satanas! (Apokalipsi 18:8) I na kaba tambi ku tudu guvernus di pekaduris ku sta kontra Deus! — Daniel 2:44.

16. Ba kin ku na bin vivi na tera bas di guvernu di Jesus?

¹⁶ Alen di kila, Tustumuñas di Jeova ta fasi jintis sibi ki, Kristu Jesus na bin tisi kusas bunitu pa tudu kilis ku ta fasi ke ki Deus misti. E na bin vivi na tera bas di guvernu di Jesus. Biblia fasi es purmesa: “I na juda kilis ku comal pabia e ten falta, ku algin forontadu ku ka tene kin ku na judal. I na sinti pena di koitadi ku fraku; i na salba vida di kil ku ten falta.” — Salmu 72:12, 13.

17. So kal jintis ku sta na anunsia Renu di Deus?

¹⁷ I ka ten utru grupu di jintis ku ta fasi vontadi di Deus pa prega bon nobas di Renu. So Tustumuñas di Jeova ku sta na fasi jintis kunsi renu di Deus na mundu ntidu.